Gukesh tax pay : ‘గెలిచింది గుకేశ్​ కాదు- ఆర్థికశాఖ!’- చెస్​ ఛాంపియన్​ ప్రైజ్​మనీలో భారీగా ‘ట్యాక్స్​’ కోత..

అతి చిన్న వయస్సులోనే ప్రపంచ చెస్​ ఛాంపియన్​గా నిలిచి చరిత్ర సృష్టించాడు గుకేశ్​. చైనాకు చెందిన డింగ్​ లైరెన్​ని ఓడించి, 18ఏళ్లకే ఈ ఘనత సాధించాడు. గుకేశ్​ గెలుపుతో దేశవ్యాప్తంగా సంబరాలు జరిగాయి. ఈ చెస్​ ప్లేయర్​పై యావత్​ భారత దేశం ప్రశంసల వర్షం కురిపించింది. అయితే, కొందరు మాత్రం గుకేశ్​ ప్రైజ్​మనీపై పడే ‘ట్యాక్స్​’ విషయాన్ని లేవనెత్తారు! ఈ వ్యవహారం ఇప్పుడు సోషల్​ మీడియాలో వైరల్​గా మారింది. తన ప్రైజ్​మనీ, టోర్నీలో సంపాదించిన డబ్బుపై గుకేశ్​ కట్టాల్సిన ట్యాక్స్​ అమౌంట్​ని చూసి నెటిజన్లు షాక్​ అవుతున్నారు. ఆర్థికమంత్రి నిర్మలా సీతారామన్​పై తీవ్రస్థాయిలో విమర్శలు చేస్తున్నారు. ఇంతకీ.. గుకేశ్​ ఎంత ట్యాక్స్​ కట్టాలంటే..

గుకేశ్​ కట్టాల్సి ట్యాక్స్​ ఎంతంటే..

వరల్డ్​ చెస్​ ఛాంపియన్​షిప్​లో గెలిచిన గుకేశ్​ ప్రైజ్​మనీ దాదాపు రూ. 11కోట్లు. ఎఫ్​ఐడీఈ రూల్స్​ ప్రకారం టోర్నమెంట్​లోని ప్రతి గెలుపుతో ప్లేయర్​ రూ. 1.68కోట్లు సంపాదిస్తాడు. మిగిలినది టాప్​ 2 ఫైనలిస్ట్​ల మధ్య చెరిసగం అవుతుంది. ఇక ఈ ఛాంపియన్​షిప్​ పూర్తి ప్రైజ్​మనీ రూ. 20.75కోట్లు. గుకేశ్​ 3 గేమ్స్​లో గెలిచాడు. అంటే రూ. 5.04 కోట్లు సంపాదించాడు. మిగిలిన 1.5మిలియన్​ డాలర్స్​ని గుకేశ్​తో పాటు లైరెన్​కి సగం సగం పంచారు. మొత్తం మీద చూసుకుంటే వరల్డ్​ చెస్​ ఛాంపియన్​షిప్​ ద్వారా గుకేశ్​ సుమారు 1.35 మిలియన్​ డాలర్లు సంపాదించాడు. ఇది సుమారు రూ. 11కోట్లు.

వరల్డ్​ చెస్​ ఛాంపియన్​షిప్​లో గెలుపుతో గుకేశ్​ నెట్​ వర్త్​ రూ. 21కోట్లకు చెరిందని సమాచారం. ఇక గుకేశ్​ 30శాతం ట్యాక్స్​ స్లాబ్​ కిందకి వస్తాడు. లెక్కలేస్తే.. తన ప్రైజ్​మనీలో గుకేశ్​ సుమారు రూ. 3కోట్ల వరకు పన్నులు కట్టాల్సి ఉంటుంది. అయితే సర్​ఛార్జ్​తో పాటు ఇతర ఛార్జీలను కలుపుకుంటే ఇది రూ. 4.67 కోట్ల వరకు వెళుతుందని పలు నివేదికలు చెబుతున్నాయి.

'రూ. 11కోట్ల ప్రైజ్​మనీపై రూ. 4.67 కోట్ల ట్యాక్స్​' వార్త సోషల్​ మీడియాలో వైరల్​గా మారింది. నెటిజన్లు ఆర్థిక మంత్రి నిర్మలా సీతారామన్​తో పాటు ఫైనాన్స్​ మినిస్ట్రీపై తీవ్రస్థాయిలో అసంతృప్తి వ్యక్తం చేస్తున్నారు. గెలిచింది గుకేశ్​ కాదు- ఆర్థికశాఖ అని సెటైర్లు వేస్తున్నారు.

"రూ. 11కోట్ల వరల్డ్​ చెస్​ ఛాంపియన్​షిప్​ ప్రైజ్​మనీలో రూ. 5కోట్లు సంపాదించిన భారత ట్యాక్స్​ డిపార్ట్​మెంట్​కి నా శుభాకాంక్షలు," అని ఓ నెటిజన్​ కామెంట్​ చేయగా.. "గెలుపులోనూ ఇన్​కమ్​ట్యాక్స్​కి వాటా ఉండేలా చూసుకుంటారు. దేశంలో ట్యాక్స్​ డిపార్ట్​మెంట్​ ఎప్పుడూ ఒకడుగు ముందే ఉంటుంది," అని ఇంకొకరు అన్నారు.

"ఇది టీడీఎస్​! అంటే.. ట్యాక్స్​ డిడెక్టడ్​ బై సీతారామన్​" అని మరొకరు చెప్పుకొచ్చారు. “ఆదాయపు పన్నుశాఖ.. ఆట ఆడకుండానే గెలిచింది,” అని ఇంకొకరు అన్నారు.

దేశంలో ఉన్న అధిక పన్నులపై గత కొంతకాలంగా విపరీతంగా చర్చలు జరుగుతున్న సమయంలో గుకేశ్​ ప్రైజ్​మనీపై కట్టాల్సిన ట్యాక్స్​ వార్త వెలుగులోకి వచ్చింది. ట్యాక్స్​లను తగ్గించాలని డిమాండ్​లు వెల్లువెత్తుతున్నాయి.