Citroen Basalt SUV : సిట్రోయెన్​ కొత్త ఎస్​యూవీ ఫొటోలు లీక్​.. స్టైలిష్​గా!

Citroen Basalt price in India : ఇండియా ఆటోమొబైల్​ మార్కెట్​పై ఫోకస్​ చేసిన ఫ్రెంచ్ ఆటో దిగ్గజం సిట్రోయెన్.. ఇప్పటికే సీ5 ఎయిర్​క్రాస్, సీ3 ఎయిర్​క్రాస్ మోడల్స్​ని లాంచ్​ చేసింది. సిట్రోయెన్​ సీ3కి కూడా మంచి డిమాండ్​ ఉంది. ఇక ఇప్పుడు.. మరో కొత్త ఎస్​యూవీని ఇండియాలో లాంచ్​ చేసేందుకు ప్లాన్​ చేస్తోంది. దాని పేరు సిట్రోయెన్​ బసాల్ట్! ఈ కొత్త ఎస్​యూవీకి సంబంధించిన టెస్ట్​ డ్రైవ్​.. భారతీయ రోడ్లపై అనేకసార్లు జరిగింది. తాజాగా తమిళనాడులోని తిరువళ్లూరులో తీసిన స్పై షాట్స్​తో.. బసాల్ట్ ఎస్​యూవీ పూర్తిగా కనిపించేసింది. ఈ ఎస్​యూవీ ఎంట్రీ లెవల్ వేరియంట్ చిత్రాలు.. ప్రస్తుతం సోషల్​ మీడియాలో చక్కర్లు కొడుతున్నాయి. బసాల్ట్ ఎస్​యూవీ ఈ ఏడాది జూన్​లో భారత్ లో అరంగేట్రం చేయనుందని సమాచారం. ఈ నేపథ్యంలో ఈ కొత్త ఎస్​యూవీపై ఇప్పటివరకు ఉన్న విశేషాలను ఇక్కడ చూద్దాము..

సిట్రోయెన్​ బసాల్ట్​ ఎస్​యూవీ..

తాజా స్పై షాట్స్​లో సిట్రోయెన్​ బసాల్ట్​ ఎస్​యూవీ వెనుక భాగం కనిపిస్తోంది. ఈ ఎస్​యూవీలో కూపే-స్టైల్ డిజైన్​ను బూట్​తో కలిసే స్లోయింగ్ రూఫ్ లైన్ కనిపిస్తోంది. ఏ పిల్లర్ నుంచి సీ పిల్లర్ వరకు విండో చుట్టూ బ్లాక్ హైలైట్స్​తో పెద్ద వీల్ ఆర్చ్​లు, బ్లాక్ ఓఆర్​వీఎమ్​లు, వెనుక భాగంలో బ్లాక్ బంపర్లు, టెయిల్ లైట్లు ఉన్నాయి. అయితే, ఈ ఎస్​యూవీ లాంచ్ అయినప్పుడు 15 ఇంచ్​ లేదా 16 ఇంచ్​ అల్లాయ్ వీల్ సెట్ ఎంపికతో వస్తుందని భావిస్తున్నారు.

Citroen Basalt SUV price in India : సిట్రోయెన్ బసాల్ట్ ఎస్​యూవీ మునుపటి స్పై షాట్లు ఇప్పటికే వాహనం.. ముందు భాగం ఎలా ఉంటుందో వెల్లడించాయి. బసాల్ట్ విజన్ కాన్సెప్ట్ ఆధారంగా రూపొందించిన ఈ ఎస్​యూవీలో ముందు భాగంలో ప్రొజెక్టర్ ఎల్ఈడీ ప్రొజెక్టర్ హెడ్ లైట్లు, డీఆర్ఎల్స్​, ఫాగ్ ల్యాంప్స్​, బాడీ కలర్ బంపర్లు, సిట్రోయెన్ లోగోతో స్లిమ్ గ్రిల్ ఉంటాయి.

ఫీచర్ల విషయానికొస్తే బసాల్ట్ ఎస్​యూవీలో 10.25 ఇంచ్​ టచ్ స్క్రీన్ ఇన్ఫోటైన్​మెంట్ సిస్టమ్, వైయర్​ లెస్ స్మార్ట్​ఫోన్ కనెక్టివిటీ, డిజిటల్ ఇన్​స్ట్రుమెంట్ క్లస్టర్, ఆటోమేటిక్ క్లైమేట్ కంట్రోల్, ఆటో డిమ్మింగ్ ఐఆర్ వీఎం, రెయిన్ సెన్సింగ్ వైపర్స్, కీలెస్ ఎంట్రీ, పుష్ బటన్ స్టార్ట్, వెంటిలేటెడ్ సీట్లు వంటి ఫీచర్లు ఉన్నాయి. సిట్రోయెన్ అన్ని వేరియంట్లలో ఆరు ఎయిర్ బ్యాగులు, ఐసోఫిక్స్ పాయింట్లు, సీట్ బెల్ట్ రిమైండర్స్ వంటి ఫీచర్లని స్టాండర్డ్​గా ఇచ్చి బసాల్ట్ ఎస్​యూవీలో సేఫ్టీకి పెద్ద పీట వేస్తుందని సమాచారం.

బసాల్ట్ ఎస్​యూవీ ఇంజిన్​ గురించి సిట్రోయెన్ ఇంకా ఎలాంటి వివరాలను వెల్లడించలేదు. ఏదేమైనా, ఫ్రెంచ్ కార్ల తయారీ సంస్థ ఎస్​ యువిని దాని 1.2-లీటర్ టర్బో పెట్రోల్ మోటార్​తో సిద్ధం చేస్తుందని మార్కెట్​లో అంచనాలు ఉన్నాయి. ఇది సీ3 ఎయిర్​క్రాస్ ఎస్​యూవీలో కూడా ఉంది. ఈ ఇంజిన్ 6-స్పీడ్ మేన్యువల్, ఆటోమేటిక్ ట్రాన్స్​మిషన్​ గేర్​బాక్స్​ ఆప్షన్స్​లో వచ్చే అవకాశం ఉంది. ఈ ఇంజిన్ గరిష్టంగా 109బీహెచ్​పీ పవర్, 205ఎన్ఎమ్ గరిష్ట టార్క్​ను ఉత్పత్తి చేస్తుంది.

సిట్రోయెన్​ బసాల్ట్​ ఎస్​యూవీ ధర ఎంత?

Citroen Basalt Coupe SUV : సిట్రోయెన్ బసాల్ట్ ఎస్​యూవీ.. ఈ ఏడాది చివర్లో విడుదల కానున్న టాటా కర్వ్​ ఎస్​యూవీకి పోటీగా నిలిచే అవకాశం ఉంది. ఈ ఎస్​యూవీ ధర సుమారు రూ .12 లక్షల (ఎక్స్-షోరూమ్) నుంచి ప్రారంభమయ్యే అవకాశం ఉంది.