India vs Pakistan World Cup 2023: ఆ పాకిస్థాన్ అభిమాని మళ్లీ వచ్చేస్తున్నాడు.. ఈసారి మన జడేజాతో యాడ్ షూటింగ్

India vs Pakistan World Cup 2023: ఇండియా, పాకిస్థాన్ ఏ ఐసీసీ ఈవెంట్లో తలపడినా.. మౌకా మౌకా అంటూ ఓ పాక్ అభిమాని టీవీల్లో సందడి చేయడం చూసే ఉంటారు. బ్రాడ్‌కాస్టర్ స్టార్ స్పోర్ట్స్ ఈ యాడ్ ను తెగ పాపులర్ చేసింది. ఐసీసీ ఈవెంట్లలో ఇండియాపై పాకిస్థాన్ కు చెత్త రికార్డు ఉండటంతో ఈసారైనా తమ టీమ్ గెలుస్తుందని ఆ పాకిస్థాన్ అభిమాని ఆశగా రావడం.. తర్వాత నిరాశ చెందడం ఈ యాడ్ లో మనం చూశాం.

ఇప్పటి వరకూ 2017 ఛాంపియన్స్ ట్రోఫీ ఫైనల్, 2021 టీ20 వరల్డ్ కప్ లలో మాత్రమే ఇండియాపై పాకిస్థాన్ గెలవగా.. మిగతా అన్ని సందర్భాల్లో టీమిండియాదే పైచేయి. ఈసారి స్వదేశంలో అది కూడా అహ్మదాబాద్ లోని ప్రపంచంలోనే అతి పెద్ద క్రికెట్ స్టేడియంలో వరల్డ్ కప్ 2023లో భాగంగా ఇండియాతో పాక్ తలపడనుంది. దీంతో ఆ పాక్ అభిమాని మళ్లీ రెడీ అవుతున్నాడు.

మౌకా మౌకా అంటున్న విశాల్ మల్హోత్రా

తాజాగా స్టార్ స్పోర్ట్స్ ఈ యాడ్ కు సంబంధించి ఓ టీజర్ రిలీజ్ చేసింది. అందులో మన టీమిండియా ఆల్ రౌండర్ రవీంద్ర జడేజా కూడా ఉండటం విశేషం. ఈ మధ్యే ఆసియా కప్ లో ఇండియా చేతుల్లో ఏకంగా 228 రన్స్ తేడాతో ఓడిన తర్వాత పాక్ మరోసారి వరల్డ్ కప్ లో తలపడుతోంది. దీంతో ఆ మౌకా మ్యాన్ ఆశగా తిరిగి వస్తున్నాడు. వరల్డ్ కప్ లో ఇండియాపై తమ టీమ్ ప్రతీకారం తీర్చుకుంటుందని అతడు భావిస్తున్నాడు.

ఆ పాక్ అభిమాని పాత్రలో కనిపించే వ్యక్తి పేరు విశాల్ మల్హోత్రా. అతడు జడేజాతో కలిసి చేసిన యాడ్ షూటింగ్ కు సంబంధించిన చిన్న వీడియో ఇప్పుడు వైరల్ అవుతోంది. అక్టోబర్ 14న ఈ రెండు టీమ్స్ తలపడనుండగా.. త్వరలోనే ఈ యాడ్ ను టెలికాస్ట్ చేయాలని స్టార్ స్పోర్ట్స్ భావిస్తోంది.

8 ఏళ్లుగా అలరిస్తున్న మౌకా మ్యాన్

తొలిసారి 2015 వన్డే వరల్డ్ కప్ సందర్బంగా ఈ మౌకా మౌకా యాడ్ ప్రారంభమైంది. ఆ వరల్డ్ కప్ గ్రూప్ మ్యాచ్ లో ఇండియా, పాకిస్థాన్ మ్యాచ్ కోసం రూపొందించిన ఈ యాడ్ కు మంచి రెస్పాన్స్ రావడంతో దానిని ప్రతిసారీ కొనసాగిస్తున్నారు. బబుల్‌రాప్ ఫిల్మ్స్ రూపొందించిన ఈ యాడ్ లో పాకిస్థాన్ అభిమానిగా విశాల్ మల్హోత్రా నటిస్తూ వస్తున్నాడు.

తాజా యాడ్ షూట్ లోనూ విశాల్ తనదైన హావభావాలతో అలరిస్తున్నాడు. అతనికితోడు జడేజా కూడా బౌలింగ్ చేస్తూ, గాల్లోకి డైవ్ చేస్తూ షూటింగ్ చేయడం ఈ వీడియోలో చూడొచ్చు. వన్డే వరల్డ్ కప్ లలో ఇండియా ఇప్పటి వరకూ ఎప్పుడూ పాక్ చేతుల్లో ఓడలేదు. 1992, 1996, 1999, 2003, 2011, 2015, 2019 వరల్డ్ కప్ లలో పాకిస్థాన్ ను చిత్తు చేసింది. 1996లో క్వార్టర్ ఫైనల్ కాగా.. 2011లో సెమీఫైనల్లో తలపడ్డాయి. మిగతావన్నీ లీగ్ మ్యాచ్ లే.