Crime Thriller Web Series: ఓటీటీలోకి ఈ వారమే త్రిష క్రైమ్ థ్రిల్లర్ వెబ్ సిరీస్.. రెండు హాలీవుడ్ హిట్ సినిమాలు కూడా..

Crime Thriller Web Series: ఈ వారం నెట్‌ఫ్లిక్స్, ప్రైమ్ వీడియో, హాట్‌స్టార్, సోనీలివ్, జియో సినిమాల్లాంటి ఓటీటీల్లోకి కొన్ని ఇంట్రెస్టింగ్ సినిమాలు, వెబ్ సిరీస్, షోలు రాబోతున్నాయి. అందులో త్రిష నటించిన తొలి క్రైమ్ థ్రిల్లర్ వెబ్ సిరీస్ బృందా కూడా ఉంది. దీంతోపాటు రాజమౌళిపై నెట్‌ఫ్లిక్స్ రూపొందించిన డాక్యుమెంటరీ, రెండు సూపర్ హిట్ హాలీవుడ్ సినిమాలూ వస్తున్నాయి.

ఈవారం ఓటీటీ రిలీజెస్

బృందా వెబ్ సిరీస్ - సోనీలివ్

ఒకప్పటి టాలీవుడ్ స్టార్ హీరోయిన్ త్రిష కృష్ణన్ నటించిన తొలి క్రైమ్ థ్రిల్లర్ వెబ్ సిరీస్ బృందా ఈ వారమే ఓటీటీలో అడుగు పెడుతోంది. ఈ తెలుగు సిరీస్ వచ్చే శుక్రవారం (ఆగస్ట్ 2) నుంచి సోనీలివ్ ఓటీటీలో స్ట్రీమింగ్ కానుంది. ఈ సిరీస్ లో త్రిష ఓ ఎస్సై పాత్ర పోషించడం విశేషం. ఓ మర్డర్ కేసు ఆమె జీవితాన్ని ఎలా మలుపు తిప్పిందన్నది ఇందులో చూడొచ్చు. ఈ మధ్యే రిలీజైన ట్రైలర్ ఆసక్తిని పెంచింది.

మాడర్న్ మాస్టర్స్: ఎస్ఎస్ రాజమౌళి - నెట్‌ఫ్లిక్స్

నెట్‌ఫ్లిక్స్ టాలీవుడ్ దర్శక ధీరుడు ఎస్ఎస్ రాజమౌళిపై రూపొందించిన డాక్యుమెంటరీ కూడా ఈ వారమే ప్రేక్షకుల ముందుకు వస్తోంది. ఇది కూడా వచ్చే శుక్రవారం (ఆగస్ట్ 2) నుంచే స్ట్రీమింగ్ కానుంది. టాలీవుడ్ నుంచి ప్రపంచ స్థాయికి జక్కన్న ఎదిగిన తీరును ఈ డాక్యుమెంటరీ కళ్లకు కట్టనుంది. ఇందులోనే పలువురు టాలీవుడ్, బాలీవుడ్ ప్రముఖులు రాజమౌళి గురించి చెప్పే అభిప్రాయాలను చూడొచ్చు.

సత్యభామ - ఈటీవీ విన్

కాజల్ అగర్వాల్ నటించిన లేటెస్ట్ మూవీ సత్యభామ కూడా ఈ వారం ఓటీటీలోకి వస్తోంది. గురువారం (ఆగస్ట్ 1) నుంచి ఈ మూవీ ఈటీవీ విన్ ఓటీటీలో స్ట్రీమింగ్ కానున్నట్లు ఆ ఓటీటీ వెల్లడించింది.

డియర్ నాన్న - ఈటీవీ విన్

మరో ఇంట్రెస్టింగ్ తెలుగు మూవీ డియర్ నాన్న కూడా ఇదే ఈటీవీ విన్ ఓటీటీలో గురువారం (ఆగస్ట్ 1) నుంచి స్ట్రీమింగ్ కానుంది. ఈ విషయాన్ని సోమవారం (జులై 29) తమ సోషల్ మీడియా ద్వారా వెల్లడించింది.

డ్యూన్: పార్ట్ 2 - జియో సినిమా

సూపర్ హిట్ హాలీవుడ్ మూవీ డ్యూన్ పార్ట్ 2 ఈ వారం ఓటీటీలోకి అడుగు పెడుతోంది. శుక్రవారం (ఆగస్ట్ 2) నుంచి ఈ సినిమాను జియో సినిమాలో చూడొచ్చు.

కింగ్‌‌డమ్ ఆఫ్ ద ప్లానెట్ ఆఫ్ ద ఏప్స్ - హాట్‌స్టార్

మరో హాలీవుడ్ సూపర్ హిట్ మూవీ కింగ్‌డమ్ ఆఫ్ ద ప్లానెట్ ఆఫ్ ద ఏప్స్ మూవీ కూడా ఆగస్ట్ 2 నుంచి డిస్నీ ప్లస్ హాట్‌స్టార్ లో స్ట్రీమింగ్ కాబోతోంది.

ఇవే కాకుండా హాట్‌స్టార్ లో బుధవారం (జులై 31) నుంచి కొరియన్ వెబ్ సిరీస్ నో వే ఔట్, ప్రైమ్ వీడియోలో సోమవారం (జులై 29) నుంచి ఇంగ్లిష్ వెబ్ సిరీస్ ది లార్డ్ ఆఫ్ ద రింగ్స్: రింగ్స్ ఆఫ్ పవర్ సీజన్ 2 స్ట్రీమింగ్ కానున్నాయి.