Ponniyin Selvan Advance Bookings: పొన్నియిన్‌ సెల్వన్‌ అడ్వాన్స్‌ బుకింగ్స్‌.. విక్రమ్‌ రికార్డు బ్రేక్‌

Ponniyin Selvan Advance Bookings: పాన్‌ ఇండియా స్టార్‌ డైరెక్టర్‌ మణిరత్నం కలల ప్రాజెక్ట్‌ పొన్నియిన్‌ సెల్వన్‌. ఈ మూవీ ఫస్ట్‌ పార్ట్‌ పీఎస్‌ 1 సెప్టెంబర్ 30న రిలీజ్‌ కాబోతోంది. అయితే ఈ సినిమా అడ్వాన్స్‌ బుకింగ్స్‌ ఆదివారం (సెప్టెంబర్‌ 25) ప్రారంభమయ్యాయి. తొలి రోజే వీటికి ఆడియెన్స్‌ నుంచి మంచి రెస్పాన్స్‌ వచ్చింది.

ముఖ్యంగా ఈ ఏడాది సంచలనం రేపిన కమల్‌ హాసన్‌ విక్రమ్‌ మూవీ రికార్డును కూడా ఈ పొన్నియిన్‌ సెల్వన్‌ బ్రేక్‌ చేసింది. కోలీవుడ్‌లో ఈ ఏడాది అత్యధిక అడ్వాన్స్‌ బుకింగ్స్‌ అందుకున్న మూడో మూవీగా నిలిచింది. బీస్ట్‌, వలీమై తర్వాత పొన్నియిన్‌ సెల్వన్‌ నిలవడం విశేషం. ఈ ప్రతిష్టాత్మక ప్రాజెక్ట్‌పై కొన్నేళ్లుగా పని చేస్తున్న మణిరత్నమే శుభాకరన్‌తో కలిసి సినిమాను నిర్మించాడు.

అడ్వాన్స్‌ బుకింగ్స్‌ రికార్డు

పొన్నియిన్‌ సెల్వన్‌ మూవీకి తమిళనాడులో ఆదివారమే అడ్వాన్స్‌ బుకింగ్స్‌ ప్రారంభమయ్యాయి. తొలి రోజే రాష్ట్రవ్యాప్తంగా 2.5 లక్షల టికెట్లు అమ్ముడుపోవడం విశేషం. ఈ అడ్వాన్స్ బుకింగ్స్‌ ద్వారా రూ.4.5 కోట్లు వసూలు చేసింది. 225 థియేటర్లలో మాత్రమే ఈ అడ్వాన్స్‌ బుకింగ్స్‌ ప్రారంభమయ్యాయి. ఇక మిగతా థియేటర్లు కూడా మొదలుపెడితే ఈ బుకింగ్స్‌ మరింత భారీగా ఉండనున్నాయి.

ఈ ఏడాది విక్రమ్‌ మూవీ ఎంత సంచలనం సృష్టించిందో తెలుసు కదా. అలాంటి మూవీ అడ్వాన్స్‌ బుకింగ్స్‌ను కూడా పొన్నియిన్‌ సెల్వన్‌ బీట్‌ చేసింది. ఈ పీరియడ్‌ డ్రామా మూవీ భారీ తారాగణంతో వస్తోంది. విక్రమ్‌, కార్తీ, ఐశ్వర్య రాయ్‌, త్రిష, జయం రవిలాంటి వాళ్లు పొన్నియిన్‌ సెల్వన్‌లో నటించారు. ఈ సినిమా ప్రమోషన్లలో వీళ్లంతా బిజీగా ఉన్నారు. బెంగళూరు, ముంబైలతోపాటు దేశవ్యాప్తంగా ప్రధాన నగరాల్లో సినిమా ప్రమోషన్లను చాలా గ్రాండ్‌గా నిర్వహిస్తున్నారు.

పొన్నియిన్ సెల్వన్ గురించి..

ఈ భారీ ప్రాజెక్టును 1950లో ధారావాహికంగా వచ్చిన కల్కికి చెందిన నవల ఆధారంగా రూపొందిస్తున్నారు. పొన్నియన్ సెల్వన్(కావేరి నది కుమారుడు) చోళుల రారాజైన రాజ రాజ చోళకు చెందిందిగా చెబుతున్నారు. ఈ సినిమాను లైకా ప్రొడక్షన్స్, మద్రాస్ టాకీస్ సంయుక్తంగా నిర్మిస్తున్నాయి. తమిళంతో పాటు హిందీ, తెలుగు, కన్నడ, మలయాళ భాషల్లో ఈ చిత్రాన్ని డబ్ చేస్తున్నారు.

సెప్టెంబరు 30 ప్రపంచ వ్యాప్తంగా ప్రేక్షకుల ముందుకు రానుంది. పొన్నియిన్‌ సెల్వన్‌ ప్రాజెక్ట్‌లో ఇది తొలి పార్ట్‌ మాత్రమే. అయితే ఈ సినిమాను ఐమ్యాక్స్‌ ఫార్మాట్‌లోనూ రిలీజ్‌ చేస్తున్నారు. ఇలా ఐమ్యాక్స్‌లో రిలీజ్‌ కాబోతున్న తొలి తమిళ సినిమాగా పొన్నియిన్‌ సెల్వన్‌ నిలవనుంది.