Star Maa Serials TRP Ratings: అందనంత ఎత్తుకు బ్రహ్మముడి.. టీఆర్పీల్లో స్టార్ మా సీరియల్స్ దూకుడు.. జీతెలుగు ఇలా..

Star Maa Serials TRP Ratings: స్టార్ మా సీరియల్స్ సత్తా ఏంటో చాటాయి 39వ వారం టీఆర్పీ రేటింగ్స్. ఒకటి, రెండు కాదు.. ఏకంగా టాప్ 6లో మొత్తం ఈ ఛానెల్ సీరియల్సే ఉన్నాయి. ఇక బ్రహ్మముడి తన ఆధిపత్యాన్ని మరింత కొనసాగిస్తూ.. తాజా రేటింగ్స్ లో మరో లెవల్ కు వెళ్లింది. జీతెలుగు, జెమిని, ఈటీవీ సీరియల్స్ ఎప్పటిలాగే స్టార్ మా కంటే చాలా వెనుకబడి ఉన్నాయి.

బ్రహ్మముడి.. అందనంత ఎత్తుకు..

తాజాగా 39వ వారానికిగాను రిలీజ్ అయిన టీఆర్పీ రేటింగ్స్ లో స్టార్ మా సీరియల్స్ మరోసారి తమ ఆధిపత్యాన్ని కొనసాగించాయి. అయితే ఎన్నో నెలలుగా టాప్ లో ఉంటూ వస్తున్న బ్రహ్మముడి ఈసారి కూడా టాప్ లోనే ఉన్నా.. రేటింగ్ మరింత పెరగడం విశేషం. ఈసారి ఏకంగా 13.39తో ఎవరికీ అందనంత ఎత్తుకు ఎదిగింది. రెండో స్థానంలో కార్తీకదీపం 2 సీరియల్ 12.39 రేటింగ్ తో ఉంది.

ఇక మూడు, నాలుగు స్థానాల్లో మార్పులు జరిగాయి. ఇన్నాళ్లూ ఆ స్థానంలో ఉన్న గుండెనిండా గుడిగంటలు (10.46) నాలుగో స్థానానికి పడిపోగా.. ఇంటింటి రామాయణం (10.72) మూడో స్థానానికి దూసుకొచ్చింది. మరో సీరియల్ చిన్ని 10.03 రేటింగ్ తో ఐదో స్థానంలో నిలిచింది. ఆరో స్థానంలోనూ స్టార్ మాకే చెందిన మగువ ఓ మగువ 8.38 రేటింగ్ తో ఉంది.

జీ తెలుగు సీరియల్స్ ఇలా..

జీ తెలుగు సీరియల్స్ విషయానికి వస్తే.. ఆ ఛానెల్లో 7.07 రేటింగ్ సాధించిన పడమటి సంధ్యారాగం టాప్ లో నిలిచింది. ఓవరాల్ గా చూస్తే ఈ సీరియల్ ఏడో స్థానంలో ఉంది. ఇక ఈ ఛానెల్లో ఆ తర్వాత 6.9 రేటింగ్ తో నిండు నూరేళ్ల సావాసం రెండో స్థానానికి దూసుకొచ్చింది.

ఆ తర్వాత 6.79తో మేఘ సందేశం, 6.60తో జగద్ధాత్రి, 6.52తో త్రినయని, 5.17తో మా అన్నయ్య సీరియల్స్ ఉన్నాయి. తెలుగు టీవీ ఛానెల్స్ లోని మొత్తం సీరియల్స్ టాప్ 10 చూస్తే.. స్టార్ మాకు చెందినవి ఏడు సీరియల్స్ ఉండగా.. జీతెలుగు సీరియల్స్ మూడు మాత్రమే ఉన్నాయి.

ఈటీవీ, జెమిని సీరియల్స్ రేటింగ్స్ ఇవీ..

చాలా రోజులుగా టీఆర్పీల్లో స్టార్ మా, జీ తెలుగుతో ఈటీవీ, జెమిని సీరియల్స్ పోటీ పడలేకపోతున్నాయి. 39వ వారంలోనూ అదే జరిగింది. మొదట ఈటీవీలో వచ్చే సీరియల్స్ చూస్తే.. ఆ ఛానెల్ వరకు 3.47 రేటింగ్ తో రంగులరాట్నం టాప్ లో నిలిచింది. ఆ తర్వాత 3.27తో మనసంతా నువ్వే, 3.16తో గువ్వగోరింక, 2.73తో రావోయి చందమామ సీరియల్స్ ఉన్నాయి.

జెమిని టీవీ సీరియల్స్ పరిస్థితి దారుణంగానే ఉంది. ఆ ఛానెల్లో 1కిపైగా రేటింగ్ సాధించిన సీరియల్స్ రెండు మాత్రమే ఉన్నాయి. వాటిలో 1.46తో శ్రీమద్ రామాయణం టాప్ లో ఉండగా.. 1.24తో కొత్తగా రెక్కలొచ్చెనా సీరియల్ నిలిచింది. ఇక నువ్వే కావాలి సీరియల్ 0.94, సివంగి 0.94, భైరవి 0.77 రేటింగ్ సాధించాయి.