RC 16: రామ్‍చరణ్ సినిమాలో కన్నడ సూపర్ స్టార్: స్వయంగా వెల్లడించిన నటుడు

RC16: మెగా పవర్ స్టార్ రామ్‍చరణ్ తేజ్ ‘ఆర్ఆర్ఆర్’ సినిమాతో గ్లోబల్ స్టార్ అయ్యారు. వరల్డ్ వైడ్‍గా పాపులారిటీ దక్కించుకున్నారు.. దీంతో ఆయన తదుపరి చేసే సినిమాలపై క్రేజ్ మాములుగా లేదు. ప్రస్తుతం తమిళ స్టార్ డైరెక్టర్ శంకర్ దర్శకత్వంలో గేమ్ ఛేంజర్ సినిమా చేస్తున్నారు రామ్‍చరణ్. అలాగే, ఉప్పెన ఫేమ్ డైరెక్టర్ బుచ్చిబాబుతోనూ ఆయన ఓ మూవీ చేయనున్నారు. ఇది చెర్రీకి 16వ సినిమా(RC16)గా ఉంది. తాజాగా, రామ్‍చరణ్ - బుచ్చిబాబు మూవీపై ఓ సమాచారం వెల్లడైంది.

రామ్‍చరణ్, బుచ్చిబాబు కాంబినేషన్‍లో రూపొందనున్న సినిమాలో కన్నడ సూపర్ స్టార్, సీనియర్ హీరో శివ రాజ్‍కుమార్ కీలకపాత్ర పోషించనున్నారు. ఈ విషయాన్ని ఆయనే వెల్లడించారు. తాజాగా, కెప్టెన్ మిల్లర్ సినిమా కోసం ఓ ఇంటర్వ్యూలో పాల్గొన్న శివన్న ఈ విషయాన్ని చెప్పారు.

తన తదుపరి ప్రాజెక్టులు ఏంటని ఎదురైన ప్రశ్నకు శివ రాజ్‍కుమార్ స్పందించారు. ఈ క్రమంలో రామ్‍చరణ్ చిత్రంలో చేయనున్నానని తెలిపారు. ఉప్పెన డైరెక్టర్‌ది ఈ మూవీ అని తెలిపారు. దీంతో, ఆర్‌సీ16లో శివ రాజ్‍కుమార్ కనిపించనున్నారు.

కన్నడలో సూపర్ స్టార్ అయిన శివ రాజ్‍కుమార్.. రజినీకాంత్ హీరోగా నటించిన తమిళ మూవీ జైలర్‌లో గతేడాది క్యామియో రోల్ చేశారు. జైలర్‌లో శివన్న క్యామియోకు సూపర్ రెస్పాన్స్ వచ్చింది. ఆ చిత్రానికి చాలా ప్లస్ అయింది. అలాగే, ధనుష్ హీరోగా నటించిన కెప్టెన్ మిల్లర్ చిత్రంలోనూ శివ రాజ్‍కుమార్ కీలకపాత్ర చేశారు. ఈ చిత్రం జనవరి 12న విడుదల కానుంది.

శివరాజ్ కుమార్ హీరోగా నటించిన కన్నడ మూవీ ఘోస్ట్ గతేడాది అక్టోబర్‌లో రిలీజ్ అయింది. పవర్ ప్యాక్డ్ యాక్షన్ డ్రామాగా వచ్చిన ఆ చిత్రం కన్నడలో సూపర్ హిట్ అయింది. అభిమానులను మెప్పించింది. ప్రస్తుతం కన్నడలో మరో రెడు చిత్రాలు చేస్తున్నారు శివన్న. అలాగే, రామ్‍చరణ్ - బుచ్చిబాబు కాంబోలో రానున్న మూవీలోనూ నచించనున్నట్టు ఇప్పుడు ఆయన స్పష్టం చేశారు.

ఆర్‌సీ 16 సినిమా స్పోర్ట్స్ డ్రామాగా తెరకెక్కనుందని తెలుస్తోంది. భారీ బడ్జెట్‍తో ఈ సినిమా తెరకెక్కనుంది. ఆస్కార్ అవార్డు విన్నర్ ఏఆర్ రహమాన్ ఈ చిత్రానికి సంగీతం అందించనున్నారు. గేమ్ ఛేంజర్ షూటింగ్ తర్వాత రామ్‍చరణ్ - బుచ్చిబాబు సినిమా సెట్స్‌పైకి వెళ్లనుంది.

గేమ్ ఛేంజర్ పరిస్థితి ఇది..

రామ్‍చరణ్ హీరోగా నటిస్తున్న గేమ్ ఛేంజర్ సినిమా షూటింగ్ ఆలస్యంగా సాగుతోంది. డైరెక్టర్ శంకర్.. ఇండియన్-2 చిత్రం కూడా చేస్తుండటంతో గేమ్ ఛేంజర్‌కు చాలాసార్లు విరామాలు వచ్చాయి. అయితే, ఇండియన్-2 చిత్రీకరణ ఇటీవలే అయిపోవడంతో.. గేమ్ ఛేంజర్ షూటింగ్ ఇప్పటి నుంచి పరుగులు పెట్టే అవకాశం ఉంది. ఈ చిత్రంలో కియారా అడ్వానీ హీరోయిన్‍గా నటిస్తుండగా.. అంజలి, ఎస్‍జే సూర్య, జయరామ్, సునీల్, శ్రీకాంత్, సముద్రఖని కీలకపాత్రలు పోషిస్తున్నారు.

గేమ్ ఛేంజర్ చిత్రాన్ని ఈ ఏడాది సెప్టెంబర్‌లో రిలీజ్ చేసేందుకు ప్లాన్ చేస్తున్నామని దిల్‍రాజు ఇటీవల చెప్పారు. శ్రీ వెంకటేశ్వర క్రియేషన్స్ బ్యానర్‌పై ఆయన ఈ మూవీని నిర్మిస్తున్నారు. పొలిటికల్ యాక్షన్ థ్రిల్లర్‌గా రూపొందుతున్న గేమ్ ఛేంజర్ మూవీకి థమన్ సంగీతం అందిస్తున్నారు.