Teja Sajja: 14 సినిమాలతో ఎంతోమంది డైరెక్టర్స్‌ను పరిచయం చేశారు.. హనుమాన్ హీరో తేజ సజ్జా కామెంట్స్

Teja Sajja About Roti Kapda Romance: హుషారు, సినిమా చూపిస్త మావ, మేం వయసుకు వచ్చాం, ప్రేమ ఇష్క్ కాదల్, పాగల్ వంటి యూత్‌ఫుల్ చిత్రాలను నిర్మించిన ప్రముఖ నిర్మాత, లక్కీ మీడియా అధినేత బెక్కెం వేణుగోపాల్ తాజాగా సృజన్‌ కుమార్ బొజ్జంతో కలిసి నిర్మించిన చిత్రం ‘రోటి కపడా రొమాన్స్’.

రోటి కపడా రొమాన్స్ ప్రీ రిలీజ్ ఈవెంట్

రోటి కపడా రొమాన్స్ చిత్రంలో హర్ష నర్రా, సందీప్ సరోజ్, తరుణ్, సుప్రజ్ రంగా, సోనూ ఠాకూర్, నువ్వేక్ష, మేఘలేఖ, ఖుష్బూ చౌదరి హీరో హీరోయిన్లుగా చేస్తున్నారు. ఈ చిత్రానికి విక్రమ్ రెడ్డి దర్శకత్వం వహించారు. నవంబరు 22న రోటి కపడా రొమాన్స్ మూవీ ప్రేక్షకుల ముందుకు రానుంది. ఈ నేపథ్యంలో రోటి కపడా రొమాన్స్ ప్రీ రిలీజ్‌ ఈవెంట్‌ను శుక్రవారం (నవంబర్ 15) హైదరాబాద్‌లో ఘనంగా నిర్వహించారు.

హనుమాన్ హీరో

రోటి కపడా రొమాన్స్ ప్రీ రిలీజ్ ఈవెంట్‌లో చిత్రంలోని నటీనటులు, చిత్ర నిర్మాతలు, దర్శకుడుతో పాటు దర్శకులు యదు వంశీ, పవన్‌ సాధినేని, హర్ష, రచయిత కోన వెంకట్‌, నిర్మాతలు కేఎల్‌ దామోదర్‌ ప్రసాద్‌, చదలవాడ శ్రీనివాసరావు, తుమ్మల పల్లి రామసత్య నారాయణ తదితరులు పాల్గొన్నారు. ఈ కార్యక్రమానికి ముఖ్య అతిథిగా హనుమాన్‌ చిత్రంతో పాన్‌ ఇండియా స్టార్‌గా ఎదిగిన సూపర్‌ హీరో తేజ సజ్జా విచ్చేశారు.

14 సినిమాల్లో

ఈ సందర్భంగా తేజ సజ్టా మాట్లాడుతూ ''ఈ వేదిక మీద ఉన్న నూతన టాలెంట్‌కు ఈ సినిమా ఎన్నో ఏళ్ల కల. ఈ చిత్రంతో నిర్మాత బెక్కెం వేణుగోపాల్‌ ఎంతో మంది నూతన నటీనటులను పరిచయం చేస్తున్నారు. ఆయన్ని చూస్తే ఎంతో ఇన్‌స్పయిరింగ్‌గా ఉంటుంది. ఆయన ఇప్పటి వరకు తీసిన 14 సినిమాల్లో ఎంతో మంది దర్శకులను, రచయితలను, నటీనటులను సినీ పరిశ్రమకు పరిచయం చేశారు'' అని అన్నారు.

మంచి బ్రేక్ ఇవ్వాలి

''నేను కూడా కెరీర్‌ ప్రారంభంలో గోపీ గారి ఆఫీసుకు వెళ్లేవాడిని. కానీ, ఆయనతో సినిమా కుదరలేదు. ఇక రోటి కపడా రొమాన్స్‌తో ఈ నవంబరు 22న చాలా మంది నూతన నటీనటులు పుట్టబోతున్నారు. తప్పకుండా ఈ చిత్రం విజయం సాధించి, అందరికి మంచి బ్రేక్‌ నివ్వాలి. తప్పకుండా అందరూ థియేటర్‌లో ఈ సినిమా చూసి విజయవంతం చేయాలని కోరుకుంటున్నాను'' అని తేజ సజ్జా తెలిపాడు.

కనెక్ట్ అయ్యేలా

దర్శకుడు విక్రమ్‌ రెడ్డి మాట్లాడుతూ.. ''చాలా కష్టపడి దర్శకుడి నా పేరు చూసుకుంటున్నాను. ఈ సినిమాను కూడా ఎంతో కష్టపడి చేశాను. నేటి యూత్‌కు కనెక్ట్‌ అయ్యే విధంగా ఈ సినిమా ఉంటుంది. ఈ సినిమా అందరిని నవ్విస్తుంది.. ఏడిపిస్తుంది.. బాధపెడుతుంది.. ఆలోచింపజేస్తుంది. కుటుంబంతో చూడదగ్గ ఫ్యామిలీ ఎంటర్‌టైనర్‌ ఇది'' అని చెప్పారు.

రోటి కపడా రొమాన్స్ ఓటీటీ రైట్స్

''రోటి కపడా రొమాన్స్ సినిమా ఓటీటీ రైట్స్‌ , థియేట్రికల్‌ రైట్స్‌ ఇలా అన్ని హక్కులు విడుదలకు ముందే అమ్మేశారు. సినిమా చూసి నచ్చి అందరూ హక్కులు కొనుక్కున్నారు. దీంతో మాకు విజయంపై మరింత నమ్మకం పెరిగింది. ఈ సినిమా విజయం సాధించకపోతే నేను దర్శకుడిగా రిటైర్‌మెంట్‌ ప్రకటిస్తున్నాను'' అని డైరెక్టర్ విక్రమ్ రెడ్డి ఛాలెంజ్ చేశారు.