Korean Dramas OTT: ఒకే రోజు ఓటీటీల్లోకి వచ్చిన రెండు కొరియన్ వెబ్ సిరీస్, ఒక సినిమా.. తెలుగులోనూ స్ట్రీమింగ్

Korean Dramas OTT: కొరియన్ డ్రామాస్ ఒకే రోజు మూడు అందుబాటులోకి వచ్చాయి. అవి కూడా నాలుగు వేర్వేరు ఓటీటీ ప్లాట్‌ఫామ్స్ లో కావడం విశేషం. డిఫరెంట్ జానర్ లతో వచ్చిన వీటిని నెట్‌ఫ్లిక్స్, ప్రైమ్ వీడియో, ఎంఎక్స్ ప్లేయర్, వికీలాంటి ఓటీటీల్లో చూడొచ్చు. కే-డ్రామాస్ ఇష్టపడే ఇక్కడి ప్రేక్షకుల కోసం ఓ సినిమా తెలుగులోనూ స్ట్రీమింగ్ అవుతోంది.

ఓటీటీ కొరియన్ డ్రామాస్

ఓటీటీలోకి మంగళవారం (నవంబర్ 19) వచ్చిన రియాల్టీ సిరీస్ జాంబీవెర్స్ (Zombieverse). ఇదొక హారర్ కామెడీ వెబ్ సిరీస్. సీజన్ 2 ఇప్పుడు ప్రేక్షకుల ముందుకు వచ్చింది. ఈసారి మరింత ఫన్నీగా వస్తోందంటూ అనౌన్స్ చేశారు. నెట్‌ఫ్లిక్స్ లో ఈ కొత్త సీజన్ స్ట్రీమింగ్ అవుతోంది.

కొరియన్ తోపాటు ఇంగ్లిష్ ఆడియోలోనూ ఈ సిరీస్ అందుబాటులో ఉంది. కొరియాలో జాంబీ వైరస్ వ్యాపించడం, దాని బారిన ఎవరు పడ్డారు? ఎవరు తప్పించుకున్నారన్న స్టోరీతో ఈ వెబ్ సిరీస్ వచ్చింది. తొలి సీజన్ ప్రేక్షకులను బాగా ఆకట్టుకుంది. నెట్‌ఫ్లిక్స్ లోనే కొరియన్, ఇంగ్లిష్ భాషల్లో తొలి సీజన్ ఉంది. ఒకవేళ చూసి ఉండకపోతే.. రెండో సీజన్ చూసే ముందు తొలి సీజన్ చూసేయండి.

ఇక ఈరోజు (నవంబర్ 19) ఓటీటీలోకి వచ్చిన మరో కొరియన్ మూవీ యు కాల్ ఇట్ ప్యాషన్. నిజానికి 2015లో సౌత్ కొరియాలో వచ్చిన సినిమా ఇది. ఇప్పుడు ప్రైమ్ వీడియో, ఎంఎక్స్ ప్లేయర్ ద్వారా ఇక్కడి ప్రేక్షకుల ముందుకు వచ్చింది. ఇదొక థ్రిల్లర్ మూవీ. ఓ నటుడి లైంగిక వేధింపుల కేసును ఇన్వెస్టిగేట్ చేసే జర్నలిస్టు చుట్టూ తిరిగే మూవీ ఇది. ఇప్పటికే వికీ ఓటీటీలో ఉండగా.. ఇప్పుడు ప్రైమ్ వీడియో, ఎంఎక్స్ ప్లేయర్ లోకీ వచ్చింది. ఈ సినిమాను కొరియన్ తోపాటు తెలుగు, హిందీ, తమిళం భాషల్లోనూ చూడొచ్చు.

పెరోల్ ఎగ్జామినర్ లీ అనే మరో థ్రిల్లర్ వెబ్ సిరీస్ కూడా మంగళవారమే (నవంబర్ 19) ప్రేక్షకుల ముందుకు వచ్చింది. వికీ ఓటీటీలో ఈ సిరీస్ స్ట్రీమింగ్ అవుతోంది. ఎంతో ప్రమాదకర ఖైదీలు పెరోల్ పై సమాజంలోకి రాకుండా అడ్డుకునే ఓ అడ్వొకేట్ చుట్టూ తిరిగే కథే ఈ పెరోల్ ఎగ్జామినర్ లీ. ప్రతి సోమ, మంగళ వారాల్లో కొత్త ఎపిసోడ్లు అందుబాటులోకి వస్తాయి.