Rolls Royce Cullinan Series II : ఇది భారతదేశంలోనే అత్యంత లగ్జరీ ఎస్​యూవీ- ధర ఎంతో గెస్​ చేయండి..!

తన సూపర్ లగ్జరీ ఎస్​యూవీ కల్లినన్ సిరీస్ 2కి చెందిన అప్​డేటెడ్​ వర్షెన్​ని భారతదేశంలో అధికారికంగా లాంచ్ చేసింది రోల్స్ రాయిస్. కస్టమైజేషన్ ఆప్షన్లను జోడించడంతో రూ.10.5 కోట్ల ప్రారంభ ధరతో కల్లియన్ సిరీస్ 2ను ప్రవేశపెట్టింది ఈ దిగ్గజ లగ్జరీ వాహనాల తయారీ సంస్థ. భారతీయ లగ్జరీ పోకడలు, కస్టమర్ ప్రాధాన్యతల్లో వచ్చిన మార్పులకు ప్రతిస్పందనగా ఈ చర్య తీసుకున్నట్లు రోల్స్ రాయిస్ తెలిపింది.

ఎక్కువ మంది రోల్స్ రాయిస్ క్లయింట్లు పట్టణ కేంద్రాల్లో స్థిరపడటంతో, కల్లినన్ సిరీస్ 2 ఇప్పుడు యువ ప్రేక్షకులను సంతృప్తి పరిచేవిధంగా అప్​డేట్స్​ పొందింది. ఆధునిక నగరాల్లోని ప్రకాశవంతమైన స్కైస్కేపర్స్​ స్ఫూర్తితో డిజైన్ నవీకరణలను రూపొందించినట్లు తయారీదారు చెప్పింది. డ్యాష్​బోర్డు మీద 7వేల డాట్స్​ వస్తాయి. వీటిని వివిధ యాంగిల్స్​లో లేజర్​ ఎచ్​ చేయడం జరిగింది. సెక్యూరిటీ గ్లాస్​ డిజైన్​కి మరింత డెప్త్​ చేరినట్టు అయ్యింది.

రోల్స్ రాయిస్ కల్లినన్ సిరీస్ 2: డిజిటల్ అప్​గ్రేడ్​..

కల్లినన్ సిరీస్ 2 ఇప్పుడు డ్యాష్​బోర్డు పై భాగంలో పిల్లర్-టు-పిల్లర్ గ్లాస్ ప్యానెల్​ని కలిగి ఉంది. ఇది రోల్స్ రాయిస్ సాధారణంగా దృష్టి సారించే భౌతిక హస్తకళతో పాటు డిజిటల్ హస్తకళను ప్రదర్శిస్తుంది.

ఇదీ చూడండి:- Hero Mavrick 440 Thunderwheels : స్టైలిష్​ హీరో మావ్రిక్​ 440 థండర్​వీల్స్​ లిమిటెడ్​ ఎడిషన్​ లాంచ్​..

డిజిటల్ అప్​గ్రేడ్స్​లో 18-స్పీకర్ల ఆడియో సిస్టమ్, వై-ఫై హాట్ స్పాట్ కనెక్షన్, ప్రతి స్క్రీన్ కోసం ఇండిపెండెంట్ స్ట్రీమింగ్ వంటి అప్షన్స్​ కూడా ఉన్నాయి. బ్లూటూత్ ద్వారా రియర్ సీట్ ఇన్ఫోటైన్మెంట్ సిస్టమ్​ని కనెక్ట్​ చేసే ఆప్షన్​ని కూడా ఇప్పుడు చేర్చారు. డ్రైవర్ డిస్​ప్లేలో మరింత మెరుగుపరిచారు.

రోల్స్ రాయిస్ కల్లినన్ సిరీస్ 2: బ్లాక్ బ్యాడ్జ్

రోల్స్ రాయిస్ ప్రొడక్ట్ లైనప్​లో అత్యంత డిమాండ్ ఉన్న మోడళ్లలో కల్లినన్ సిరీస్ 2 ఎస్​యూవీ ఒకటి. బ్లాక్ బ్యాడ్జ్ అనేది ఈ లగ్జరీ ఎస్​యూవీ బోల్డ్, స్పోర్టియర్ వెర్షన్. మరింత ప్రత్యేకంగా నిలవాలని భావించే కస్టమర్ల కోసం దీనిని సంస్థ రూపొందించింది.

రోల్స్ రాయిస్ కల్లినన్ సిరీస్ 2: ధర, లభ్యత..

రోల్స్ రాయిస్ కల్లినన్ సిరీస్ 2 భారతదేశంలో రూ .10.5 కోట్ల ఎక్స్-షోరూమ్ నుండి ప్రారంభమవుతుంది. బ్లాక్ బ్యాడ్జ్ కల్లినన్ సిరీస్ 2 ఎక్స్ షోరూమ్ ప్రారంభ ధర రూ.12.25 కోట్లు. భారతీయ వినియోగదారులకు మొదటి డెలివరీలు 2024 నాల్గొవ త్రైమాసికంలో ప్రారంభమవుతాయని దిగ్గజ ఆటోమొబైల్​ సంస్థ తెలిపింది. కొనుగోలుదారులు తమ కల్లినన్ సిరీస్ 2, బ్లాక్ బ్యాడ్జ్ వెర్షన్లను దేశంలోని రెండు షోరూమ్​లు - రోల్స్ రాయిస్ మోటార్ కార్స్ చెన్నై, దిల్లీలో పర్సనలైజ్ చేసుకునే అవకాశం ఉంది.