Vivo Y35 । వివో నుంచి మరో కొత్త ఫోన్.. ధరపై క్యాష్‌బ్యాక్ ఆఫర్ కూడా ఉంది!

మొబైల్ మేకర్ Vivo కొన్ని రోజుల క్రితం ఇండోనేషయన్ మార్కెట్లో లాంచ్ చేసిన తమ Vivo Y35 స్మార్ట్‌ఫోన్‌ను తాజాగా భారత మార్కెట్లోనూ విడుదల చేసింది. ఇది కంపెనీ నుంచి Y-సిరీస్‌లో విడుదలైన మధ్య-శ్రేణి ఫోన్. ఇది ఏకైక స్టోరేజ్ వేరియంట్‌లో అందుబాటులో ఉంటుంది. అయితే అగేట్ బ్లాక్, డాన్ గోల్డ్ అనే రెండు కలర్ ఆప్షన్‌లలో లభిస్తోంది.

భారత మార్కెట్లో సరికొత్త Vivo Y35 స్మార్ట్‌ఫోన్‌ ధరను రూ. 18,499/- గా నిర్ణయించారు. లాంచ్ ఆఫర్‌లో భాగంగా సెప్టెంబర్ 30, 2022 లోపు ఈ ఫోన్ కొనుగోలు చేసే కస్టమర్లకు వివో కంపెనీ క్యాష్‌బ్యాక్‌ను ప్రకటించింది. ICICI బ్యాంక్, SBI, Kotak అలాగే OneCardని ఉపయోగించి చేసే ప్రతీ Vivo Y35 కొనుగోలుపై రూ. 1,000 క్యాష్‌బ్యాక్‌ను అందిస్తోంది. ఆసక్తి కలవారు వివో ఇండియా ఇ-స్టోర్‌లో, అలాగే ఇతర రిటైల్ స్టోర్‌లలో ఈ ఫోన్‌ను కొనుగోలు చేయవచ్చు.

మరి రూ. 18 వేల ధరకు ఈ ఫోన్ కొనుగోలు చేయడం బెటర్ ఆప్షన్ అవుతుందా? ఇందులో ఎలాంటి ఫీచర్లు, స్పెసిఫికేషన్లు ఉన్నాయి ఇక్కడ చెక్ చేయండి.

Vivo Y35 స్మార్ట్‌ఫోన్‌ ఫీచర్లు, స్పెసిఫికేషన్లు

• 90Hz రిఫ్రెష్ రేట్ కలిగిన 6.58 అంగుళాల FHD+ LCD డిస్‌ప్లే
• 8GB RAM, 128GB ఇంటర్నల్ స్టోరేజ్ సామర్థ్యం
• Qualcomm స్నాప్‌డ్రాగన్ 680 ప్రాసెసర్
• వెనకవైపు 50MP+2MP+2MP కెమెరా, ముందు భాగంలో 16 MP సెల్ఫీ షూటర్‌
• ఆండ్రాయిడ్ 12 ఆపరేటింగ్ సిస్టమ్
• 5000 mAh బ్యాటరీ సామర్థ్యం, 44W ఛార్జర్

మరిన్ని అంశాలను పరిశీలిస్తే ఈ ఫోన్ ఫ్రాస్టెడ్ యాంటీ గ్లేర్ (AG) కోటింగ్‌తో వస్తుంది, ఇది సాఫ్ట్ సున్నితమైన టచ్‌ని అందిస్తుంది. గీతలు, వేలిముద్రలు పడకుండా నిరోధకతను కలిగిఉంటుంది. ఇది ఫేస్ వేక్ ఫీచర్‌తో , సైడ్-మౌంటెడ్ ఫింగర్ ప్రింట్ స్కానర్‌ను కలిగి ఉంది. ఈ ఫోన్ స్టోరేజ్ సామర్థ్యాన్ని 1TB వరకు విస్తరించుకోవచ్చు. ర్యామ్ కూడా పెంచుకోవచ్చు. ఫీచర్ల పరంగా ఈ ఫోన్ Realme 9 5G, Xiaomi Redmi Note 11 Pro, Vivo T1 వంటి స్మార్ట్‌ఫోన్‌లతో పోటీపడుతుంది. అయితే Vivo Y35 ఫోన్ 5Gకి సపోర్ట్ చేయదు. కాబట్టి ఈ ధరలో మరిన్ని మంచి మోడల్స్ మార్కెట్లో అందుబాటులో ఉన్నాయి.