Action OTT: 60 కోట్ల బ‌డ్జెట్ - 20 కోట్ల క‌లెక్ష‌న్స్ - ఓటీటీలోకి లేటెస్ట్ బాలీవుడ్ యాక్ష‌న్ మూవీ - తెలుగులో స్ట్రీమింగ్

జాన్ అబ్ర‌హ‌మ్ హీరోగా న‌టించిన వేదా మూవీ ఓటీటీలోకి రాబోతోంది. నిఖిల్ అద్వానీ ద‌ర్శ‌క‌త్వంలో యాక్ష‌న్ డ్రామా క‌థాంశంతో రూపొందిన వేదా మూవీ డిజాస్ట‌ర్‌గా నిలిచింది. దాదాపు అర‌వై కోట్ల బ‌డ్జెట్‌తో తెర‌కెక్కిన ఈ సినిమా ఇర‌వై కోట్ల‌లోపే క‌లెక్ష‌న్స్ రాబ‌ట్టింది.

వేదా మూవీలో శార్వ‌రి హీరోయిన్‌గా న‌టించ‌గా జాన్ అబ్ర‌హం భార్య‌గా త‌మ‌న్నా గెస్ట్ రోల్ చేసింది. మౌనీరాయ్ స్పెష‌ల్ సాంగ్‌లో క‌నిపించింది. ఆశిష్ విద్యార్థి, అభిషేక్ బెన‌ర్జీ విల‌న్స్‌గా క‌నిపించారు.

జీ5 ఓటీటీ...

థియేట‌ర్ల‌లో రిలీజైన యాభై రోజుల త‌ర్వాత వేదా మూవీ ఓటీటీలోకి వ‌స్తోంది. ఈ సినిమా ద‌క్షిణాదితో పాటు హిందీ మూవీ డిజిట‌ల్ స్ట్రీమింగ్ రైట్స్‌ను జీ5 ఓటీటీ సొంతం చేసుకున్న‌ది. ఈ వారంలోనే వేదా మూవీ ఓటీటీలో రిలీజ్ కాబోతోంది. హిందీతో పాటు తెలుగు, త‌మిళ భాష‌ల్లో విడుద‌ల‌చేయ‌బోతున్నారు. స్ట్రీమింగ్ డేట్‌ను తొంద‌ర‌లోనే రిలీజ్ చేస్తామ‌ని జీ5 ఓటీటీ ప్ర‌క‌టించింది.

ఆగ‌స్ట్ 15న రిలీజ్‌...

య‌థార్థ ఘ‌ట‌న‌ల ఆధారంగా డైరెక్ట‌ర్‌ నిఖిల్ అద్వానీ వేదా మూవీని తెర‌కెక్కించాడు. ఈ సినిమాకు జాన్ అబ్ర‌హ‌మ్ ఓ ప్రొడ్యూస‌ర్‌గా వ్య‌వ‌హ‌రించాడు. ఆగ‌స్ట్ 15న అక్ష‌య్‌కుమార్ ఖేల్ ఖేల్ మే, శ్ర‌ద్ధాక‌పూర్ స్త్రీ 2 సినిమాల‌కు పోటీగా వేదా థియేట‌ర్ల‌లో రిలీజైంది. ఇందులో స్త్రీ 2 బ్లాక్‌బ‌స్ట‌ర్‌గా నిల‌వ‌గా ఖేల్ ఖేల్ మే, వేదా డిజాస్ట‌ర్స్ అయ్యాయి.

కుల‌వివ‌క్ష నేప‌థ్యంలో

కుల‌వివ‌క్ష పాయింట్‌కు యాక్ష‌న్ అంశాల‌ను జోడించి ఈ మూవీ రూపొందింది. . అభిమ‌న్యు (జాన్ అబ్ర‌హ‌మ్‌) ఆర్మీ మేజ‌ర్‌. అత‌డి భార్య రాశిని (త‌మ‌న్నా) టెర్ర‌రిస్ట్‌లు చంపేస్తారు. ఆ ఉగ్ర‌వాదుల‌పై ప‌గ‌తో ర‌లిగిపోయిన అభిమ‌న్యు ఒక్కొక్క‌రిని వెతికి ప‌ట్టుకొని మ‌రి హ‌త‌మారుస్తాడు. ఈ రివేంజ్ కార‌ణంగా అభిమన్యు ఆర్మీ ఉద్యోగం పోతుంది. బ‌ర్మార్ అనే ఊరికి వ‌చ్చిన అభిమ‌న్యు అక్క‌డి కాలేజీలో బాక్సింగ్ కోచ్‌గా జాయిన్ అవుతాడు.

వేదా (శార్వ‌రి) అనే అమ్మాయి అభిమ‌న్యు వ‌ద్ద బాక్సింగ్ నేర్చుకుంటుంది. గొప్పింటి అమ్మాయిని ప్రేమించిన వేదా అన్న‌య్యను ప్ర‌తాప్‌సింగ్ మ‌నుషులు చంపేస్తారు. వేదాను కూడా చంపాల‌ని అనుకుంటారు. అస‌లు ప్ర‌తాప్ సింగ్ ఎవ‌రు? అత‌డి బారి నుంచి వేదాను అభిమ‌న్యు ఎలా కాపాడాడు? ప్ర‌తాప్ సింగ్‌కు వ్య‌తిరేకంగా కోర్టుకు వెళ్లిన వేదాకు న్యాయం జ‌రిగిందా? లేదా? అన్న‌ది యాక్ష‌న్ అంశాల‌తో వేదా మూవీలో ద‌ర్శ‌కుడు చూపించాడు.

యాక్ష‌న్ సీక్వెన్స్ లు బాగున్నా కాన్సెప్ట్ ఔట్‌డేటెడ్ కావ‌డంతో వేదా మూవీ అభిమానుల‌ను మెప్పించ‌లేక‌పోయింది. దాదాపు రెండేళ్ల త‌ర్వాత జాన్ అబ్ర‌హ‌మ్ హీరోగా న‌టించిన మూవీ ఇది. గ‌త ఏడాది రిలీజైన షారుఖ్ ఖాన్ ప‌ఠాన్‌లో జాన్ అబ్ర‌హ‌మ్ విల‌న్‌గా క‌నిపించాడు.

త‌మ‌న్నా స్పెష‌ల్ సాంగ్‌

వేదాతో పాటు అదే రోజు థియేట‌ర్ల‌లో రిలీజైన స్త్రీ2లో త‌మ‌న్నా స్పెష‌ల్ సాగ్ చేసింది. స్త్రీ2లో ఆమె పాట పెద్ద హిట్ట‌య్యింది. థియేట‌ర్ల‌లో స్త్రీ2 మూవీ 800 కోట్ల క‌లెక్ష‌న్స్ రాబ‌ట్టింది. ఈ ఏడాది బ్లాక్‌బ‌స్ట‌ర్‌గా నిలిచిన హార‌ర్ కామెడీ మూవీ ముంజ్యాలో శార్వ‌రి హీరోయిన్‌గా న‌టించింది.