Guppedantha Manasu Serial: గుప్పెడంత మ‌న‌సు రీ టెలికాస్ట్ టైమింగ్స్ ఇవే - ఫ‌స్ట్ వీక్ షాకింగ్ టీఆర్‌పీ రేటింగ్‌!

Guppedantha Manasu Serial: గుప్పెడంత మ‌న‌సు ఫ్యాన్స్ కోసం సీరియ‌ల్‌ను రీ టెలికాస్ట్ చేస్తోంది స్టార్ మా ఛానెల్‌. వారంలో మూడు రోజులు గురువారం నుంచి శ‌నివారం వ‌ర‌కు ప్ర‌తిరోజు సాయంత్రం ఐదున్న‌ర గంట‌ల నుంచి ఆరు గంట‌ల వ‌ర‌కు ఈ సీరియ‌ల్ టెలికాస్ట్ అవుతోంది. అయితే రిపీట్ టెలికాస్ట్ ఎపిసోడ్స్‌కు ఆశించిన స్థాయిలో ఆద‌ర‌ణ ద‌క్క‌డం లేదు. ఫ‌స్ట్‌వీక్ టీఆర్‌పీ రేటింగ్స్‌లో గుప్పెడంత మ‌న‌సు 1.29 మాత్ర‌మే ద‌క్కించుకున్న‌ది.

అంచ‌నాల‌ను అందుకోలేక‌...

గుప్పెడంత మ‌న‌సు సీరియ‌ల్‌కు ఫాలోయింగ్‌ను దృష్టిలో పెట్టుకొని ఫ‌స్ట్‌వీక్‌లో భారీగానే టీఆర్‌పీ రేటింగ్ వ‌స్తుంద‌ని అనుకున్నారు. కానీ అంచ‌నాల‌కు సీరియ‌ల్ అందుకోలేక‌పోయింది.

టీఆర్‌పీలో టాప్‌...

గుప్పెడంత మ‌న‌సు సీరియ‌ల్ ఈ ఏడాది ఆగ‌స్ట్ 31తో ముగిసింది. 2020లో ప్రారంభ‌మైన ఈ సీరియ‌ల్ దాదాపు మూడున్న‌ర ఏళ్ల పాటు స్టార్ మా ఛానెల్‌లో టెలికాస్ట్ అయ్యింది. ఒకానొక‌ద‌శ‌లో టీఆర్‌పీ రేటింగ్‌లో టాప్ సీరియ‌ల్‌గా కొన‌సాగించింది.

సీరియ‌ల్‌లో రిషి, వ‌సుధార ల‌వ్‌స్టోరీ, వారి కెమిస్ట్రీ అభిమానుల‌ను ఆక‌ట్టుకున్న‌ది. జ‌గ‌తి, రిషి పాత్రల మధ్య త‌ల్లీకొడుకుల బాండింగ్‌ను హార్ట్ ట‌చింగ్‌గా ద‌ర్శ‌కుడు సీరియ‌ల్‌లో చూపించారు. అవ‌న్నీ సీరియ‌ల్‌ను టాప్‌లో నిల‌బెట్టాయి.

రిషి రీఎంట్రీ...

రిషి పాత్ర‌ను చేసిన ముఖేష్ గౌడ సీరియ‌ల్ నుంచి అర్ధాంత‌రంగా వైదొల‌గ‌డంతో సీరియ‌ల్ డౌన్‌ఫాల్ స్టార్ట‌య్యింది. ఆరేడు నెల‌ల బ్రేక్ త‌ర్వాత మాస్ క్యారెక్ట‌ర్‌తో అత‌డు రీఎంట్రీ ఇచ్చినా డ్రామా అంతగా పండ‌లేదు. దాంతో మేక‌ర్స్ సీరియ‌ల్‌కు ఎండ్ కార్డ్‌వేశారు.

గుప్పెడంత మ‌న‌సు సీరియ‌ల్‌కు సీక్వెల్ రానున్న‌ట్లు కొన్నాళ్లుగా వార్త‌లు వినిపిస్తోన్నాయి. రిషి, వ‌సుధార‌లుగా న‌టించిన ముఖేష్ గౌడ‌, ర‌క్షా గౌడ ప్ర‌ధాన పాత్ర‌ల్లో కొత్త క‌థ‌తో ఈ సీరియ‌ల్ రాబోతున్న‌ట్లు ప్ర‌చారం జ‌రుగుతోంది. గుప్పెడంత మ‌న‌సు సీరియ‌ల్‌లో ముఖేష్ గౌడ‌, ర‌క్షా గౌడ‌తో పాటు సాయికిర‌ణ్‌, జ్యోతిరాయ్‌, సురేష్‌బాబు కీల‌క పాత్ర‌లు పోషించారు.

రెండు సినిమాలు...

గుప్పెడంత మ‌న‌సు సీరియ‌ల్ ముఖేష్ గౌడ‌కు న‌టుడిగా మంచి పేరుతో పాటు సినిమా అవ‌కాశాల‌ను తెచ్చిపెట్టింది. ప్ర‌స్తుతం తెలుగులో రెండు సినిమాలు చేస్తున్నాడు. గీతా శంక‌రం అనే స్ట్రెయిట్ తెలుగు మూవీతో పాటు ప్రియ‌మైన నాన్న‌కు అనే టైటిల్‌తో బైలింగ్వ‌ల్ సినిమాలో హీరోగా న‌టిస్తోన్నాడు. ఈ రెండు సినిమాలు ప్ర‌స్తుతం షూటింగ్ ద‌శ‌లో ఉన్నాయి.

వ‌చ్చే ఏడాది ప్ర‌థ‌మార్థంలో గీతాశంక‌రం, ప్రియ‌మైన నాన్న‌కు సినిమాలు రిలీజ్ అవుతాయ‌ని ఇటీవ‌లే ముఖేష్ గౌడ ప్ర‌క‌టించాడు. మ‌రోవైపు ర‌క్షా గౌడ కూడా సినిమాల‌పై ఫోక‌స్ పెట్టిన‌ట్లు స‌మాచారం.