Gundeninda Gudigantalu Balu: గుండెనిండా గుడిగంట‌లు బాలు కొత్త సీరియ‌ల్ టైటిల్ ఇదే - లాంఛింగ్ డేట్‌, ఛానెల్ ఏదంటే?

Gundeninda Gudigantalu Balu: గుండెనిండా గుడిగంట‌లు సీరియ‌ల్‌తో తెలుగు ప్రేక్ష‌కుల‌కు చేరువ‌య్యాడు విష్ణుకాంత్. ఈ సీరియ‌ల్‌లో బాలుగా మాస్ క్యారెక్ట‌ర్‌లో విష్ణుకాంత్ క‌నిపిస్తోన్నారు. త‌న క‌ళ్ల ముందు అన్యాయం జ‌రిగితే స‌హించ‌ని మ‌న‌స్త‌త్వ‌మున్న యువ‌కుడిగా విష్ణుకాంత్ అద‌ర‌గొడుతోన్నారు. ఈ సీరియ‌ల్‌లో బాలు, మీనా జోడి, చిలిపి గొడ‌వ‌లు, కెమిస్ట్రీ అభిమానుల‌ను ఆక‌ట్టుకుంటోన్నాయి.

టీఆర్‌పీలో టాప్‌...

ప్ర‌స్తుతం స్టార్ మా ఛానెల్స్‌లో టీఆర్‌పీ రేటింగ్ ప‌రంగా గుండెనిండా గుడిగంట‌లు టాప్ త్రీ ప్లేస్‌లో ఉంది. అర్బ‌న్ ఏరియాలో బ్ర‌హ్మ‌ముడి సీరియ‌ల్‌ను దాటేసింది. బ్ర‌హ్మ‌ముడి, కార్తీక దీపం 2 సీరియ‌ల్స్‌కు పోటీ ఇస్తోంది.

మా ఇంటి దేవ‌త‌....

తాజాగా విష్ణుకాంత్ మ‌రో కొత్త సీరియ‌ల్‌తో త్వ‌ర‌లో తెలుగు ప్రేక్ష‌కుల ముందుకు రాబోతున్నాడు. ఈ సీరియ‌ల్‌కు మా ఇంటి దేవ‌త అనే టైటిల్‌ను ఫిక్స్ చేశారు. అక్టోబ‌ర్ 14 నుంచి జెమిని టీవీలో ఈ సీరియ‌ల్ టెలికాస్ట్ కాబోతోంది. మ‌ధ్యాహ్నం ఒక‌టిన్న‌ర నుంచి రెండు గంట‌ల వ‌ర‌కు ఈ మా ఇంటి దేవ‌త సీరియ‌ల్ టెలికాస్ట్ కానుంది. మా ఇంటి దేవ‌త సీరియ‌ల్‌లో విష్ణుకాంత్‌తో సాటు శిరీష, ఉష‌శ్రీ, హ‌రికృష్ణ కీల‌క పాత్ర‌లో క‌నిపించ‌బోతున్నారు.

మూడు సీరియ‌ల్స్‌...

ఫ్యామిలీ ఎమోష‌న్స్ క‌ల‌గ‌ల‌సిన ల‌వ్‌స్టోరీగా మా ఇంటి దేవ‌త‌ సీరియ‌ల్ తెర‌కెక్కుతోన్న‌ట్లు స‌మాచారం. అక్టోబ‌ర్ 14 నుంచి జెమిని టీవీలో మా ఇంటి దేవ‌త‌తో పాటు స్నేహంకోసం, అభినంద‌న సీరియ‌ల్స్ ప్రారంభంకానున్నాయి.

త‌మిళంలో లీడ్ రోల్‌...

గుండెనిండా గుడిగంట‌లు కంటే ముందు తెలుగులో ప‌లు టీవీ సీరియ‌ల్స్ చేశాడు విష్ణుకాంత్‌. సిప్పైకుల్ ముత్తు సీరియ‌ల్ అత‌డికి మంచి పేరు తెచ్చిపెట్టింది. ఒరు ఊర్ల ఒరు రాజ‌కుమారి, ఎండేండ్రుమ్ పున్నాగైతో పాటు మ‌రికొన్ని సీరియ‌ల్స్‌లో లీడ్ రోల్ చేశాడు. సిప్పైకుల్ ముత్తు న‌టిస్తోన్న స‌మ‌యంలోనే సీరియ‌ల్ హీరోయిన్ సంయుక్త‌తో ప్రేమ‌లో ప‌డ్డ విష్ణుకాంత్ ఆమెను పెళ్లి చేసుకున్నారు. కానీ మ‌న‌స్ప‌ర్థ‌ల‌తో కొన్ని ఏళ్ల‌లోనే విష్ణుకాంత్‌, సంయుక్త విడాకులు తీసుకున్నారు.

అర్ధాంత‌ర‌గా గుడ్‌బై

టీఆర్‌పీ రేటింగ్‌లో వెన‌క‌బ‌డ‌టంతో పాత సీరియ‌ల్స్‌కు ముగింపు ప‌లుకుతూ వ‌రుస‌గా కొత్త సీరియ‌ల్స్‌ను లాంఛ్ చేస్తోంది జెమిని టీవీ. ఇటీవ‌లే నువ్వే కావాలి, రాధ‌,మూడుముళ్లు సీరియ‌ల్స్ మొద‌ల‌య్యాయి. ఇందులో నువ్వే కావాలి సీరియ‌ల్‌కు ఫ‌స్ట్ వీక్ టీఆర్‌పీ రేటింగ్ బాగానే వ‌చ్చిన‌ట్లు తెలుస్తోంది.

నువ్వే కావాలి సీరియ‌ల్‌లో వాసంతి కృష్ణ‌న్ కీల‌క పాత్ర‌లో న‌టించ‌గా...రాధ సీరియ‌ల్‌లో కీర్తి భ‌ట్ హీరోయిన్‌గా క‌నిపిస్తోంది.

ఈ కొత్త సీరియ‌ల్స్ కోసం అర్ధాంగి, ఒంట‌రి గులాబీ, ఆ ఒక్క‌టి అడ‌క్కుతో పాటు మ‌రో రెండు సీరియ‌ల్స్‌ను అర్థాంత‌ర‌గా జెమిని టీవీ ముగించింది.