Naga Chaitanya Sukumar NC24: విరూపాక్ష డైరెక్టర్‌తో నాగ చైతన్య మిథికల్ థ్రిల్లర్.. నిర్మాతగా పుష్ప 2 డైరెక్టర్ సుకుమార్!

Naga Chaitanya Karthik Dandu NC24 Movie: ప్రతిష్టాత్మక, భారీ చిత్రాలను తెలుగు ప్రేక్షకులకు అందిస్తున్న సంస్థ శ్రీ వెంకటేశ్వర సినీ చిత్ర (SVCC) సంస్థ మరో భారీ ప్రాజెక్ట్‌ను, ఆసక్తికరమైన చిత్రాన్ని నిర్మిస్తున్నట్లుగా ప్రకటించింది. ఈ చిత్రాన్ని మరో ప్రముఖ నిర్మాణ సంస్థ సుకుమార్‌ రైటింగ్స్‌ అసోసియేషన్‌తో నిర్మాణం చేయనుంది ఎస్వీసీసీ సంస్థ.

విమర్శకుల ప్రశంసలు

ఎస్వీసీసీ, సుకుమార్ రైటింగ్స్ సంస్థలు కలిసి సంయుక్తంగా సాయి దుర్గ తేజ్‌, సంయుక్త మీనన్‌లతో కలిసి విరూపాక్ష సినిమాను తెరకెక్కించిన విషయం తెలిసిందే. కార్తీక్‌ దండు దర్శకత్వంలో రూపొందిన ఈ మూవీ బ్లాక్‌బస్టర్‌ హిట్ కొట్టింది. మిస్టికల్‌ థ్రిల్లర్‌‌గా వచ్చిన 'విరూపాక్ష' తెలుగు రాష్ట్రాల్లో సాలిడ్ హిట్‌గా నిలిచింది. ఈ చిత్రం బాక్సాఫీస్‌ దగ్గర సంచలనం సృష్టించడమే కాకుండా విమర్శకుల ప్రశంసలు కూడా అందుకుంది.

మరో ఆకర్షణ

ఇప్పుడు 'విరూపాక్ష' చిత్రంతో దర్శకుడిగా తన ప్రతిభను చాటి చెప్పిన కార్తీక్‌ దండు దర్శకత్వంలోనే ఈ తాజా చిత్రాన్ని భారీ చిత్రాల మేకర్‌ ప్రముఖ బీవీఎస్‌ఎన్‌ ప్రసాద్‌ నిర్మిస్తున్నారు. ఈ చిత్రానికి బ్రిలియంట్‌ దర్శకుడు సుకుమార్‌ కూడా ఒక ప్రొడ్యూసర్‌గా ఉండటం ఈ సినిమాకు మరో ఆకర్షణ.

పోస్టర్ రిలీజ్

అయితే, ఈ సినిమాలో వైవిధ్యమైన చిత్రాలతో ప్రామిసింగ్‌ కథానాయకుడిగా పేరున్న యువ సామ్రాట్‌ అక్కినేని నాగ చైతన్య హీరోగా నటిస్తున్నారు. శనివారం (నవంబర్ 23) నాగ చైతన్య పుట్టినరోజు సందర్భంగా ఆసక్తికరమైన ఫస్ట్ లుక్ పోస్టర్‌ను కూడా విడుదల చేశారు. నాగ చైతన్య సినీ కెరీర్‌లో ఎన్‌సీ24 మూవీగా వస్తోన్న ఈ సినిమా పోస్టర్ ఆకట్టుకుంది.

భారీ బడ్జెట్‌తో

ఈ పోస్టర్‌లో ఒక అద్భుతమైన కన్ను ప్రతీకతో పాటు, రాక్ క్లైంబింగ్ టూల్స్‌తో ఓ పర్వతంపై నిలబడి ఉన్న నాగ చైతన్య కనిపించారు. ఇది ప్రేక్షకులలో భారీ ఆసక్తిని రేకెత్తించింది. "NC24" అనే వర్కింగ్‌ టైటిల్‌తో, ఈ చిత్రం డిసెంబరులో షూటింగ్ ప్రారంభం కానుంది. భారీ బడ్జెట్‌తో, అత్యున్నత ప్రొడక్షన్ విలువలతో ఈ చిత్రాన్ని నిర్మించనున్నారు.

అద్భుతమైన విజువల్స్

కార్తీక్ దండు ఈ ప్రాజెక్ట్ కోసం అత్యుత్తమ సాంకేతిక నిపుణులను ఎంపిక చేసుకున్నారు. ప్రత్యేకంగా, ఈ చిత్రానికి అధిక స్థాయిలో సీజీ వర్క్ ఉండనుందట. ఇది ప్రేక్షకులకు అద్భుతమైన విజువల్‌ అనుభూతిని అందించేందుకు సహాయపడుతుంది. శ్యామ్‌ దత్‌ ఐఎస్‌సీ సినిమాటోగ్రఫీ, నవీన్ నూలి ఎడిటింగ్‌ బాధ్యతలు స్వీకరించారు.

మిథికల్ థ్రిల్లర్‌గా

అలాగే, విరూపాక్ష చిత్రానికి అద్భుతమైన సెట్స్ రూపొందించిన ఆర్ట్ డైరెక్టర్ శ్రీ నాగేంద్ర కూడా ఈ చిత్రంలో భాగమవుతున్నారు. కాంతారా, విరూపాక్ష సినిమాలతో ఆకట్టుకున్న మ్యూజిక్ డైరెక్టర్ అజనీష్ లోక్‌నాథ్ ఈ మిథికల్ థ్రిల్లర్‌కు సంగీతం అందించనున్నారు. అయితే, ఈ చిత్రంలోని నటీనటుల వివరాలు, ఇతర సమాచారాన్ని త్వరలో ప్రకటించనున్నారు.

బుజ్జి తల్లి సాంగ్ రిలీజ్

కాగా నాగ చైతన్య తండేల్ మూవీ కూడా చేస్తున్న విషయం తెలిసిందే. చందూ మొండేటి దర్శకత్వం వహించిన ఈ సినిమా నుంచి ఇటీవల బుజ్జి తల్లి పాటను రిలీజ్ చశారు. దేవి శ్రీ ప్రసాద్ సంగీతం అందిస్తున్న తండేల్ మూవీలో హీరోయిన్‌గా సాయి పల్లవి నటిస్తోంది.