Imli spoon: నోరూరించే చింతపండు చెంచాలు గుర్తున్నాయా? ఇంట్లోనే ఇలా చేయొచ్చు

చిన్నప్పటి జ్ఞాపకాల్లో చింతపండు చెంచాలు తప్పకుండా ఉంటాయి. షాపుకు వెళ్లి వీటిని కొనుక్కొని తినడం గుర్తుండే ఉంటుంది. అయితే ఈ మధ్య అవి కొందామన్న తక్కువే కనిపిస్తున్నాయి. ఇంట్లోనే మీరు వీటిని చేసుకోవచ్చు. చాలా సింపుల్ రెసిపీ. మీ పిల్లలకూ దీన్ని పరిచయం చేయొచ్చు.

చింతపండు చెంచాల తయారీకి కావాల్సినవి:

1 కప్పు లేదా వంద గ్రాముల చింతపండు (గింజలు లేనిది)

పావు కప్పు ఖర్జూరాలు (ఆప్షనల్)

1 కప్పు వేడి నీళ్లు

కప్పు బెల్లం

1 టీస్పూన్ జీలకర్ర

2 ఎండుమిర్చి

అర టీస్పూన్ ఉప్పు

చింతపండు చెంచాల తయారీ విధానం:

1. ముందుగా ఒక ప్యాన్ లో నూనె లేకుండా జీలకర్ర, ఎండుమిర్చి వేసి వేయించుకోవాలి. కాస్త రంగు మారగానే తీసి చల్లార్చుకోవాలి.
2. వీటిని మిక్సీలో వేసుకుని మెత్తగా పట్టుకోవాలి.
3. ఇప్పుడు పెద్ద బౌల్ లో చింతపండు తీసుకుని అందులో ఖర్జూరాలు, వేడినీళ్లు మునిగేదాకా పోసుకోవాలి.
4. అరగంట నానిన తర్వాత చింతపండు, ఖర్జూరం తీసుకుని మిక్సీ పట్టుకోవాలి. అందులోనే ఇందాక మిక్సీ పట్టుకున్న ఎండుమిర్చి, జీలకర్ర కూడా వేసుకోవాలి.
5. ఇప్పుడు ప్యాన్ లో బెల్లం వేసుకుని కాస్త కరిగిపోయాక అందులో మిక్సీ పట్టుకున్న చింతపండు మిశ్రమం వేసుకోవాలి.
6. మీడియం మంట మీద ఉడికించుకోవాలి. అంతా కలిసి పోయి కాసేపటికే చిక్కటి చింతపండు ముద్ద తయారవుతుంది. ఈ ముద్దను కాస్త చెంచా మీద తీసుకుంటే కింద పడిపోకూడదు. అలాంటి చిక్కదనం రావాలి.
7. అలా అవ్వగానే స్టవ్ కట్టేసుకోండి. ఐస్ క్రీం పుల్లలకు ఈ ముద్దను చేతిలో తీసుకుని కాస్త ఒత్తుకోండి. మీద కవర్ చుట్టేస్తే చింతపండు చెంచాలు రెడీ.
8. ఈ చెంచాలు లేకపోతే చిన్న క్యాండీల్లాగా చేతితోనే గుండ్రటి బాల్స్ చేసుకుని కవర్లో చుట్టినా సరిపోతుంది.