Sri Lanka crisis | శ్రీలంక ఆర్థిక వ్యవస్థ అత్యంత దారుణంగా ఉందని ఆ దేశ ప్రధానమంత్రి రణిల్ విక్రమసింఘే వెల్లడించారు. దేశంలో పెట్రోల్ కొరత ఉందని వివరించారు. రానున్న నెలలు.. దేశ చరిత్రలోనే అత్యంత కఠినంగా ఉంటాయని పేర్కొన్నారు.

శ్రీలంక సంక్షోభం మధ్య.. ఇటీవలే ప్రధానమంత్రి పదవిని చేపట్టిన విక్రమసింఘే.. దేశ పరిస్థితులపై.. ప్రజలనుద్దేశించి తొలిసారిగా సోమవారం మాట్లాడారు. ఈ క్రమంలో పలు కీలక వ్యాఖ్యలు చేశారు.

"నాకు అబద్ధాలు చెప్పాలని లేదు. దేశంలో పరిస్థితులు దారుణంగా ఉన్నాయి. దేశాన్ని రక్షించుకునేందుకు.. మనం కొన్ని నెలల పాటు త్యాగాలు చేయాల్సి ఉంటుంది. ఇక దేశంలో పెట్రోల్ కొరత ఉంది. ప్రస్తుతం ఒక రోజుకు సరిపడా స్టాక్ మాత్రమే దేశంలో ఉంది. ఇండియన్ క్రెడిట్ లైన్లో భాగంగా పెట్రోల్, డీజిల్తో కూడిన రెండు ఓడలు శ్రీలంకకు రావాల్సి ఉంది. మరోవైపు 14 అత్యవసర ఔషధాల కొరత కూడా ఉంది. స్వల్పకాలంలో ద్రవ్యోల్బణం మరింత పెరుగుతుంది. ప్రజలు మరికొంత కాలం కష్టపడక తప్పదు. పైగా.. శ్రీలంక రెవెన్యు అంచనాలపై గత ప్రభుత్వం తప్పుడు సమాచారం అందించింది. ఈ ఏడాది బడ్జెట్లో.. 2.3ట్రిలియన్ ఎస్ఎల్ఆర్ ఉన్నట్టు చూపించింది. వాస్తవానికి ఇది 1.6ట్రిలియన్ ఎస్ఎల్ఆర్ మాత్రమే," అని విక్రమసింఘే వెల్లడించారు.

శ్రీలంక సంక్షోభానికి పరిష్కారాన్ని అన్వేషించేందుకు.. అన్ని రాజకీయ పార్టీలతో కూడిన ఓ నేషనల్ కౌన్సిల్ను ఏర్పాటు చేయాలని ప్రతిపాదించారు విక్రమసింఘే. తీవ్ర నష్టాల్లో ఉన్న శ్రీలంక విమానయాన సంస్థను ప్రైవేటీకరించాలని కూడా ఆయన ప్రతిపాదించారు. నగదును ప్రింట్ చేసి ప్రభుత్వ ఉద్యోగులకు జీతాలు ఇవ్వాల్సిన పరిస్థితి ఏర్పడిందని ఆయన అన్నారు.