OMG 2 Release Date: ఓఎంజీ2 రిలీజ్ డేట్ ఇదే.. రివీల్ చేసిన అక్షయ్ కుమార్

OMG 2 Release Date: తెలుగులో వెంకటేశ్, పవర్ స్టార్ పవన్ కల్యాణ్ నటించిన గోపాల గోపాల మూవీ గుర్తుందా? ఈ సినిమా హిందీలో 2012లో వచ్చిన ఓఎంజీ: ఓ మై గాడ్ కు రీమేక్. ఇప్పుడా ఓఎంజీకి 11 ఏళ్ల తర్వాత సీక్వెల్ రాబోతోంది. ఈ మూవీ పేరు ఓఎంజీ2. బాలీవుడ్ స్టార్ నటుడు అక్షయ్ కుమార్, పంకజ్ త్రిపాఠీ, యామీ గౌతమ్ నటించిన ఈ మూవీ రిలీజ్ డేట్ ను శుక్రవారం (జూన్ 9) అనౌన్స్ చేశారు.

ఉమేష్ శుక్లా డైరెక్ట్ చేసిన ఈ మూవీ ఇండిపెండెన్స్ డే సందర్భంగా ఆగస్ట్ 11న ప్రేక్షకుల ముందుకు రాబోతోంది. ఈ విషయాన్ని వెల్లడిస్తూ అక్షయ్ కుమార్ ఓ ఇంట్రెస్టింగ్ ఫొటోను కూడా షేర్ చేశాడు. అగస్త అనే టైటిల్ తో పరమ శివుని రూపంలో ఉన్న ఫొటో అది. ఈ సీక్వెల్ లో అక్షయ్ కుమార్ తప్ప మిగతా వాళ్లంతా కొత్త వాళ్లే.

2012లో వచ్చిన ఓఎంజీలో పరేష్ రావల్, అక్షయ్ కుమార్ నటించారు. తెలుగులో వచ్చిన గోపాల గోపాల మూవీలో పరేష్ రావల్ పాత్రలో వెంకటేశ్, అక్షయ్ కుమార్ పాత్రలో పవన్ కల్యాణ్ నటించిన విషయం తెలిసింది. ఇక ఓఎంజీ 2 విషయానికి వస్తే.. ఈ సినిమాకు ఇండిపెండెన్స్ డే సమయంలో గట్టి పోటీయే ఉంది. అదే ఆగస్ట్ 11న హిందీలో రణ్‌బీర్ కపూర్ యానిమల్, సన్నీ దేవల్ నటించిన గదర్ 2 కూడా రిలీజ్ కానున్నాయి.

మూడు సినిమాలు ఒకే రోజు ఉండటంతో ఏ మూవీ అయినా వెనక్కి తగ్గుతుందా లేదా అనేది చూడాలి. ఓ మై గాడ్ మూవీకి అప్పట్లో మంచి రెస్పాన్స్ వచ్చింది. దేవుడి చర్య వల్ల నష్టపోయిన ఓ సామాన్యుడు.. ఆ దేవుడిపైనే కోర్టులో కేసు వేసి గెలవడం అనే కొత్త కాన్సెప్ట్ ప్రేక్షకులకు బాగా నచ్చింది. నిజానికి ఈ ఓఎంజీ2 మూవీ కొవిడ్ కంటే ముందే మొదలైంది.

అయితే అనుకున్న సమయం కంటే షూటింగ్ చాలా ఆలస్యం కావడంతో చివరికి ఈ సినిమాను థియేటర్లలో కాకుండా నేరుగా ఓటీటీలోనే రిలీజ్ చేయాలని భావించారు. కానీ మనసు మార్చుకొని ఇండిపెండెన్స్ డే సందర్భంగా థియేటర్లలోకే తీసుకురావాలని నిర్ణయించారు. భారతదేశ విద్యా వ్యవస్థ చుట్టూ ఈ ఓఎంజీ2 కథ తిరగనున్నట్లు తెలుస్తోంది.