Star Maa Parivar Awards Promo: స్టార్ మా పరివార్ అవార్డ్స్ వచ్చేస్తోంది.. ప్రోమో రిలీజ్.. బ్రహ్మముడి టీమ్ సంబరాలు

Star Maa Parivar Awards Promo: స్టార్ మా ఛానెల్ మరో ఎక్సైటింగ్ ఈవెంట్ ను ప్రేక్షకుల ముందుకు తీసుకురానుంది. ఈ ఈవెంట్ పేరు స్టార్ మా పరివార్ అవార్డ్స్. ఈ స్పెషల్ ఈవెంట్ కు అక్కినేని నాగార్జున చీఫ్ గెస్టుగా వచ్చినట్లు గురువారం (అక్టోబర్ 3) రిలీజ్ చేసిన ప్రోమోలో చూపించారు. ఆటపాటలు, డ్యాన్స్ లతో ఈ ఈవెంట్ చాలా ఉత్సాహంగా జరిగినట్లు ప్రోమో చూస్తే స్పష్టమవుతోంది.

స్టార్ మా పరివార్ అవార్డ్స్

స్టార్ మా పరివార్ అవార్డ్స్ ఈవెంట్ గురించి సదరు ఛానెల్ తన ఎక్స్ అకౌంట్ ద్వారా వెల్లడించింది. ఈ ఈవెంట్ ఇప్పటికే జరగగా.. త్వరలోనే టెలికాస్ట్ కానున్నట్లు ఓ ప్రోమో ద్వారా తెలిపింది.

"మెరుపులు, గ్లామర్, హైఓల్టేజ్ ఎంటర్టైన్మెంట్ నైట్ కు సిద్ధంగా ఉండండి. మీ ఫేవరైట్ స్టార్స్ స్టార్ మా పరివార్ అవార్డ్స్ 2024 ఈవెంట్ లో మెరవనున్నారు. చీఫ్ గెస్టుగా కింగ్ నాగార్జున గ్రాండ్ ఎంట్రీ ఇవ్వనున్నాడు. మీరు అస్సలు మిస్ కాకూడని అల్టిమేట్ సెలబ్రేషన్" అనే క్యాప్షన్ తో ఈ ప్రోమోను స్టార్ మా రిలీజ్ చేసింది.

సెలబ్రిటీలతో అవార్డుల ఈవెంట్

యాన్ ఆల్బమ్ ఆఫ్ గోల్డెన్ మూమెంట్స్ అంటూ ఈ ప్రోమో మొదలైంది. స్టార్ మా పరివార్ అవార్డ్స్ వేదిక కూడా చాలా అందంగా, గ్రాండ్ గా తీర్చిదిద్దారు. ప్రతి వారం ఆదివారం విత్ స్టార్ మా పరివారం ప్రోగ్రామ్ ను హోస్ట్ చేసే శ్రీముఖియే ఈ ఈవెంట్ ను హోస్ట్ చేసింది. ఆ తర్వాత స్టార్ మా ఛానెల్స్ లో వచ్చే షోలలోని సెలబ్రిటీలతోపాటు నేహా శెట్టిలాంటి సినిమా సెలబ్రిటీల ఆటపాటలతో ఈ ప్రోమో సాగింది.

ఆ తర్వాత నాగార్జున, డైరెక్టర్ బోయపాటి శ్రీను, శ్రీవిష్ణు, రీతూ వర్మ, సుమ, అనసూయలాంటి వాళ్ల ఎంట్రీలను చూపించారు. ఉత్తమ మామ, ఉత్తమ కొడుకు, ఉత్తమ జంట అంటూ వరుసగా అవార్డులు అనౌన్స్ చేశారు. అవార్డు గోస్ టు అని చివర్లో నాగార్జున అనగానే బ్రహ్మముడి టీమ్ ఎగిరి గంతేయడం కూడా ఈ ప్రోమోలో చూడొచ్చు. ఇక నేహా శెట్టితో ముక్కు అవినాష్ చేసిన కామెడీని కూడా చూపించారు. చివర్లో అక్కినేని నాగేశ్వరరావుకు నివాళి అర్పిస్తూ ప్రోమో ముగించారు.

ప్రతి ఏటా స్టార్ మా పరివార్ అవార్డ్స్ ఈవెంట్ జరుగుతూ వస్తోంది. ఈ ఛానెల్ లో వచ్చే సీరియల్స్ నటీనటులకు ఈ అవార్డులను అందజేస్తున్నారు. మరి ఈసారి స్టార్ మా పరివార్ అవార్డుల్లో ఎవరు ఏ అవార్డులు గెలుచుకున్నారో తెలియాలంటే కొన్ని రోజులు ఆగాల్సిందే. ఈవెంట్ టెలికాస్ట్ తేదీని త్వరలోనే స్టార్ మా అనౌన్స్ చేయనుంది.