Naga Chaitanya: షాకింగ్.. నాగ చైతన్య ఎక్స్ అకౌంట్ హ్యాక్.. బిట్‌కాయిన్ ప్రమోట్ చేస్తూ..

Naga Chaitanya: టాలీవుడ్ స్టార్ హీరో నాగ చైతన్య ఎక్స్ (గతంలో ట్విటర్) అకౌంట్ హ్యాకింగ్ కు గురైందా? బుధవారం (అక్టోబర్ 9) మధ్యాహ్నం అతని అకౌంట్ లో పోస్ట్ అయిన ఓ పోల్ అందరినీ షాక్ కు గురి చేసింది. అది ఓ బిట్ కాయిన్ ను ప్రమోట్ చేస్తున్నట్లుగా ఉన్న పోల్. అయితే వెంటనే దీనిపై స్పందించిన అతని టీమ్.. ఆ పోల్ డిలీట్ చేసింది.

నాగ చైతన్య అకౌంట్ హ్యాక్

ప్రముఖులకు చెందిన ఎక్స్, ఇన్‌స్టాగ్రామ్ అకౌంట్స్ హ్యాక్ అవడం మనం చాలాసార్లు చూసే ఉంటాం. తాజాగా నాగ చైతన్య కూడా ఈ హ్యాకింగ్ బారిన పడినట్లు తెలుస్తోంది. బుధవారం (అక్టోబర్ 9) మధ్యాహ్నం అతని ఎక్స్ అకౌంట్లో సడెన్ గా ఓ పోల్ కనిపించింది.

అందులో తాను 2013లో 50 డాలర్లకు 100 బిట్ కాయిన్లు కొన్నానని, ఇప్పుడు దాని విలువ 6 మిలియన్ డాలర్లకు చేరిందని.. మీరు కూడా వీటిని కొంటారా అనే ప్రశ్నతో ఓ పోల్ ను పోస్ట్ చేశారు. దీనికి అవును, కాదు అనే సమాధానాలు ఇచ్చారు. ఎక్స్ అకౌంట్లో ఏకంగా 2.6 మిలియన్ల ఫాలోవర్లు నాగ చైతన్యకు ఉండటంతో నిమిషాల్లోనే కొన్ని వేల మంది ఈ పోల్ లో తమ ఓట్లు వేశారు.

అయితే అతని అకౌంట్ హ్యాక్ కు గురైనట్లు గుర్తించిన టీమ్.. వెంటనే ఆ పోల్ డిలీట్ చేసింది. అకౌంట్ పై మళ్లీ పూర్తి పట్టు సాధించేలా ప్రయత్నం చేసింది. అయితే దీనిపై చైతన్య టీమ్ అధికారికంగా ఇప్పటి వరకూ ఎలాంటి ప్రకటన రిలీజ్ చేయలేదు. అతని ఇన్‌స్టాగ్రామ్ అకౌంట్ మాత్రం సేఫ్ గానే ఉంది.

నాగ చైతన్య నెక్ట్స్ మూవీ..

నాగ చైతన్య ప్రస్తుతం తన నెక్ట్స్ మూవీ తండేల్ షూటింగ్ లో బిజీగా ఉన్నాడు. చందూ మొండేటి డైరెక్షన్ లో వస్తున్న ఈ సినిమాలో చైతన్య సరసన సాయి పల్లవి నటిస్తున్న విషయం తెలిసిందే. ఈ మూవీ డిసెంబర్ 20 రిలీజ్ కానుంది. ఇందులో చైతన్య ఓ మత్స్యకారుడి పాత్ర పోషిస్తున్నాడు.

ఇండియా, పాకిస్థాన్ బోర్డర్ లో చేపల వేటకు వెళ్లి.. ఆ దేశ నేవీ అధికారులకు చిక్కిన అతడు.. తర్వాత ఎలా బయటపడ్డాడన్నది ఈ సినిమాలో చూడొచ్చు. ప్రేమకథకు దేశభక్తిని జోడించి ఈ తండేల్ సినిమాను తీస్తున్నాడు డైరెక్టర్ చందూ మొండేటి. శ్రీకాకుళానికి చెందిన జాలర్ల వాస్తవ ఘటనల ఆధారంగా ఈ మూవీ తెరకెక్కుతోంది. ఇప్పటికే ఈ మూవీ నుంచి వచ్చిన ప్రమోషనల్ కంటెంట్ ఆసక్తి రేపేలా ఉంది.

మరోవైపు ఈ మధ్యే తెలంగాణ మంత్రి కొండా సురేఖ చేసిన కామెంట్స్ తో చైతన్య మరోసారి వార్తల్లో నిలిచిన విషయం తెలిసిందే. అతనితోపాటు నాగార్జున, సమంతపై ఆమె అనుచిత వ్యాఖ్యలు చేశారు. దీనిపై అక్కినేని ఫ్యామిలీతోపాటు మొత్తం తెలుగు సినిమా ఇండస్ట్రీ నిరసన వ్యక్తం చేసింది. ప్రస్తుతం కోర్టులో కొండా సురేఖపై నాగార్జున వేసిన పరువు నష్టం దావా కేసు సాగుతోంది.