Meenakshi Chaudhary: లక్కీ భాస్కర్ హిట్‌తో మంచి ఛాన్స్ కొట్టేసిన మీనాక్షి చౌదరి, నెక్ట్స్ మూవీ ఎవరితోనంటే?
Lucky Baskhar Movie: లక్కీ భాస్కర్ సినిమా తర్వాత మీనాక్షి చౌదరికి ఓ క్రేజీ ప్రాజెక్ట్‌లో ఛాన్స్ దొరికింది. మట్కా సినిమా ఫెయిలైనా.. ఈ అమ్మడిపై ఆ మూవీ ప్రభావం పడలేదు.
లక్కీ భాస్కర్ సినిమాతో సాలిడ్ హిట్‌ను ఖాతాలో వేసుకున్న హీరోయిన్ మీనాక్షి చౌదరి.. ఒక క్రేజీ ప్రాజెక్ట్‌లో ఛాన్స్ దక్కించుకుంది. దుల్కర్ సల్మాన్ హీరోగా చేసిన లక్కీ భాస్కర్ మూవీ ఇటీవల దీపావళికి విడుదలై.. రూ.100 కోట్లకి పైగా వసూళ్లని రాబట్టిన విషయం తెలిసిందే.
మీనాక్షి చౌదరిపై పడని మట్కా ప్రభావం
లక్కీ భాస్కర్ హిట్‌ను ఎంజాయ్ చేసేలోపే.. మీనాక్షి చౌదరికి మట్కా సినిమా రూపంలో డిజాస్టర్ ఎదురైంది. వరుణ్‌తేజ్‌తో జంటగా నటించిన మట్కా మూవీ నవంబరు 14న విడుదలై.. బాక్సాఫీస్ వద్ద చతికిలపడింది. దాంతో మీనాక్షి చౌదరికి మళ్లీ కష్టాలు తప్పవనే కామెంట్స్ వినిపించాయి.
ప్రస్తుతం మీనాక్షి చౌదరి తెలుగులో రెండు సినిమాలు చేస్తోంది. ఇందులో ఒకటి వెంకటేశ్‌తో ‘సంక్రాంతికి వస్తున్నాం’కాగా.. మరొకటి విశ్వక్ సేన్‌తో కలిసి నటించిన ‘మెకానిక్ రాకీ’. ఈ మెకానిక్ రాకీ మూవీ నవంబరు 22న థియేటర్లలోకి రాబోతోంది.
నాగచైతన్యతో నెక్ట్స్ మూవీ
మీనాక్షి చౌదరి నెక్ట్స్ అక్కినేని నాగచైతన్యతో సినిమా చేయబోతున్నట్లు తాజాగా ఒక వార్త వెలుగులోకి వచ్చింది. కార్తీక్ వర్మ దండు దర్శకత్వం వహించబోతున్న ఈ సినిమా వచ్చే ఏడాది సెట్స్‌పైకి వెళ్లనుండగా.. అక్కినేని నాగచైతన్యతో తొలిసారి మీనాక్షి చౌదరి జత కట్టబోతోంది. సాయి పల్లవి, నాగచైతన్య జంటగా నటించిన తండేల్ మూవీ వచ్చే ఏడాది ఫిబ్రవరిలో రిలీజ్‌కానున్న విషయం తెలిసిందే.
సుశాంత్‌తో మీనాక్షి చౌదరి పెళ్లి?
వాస్తవానికి గత వారం మీనాక్షి చౌదరి పెళ్లిపై కూడా రూమర్స్ వినిపించాయి. అక్కినేని ఫ్యామిలీకి చెందిన హీరో సుశాంత్‌ని ఆమె పెళ్లి చేసుకోబోతున్నట్లు జోరుగా ప్రచారం జరిగింది. ఈ ఇద్దరూ ‘ఇచ్చట వాహనములు నిలపరాదు’ సినిమాలో కలిసి నటించారు. అయితే.. తాము బెస్ట్ ఫ్రెండ్స్ అని ఆ రూమర్‌ని ఈ జంట కొట్టిపారేసింది.
లక్కీ భాస్కర్ ఓటీటీ
లక్కీ భాస్కర్ మూవీ ఓటీటీ రైట్స్‌ను నెట్‌ఫ్లిక్స్ సొంతం చేసుకోగా.. నవంబరు 30న స్ట్రీమింగ్‌కి ఉంచబోతున్నట్లు వార్తలు వస్తున్నాయి. అయితే.. ఇప్పటికీ థియేటర్లలో ఈ సినిమా నడుస్తుండటం.. మళ్లీ కలెక్షన్లు ఈ వారం పుంజుకోవడంతో డిసెంబరు తొలి వారానికి వాయిదా పడినా ఆశ్చర్యపోలేం.
