Reheating: టీ మళ్లీ వేడి చేసి తాగుతున్నారా? ఈ మూడింటిని వేడిచేసి తిన్నారంటే విపరీత నష్టం

కొన్ని ఆహారాలు, పానీయాలు వేడివేడిగా ఆస్వాదించడానికి మనం మళ్లీ మళ్లీ వేడి చేస్తాం. వేడిగా ఉన్న ఆహార పదార్థాలను తినడం ఆరోగ్యకరమే. అయితే ఒకసారి వండాక,  చల్లారాక మళ్లీ వేడి చేయడం మాత్రం అనేక నష్టాలను తెస్తుంది. వైరల్ రీల్‌లో, న్యూట్రిషనిస్ట్ కిరణ్ కుక్రేజా టీ, నూనె, పాలకూర.. ఈ మూడింటిని ఎందుకు తిరిగి వేడి చేయకూడదో వివరించారు. వీటిని మళ్లీ వేడి చేయడం వల్ల అనేక వ్యాధులు వస్తాయని ఆమె తెలిపారు. అలా వేడి చేసి తింటే ఏం జరుగుతుందో చూడండి.

టీని తిరిగి వేడి చేయడం:

పోషకాలను కోల్పోవడం:

టీని తిరిగి వేడి చేయడం వల్ల ముఖ్యంగా గ్రీన్ టీలో కాటెచిన్స్ వంటి కొన్ని ముఖ్యమైన యాంటీఆక్సిడెంట్లు క్షీణిస్తాయి.

టానిన్లు ఏర్పడటం:

టీని తిరిగి వేడి చేసినప్పుడు, టానిన్ల సాంద్రత పెరుగుతుంది. దీంతో టీ మరింత చేదుగా మారుతుంది. టానిన్లు హానికరం కానప్పటికీ, అధికంగా తీసుకోవడం ఇనుము వంటి కొన్ని పోషకాల శోషణకు ఆటంకం కలిగిస్తుంది.

సూక్ష్మజీవుల పెరుగుదల:

టీని తిరిగి వేడి చేయడానికి ముందు గది ఉష్ణోగ్రత వద్ద ఎక్కువసేపు ఉంచితే, అది బ్యాక్టీరియా వృద్ధికి కేంద్రంగా మారుతుంది. ముఖ్యంగా అందులో పాలు లేదా చక్కెర ఉంటే మరింత హానికరం.

నూనెను తిరిగి వేడి చేయడం:

హానికరమైన సమ్మేళనాలు:

నూనెను, ముఖ్యంగా పాలీ అన్ శ్యాచ్యురేటెడ్ కొవ్వులు (కూరగాయల నూనెలు వంటివి) అధికంగా ఉన్న ఆహారాలను తిరిగి వేడి చేయడం వల్ల ఆల్డిహైడ్లు, ట్రాన్స్ ఫ్యాట్స్ వంటి హానికరమైన సమ్మేళనాలు ఏర్పడతాయి. ఈ సమ్మేళనాలు క్యాన్సర్, గుండె జబ్బులు, ఇతర దీర్ఘకాలిక వ్యాధుల ప్రమాదాన్ని పెంచుతాయి.

ఆక్సీకరణ:

నూనెల్ని పదేపదే వేడి చేసినప్పుడు ఆక్సీకరణకు గురవుతాయి. ఇది ఫ్రీ రాడికల్స్ ఏర్పడటానికి దారితీస్తుంది. ఇవి శరీరంలో ఆరోగ్యకరమైన కణాలను దెబ్బతీస్తాయి. ఇన్ఫ్లమేషన్ లాంటి వివిధ రకాల వ్యాధులకు దోహదం చేస్తుంది.

పాలకూరను తిరిగి వేడి చేయడం:

నైట్రేట్లు:

పాలకూరలో నైట్రేట్లు పుష్కలంగా ఉంటాయి. వీటిని తిరిగి వేడి చేసినప్పుడు నైట్రైట్లుగా మారతాయి. ముఖ్యంగా ఎక్కువ సేపు నిల్వ చేసిన తర్వాత నైట్రేట్లు కాస్త నైట్రోసమైన్లుగా మారవచ్చు. వీటిలో కొన్నింటిని క్యాన్సర్ కారకాలుగా చెబుతారు.

పోషకాల నష్టం:

పాలకూరను తిరిగి వేడి చేయడం వల్ల కొన్ని విటమిన్లు (విటమిన్ సి, ఫోలేట్ లాంటివి) వంటి సున్నితమైన పోషకాలను కోల్పోవచ్చు.

"నూనెలు, టీ, పాలకూరను తిరిగి వేడి చేయడం వల్ల హానికరమైన సమ్మేళనాలు ఏర్పడతాయి. పోషకాల నష్టం జరుగుతుంది. వీలైనప్పుడల్లా వీటిని తిరిగి వేడి చేయకుండా ఉండటం మంచిది. అలాగే నూనె కోసం స్మోకింగ్ పాయింట్ ఎక్కువగా ఉన్న నూనెల్ని ఎంచుకోవాలి. అప్పుడే తయారుచేసిన టీ తాగడం. బచ్చలికూరను ఎక్కువసేపు నిల్వ చేశాక వేడి చేయక పోవడం వంటి జాగ్రత్తలు తీసుకోవడం సాధారణంగా సురక్షితం" అని డాక్టర్ రితుజా చెప్పారు.