Indian 3 Trailer: ఇండియన్ 2 ఎండింగ్‌లో ఇండియన్ 3 ట్రైలర్.. బిగ్ సర్‌ప్రైజ్.. కాజల్ కమల్ మధ్య కత్తి యుద్ధం (వీడియో)

Indian 3 Trailer Released: ఎట్టకేలకు ఉలగ నాయగన్ కమల్ హాసన్ నటించిన అత్యంత క్రేజియెస్ట్ మూవీ ఇండియన్ 2 థియేటర్లలోకి ఇవాళ (జూలై 12) రానే వచ్చేసింది. అతి భారీ అంచనాల మధ్య విడుదలైన ఈ సినిమాకు మిశ్రమ స్పందన వస్తోంది. ఎక్కువగా పాజిటివ్ టాక్ వస్తున్నప్పటికీ కొన్ని చోట్ల మాత్రం నెగెటివిటీ కనిపిస్తోంది.

హిందీ యాక్టర్

కమల్ హాసన్ మరోసారి తన నట విశ్వరూపం చూపించారని ఆడియెన్స్ చెబుతున్నారు. తమిళ సంచలన దర్శకుడు శంకర్ తెరకెక్కించిన ఈ ప్రతిష్టాత్మక చిత్రంలో కమల్ హాసన్‌తోపాటు రకుల్ ప్రీత్ సింగ్, సిద్ధార్థ్, ఎస్‌జే సూర్య, బాబీ సింహా, ప్రియా భవానీ శంకర్, సముద్ర ఖని, హిందీ నటుడు గుల్షన్ గ్రోవర్ తదితరులు కీలక పాత్రలు పోషించారు.

భారతీయుడు 2 చిత్రానికి టాక్ ఎలా ఉన్నా ఇండియన్ బాక్సాఫీస్ వద్ద అత్యధిక కలెక్షన్లతో రికార్డ్స్ క్రియేట్ చేయనుందని ట్రేడ్ వర్గాల నిపుణులు చెబుతున్నారు. ఇదిలా ఉంటే, ఇండియన్ 2 సినిమా క్లైమాక్స్ తర్వాత ప్రేక్షకులకు పెద్ద సర్‌ప్రైజ్ ఇచ్చారు మూవీ మేకర్స్. ఇండియన్ 2 ఎండింగ్‌ టైటిల్ కార్డ్స్ ముగిసిన తర్వాత ఇండియన్ 3 ట్రైలర్‌ను ప్రదర్శించారు.

కాజల్ అగర్వాల్‌పై క్లారిటీ

భారతీయుడు 2 క్లైమాక్స్ తర్వాత భారతీయుడు 3 ట్రైలర్ రిలీజ్ చేసి ఇండియన్ ఆడియెన్స్‌కు మంచి థ్రిల్‌ను పంచారు. ఈ ఇండియన్ 3 ట్రైలర్ ఎంతో ఆసక్తిగా సాగుతూ క్యూరియాసిటీ పెంచేసింది. అలాగే ఇందులో కమల్ హాసన్ సరికొత్త అవతార్‌లో కనిపించాడు. అంతేకాకుండా ఇండియన్ 3 చిత్రంలో చందమామ కాజల్ అగర్వాల్ ఉందని క్లారిటీ వచ్చేసింది.

ఇండియన్ 2 సినిమా స్టార్ అవుతోందనే వార్తలు వచ్చినప్పటి నుంచి మూవీలో కాజల్ అగర్వాల్ నటిస్తోందని టాక్ వచ్చింది. కానీ, పోస్టర్స్, ట్రైలర్‌లో ఎక్కడా కూడా కాజల్ కనిపించలేదు. ఆచార్య మూవీలాగే కొన్ని సీన్స్ చేసినప్పటికీ ఫైనల్‌గా తన సీన్స్ తీసేసారని టాక్ సైతం వచ్చింది. కానీ, తనపై తెరకెక్కించిన సన్నివేశాలు ఇండియన్ 3 మూవీలోనివి తాజాగా ట్రైలర్‌ను బట్టి అర్థమైంది.

అదిరిపోయే ఎంట్రీ

భారతీయుడు 3 ట్రైలర్‌లో కాజల్ అగర్వాల్ పోరాటయోధురాలిగా కనిపించింది. కాషాయ దుస్తులు వేసుకుని గుర్రంపై స్వారీ చేస్తూ అదిరిపోయే ఎంట్రీ ఇచ్చింది. అంతేకాకుండా కమల్ హాసన్, కాజల్ అగర్వాల్ మధ్య కత్తి యుద్ధానికి సంబంధించిన సీన్స్ చూపించారు. అందులో ఇద్దరూ ఒకరినొకరు తలపడ్డారు. అయితే అది రొమాంటిక్ యాక్షన్ సీన్ అని తెలుస్తోంది.

అంతేకాకుండా ఇండియన్ 3లో కాజల్ అగర్వాల్ యాక్షన్ సీన్స్ చేయడమే కాకుండా గ్లామర్‌గా కూడా కనిపించనుందని తెలుస్తోంది. అయితే, ఈ సినిమా కోసమే కాజల్ అగర్వాల్ గతంలో గుర్రపు స్వారీతోపాటు ఇతర మార్షల్ ఆర్ట్స్ విద్యలు నేర్చుకుందని అర్థం చేసుకోవచ్చు. ఇక ఆ ట్రైలర్‌లో ఇండియన్ 3 సినిమా మొత్తం ఎలా ఉండనుందో చూపించేశారు.

వీరశేఖరన్ సేనాపతి

భారతీయుడు 3 ట్రైలర్‌లో ప్రజలందరికీ ఒక లింక్ పంపుతాడు సేనాపతి. ఆ లింక్ ఓపెన్ చేయగానే సేనాపతి కనిపించి తనకోసం 5 నిమిషాలు కేటాయించమంటాడు. అనంతరం కార్గిల్ వార్, చైనా యుద్ధం, చైనీయుల ఆకృత్యాలతో చూపించారు. యుద్థం ఓడిపోతే ఎలాంటి పరిస్థితులు నెలకొంటాయో సేనాపతి చెబుతాడు. అప్పుడే వీరశేఖరన్ అనే స్వాతంత్ర్య సమరయోధుడి గురించి చూపిస్తారు.

అతనే వీరశేఖరన్ సేనాపతి అంటూ ఎలివేషన్ ఇస్తారు. గుర్రంపై స్వారీ చేస్తూ కమల్ హాసన్ మరో కొత్త గెటప్‌లో దర్శనం ఇస్తారు. ఆ తర్వాత యుద్ధభూమిలో కత్తి దూస్తూ గుర్రంపై ఇచ్చే కాజల్ ఎంట్రీ అదిరిపోయింది. ఇలా ఇండియిన్ 3పై ట్రైలర్‌తో అంచనాలు మరింతగా పెంచేశారు. కాగా, ఇండియన్ 3 మరో 6 నెలల్లో రిలీజ్ కానుందని తెలుస్తోంది.