Pushpa 2 half shaven head Actor: పుష్ప 2 ట్రైలర్‌లో కనిపించిన అరగుండు యాక్టర్ గురించి జోరుగా చర్చ, ఇంతకీ ఈ నటుడు ఎవరంటే?
18 November 2024, 14:34 IST
Share
Pushpa 2 trailer reactions: పుష్ప-2 ట్రైలర్ రిలీజ్ తర్వాత ఒక క్యారెక్టర్ గురించి సోషల్ మీడియాలో జోరుగా చర్చ జరుగుతోంది. అతను టాప్ హీరోల సినిమాల్లో నటించినా.. ఇప్పటి వరకూ పెద్దగా పేరు రాలేదు. కానీ?
పుష్ప 2లో తారక్ పొన్నప్ప
ఐకాన్ స్టార్ అల్లు అర్జున్ నటించిన ‘పుష్ప: ది రూల్’ మూవీ ట్రైలర్ ఆదివారం సాయంత్రం రిలీజైంది. బీహార్ రాజధాని పాట్నాలో పెద్ద ఎత్తున ట్రైలర్ లాంఛ్ ఈవెంట్ జరగగా.. వేలాది మంది అభిమానుల సమక్షంలో ట్రైలర్‌ను విడుదల చేశారు.
2 నిమిషాల 48 సెకన్లు ఉన్న ఈ ట్రైలర్‌లో కథని ఏమాత్రం రివీల్ చేయని దర్శకుడు సుకుమార్.. అల్లు అర్జున్‌కి విపరీతమైన ఎలివేషన్ ఇస్తూ సినిమాపై హైప్‌ని మరింత పెంచేశారు.
ఎవరు ఈ అరగుండు?
పుష్ప2 ట్రైలర్ చూసిన తర్వాత అందులో కనిపించిన అల్లు అర్జున్, రష్మిక మంధాన, ఫహాద్‌ ఫాజిల్‌, శ్రీలీల కంటే.. ఓ అరగుండు క్యారెక్టర్ గురించి సోషల్ మీడియాలో నెటిజన్లు ఎక్కువగా చర్చిస్తున్నారు. ఎవరు ఇతను? ఏ భాషకి చెందిన నటుడు? అంటూ గూగుల్‌లో తెగ శోధిస్తున్నారు.
ట్రైలర్‌లో కొన్ని క్షణాలు మాత్రమే కనిపించిన అరగుండు నటుడిని స్క్రీన్ షాట్ తీసి మరీ సోషల్ మీడియాలో షేర్ చేస్తున్నారు. అతనిపై మీమ్స్, జోక్స్ కూడా అప్పుడే మొదలైపోయాయి.
కేజీఎఫ్‌తో లైమ్‌లైట్‌లోకి
పుష్ప 2లో కనిపించిన ఆ అరగుండు యాక్టర్ పేరు తారక్ పొన్నప్ప. శాండల్‌వుడ్ (కన్నడ ఇండస్ట్రీ) చెందిన నటుడు ఇతను. వాస్తవానికి సౌత్‌లో ఇప్పటికే చాలా మంది ఇతడ్ని స్క్రీన్‌పై చూసి ఉంటారు.
యశ్ నటించిన ‘కేజీఎఫ్’ సినిమాలో నటించిన ఈ పొన్నప్ప.. ఈ ఏడాది విడుదలైన ఎన్టీఆర్ ‘దేవర పార్ట్-1’లో కూడా కనిపించారు. అయితే.. సైడ్ క్యారెక్టర్స్‌ కావడంతో ఈ నటుడికి పెద్దగా పేరు రాలేదు.
కానీ.. పుష్ప-2 సినిమా రిలీజ్‌కి ముందే పొన్నప్ప క్యారెక్టర్ గురించి జోరుగా చర్చ జరుగుతోంది. అరగుండుతో, మెడలో చెప్పులతో భీకరంగా ట్రైలర్‌లో పొన్నప్ప కనిపించారు.
సినిమాని మలుపుతిప్పే క్యారెక్టర్
పుష్ప 2లో తన క్యారెక్టర్ ఒక ట్విస్ట్‌తో ముడిపడి ఉంటుందని.. సినిమా మొత్తాన్ని మలుపు తిప్పే క్యారెక్టర్‌ని తాను చేస్తున్నట్లు గతంలో పొన్నప్ప చెప్పినట్లు తెలుస్తోంది.
డిసెంబరు 5న పుష్ప2 సినిమా రిలీజ్‌కాబోతుండగా.. రిలీజ్‌కి ముందు ఇంకా ఆరు నగరాల్లో ప్రమోషనల్ ఈవెంట్స్‌ను చిత్ర యూనిట్ చేయబోతోంది. ఆఖరిగా హైదరాబాద్‌లో ఈవెంట్ చేయనున్నారు. కానీ.. ఏపీలో మాత్రం ఎలాంటి ఈవెంట్ లేదు.
ఫైర్ కాదు.. వైల్డ్ ఫైర్
పుష్ప-2లో అనసూయ, సునీల్‌తో పాటు కొత్తగా జగపతి బాబు, ప్రకాశ్ రాజ్ కూడా యాడ్ అయ్యారు. అలానే శ్రీలీల ఐటెం సాంగ్ చేసింది. పుష్ప అంటే ప్లవర్ అనుకుంటివా.. కాదు వైల్డ్ ఫైర్ అంటూ ట్రైలర్‌లో అల్లు అర్జున్ చేసిన సందడి యూట్యూబ్‌లో సరికొత్త రికార్డుల్ని నెలకొల్పోతోంది.
టాపిక్