OTT: ఓటీటీలో సెంచరీ మార్క్ దాటేసిన ప్రియమణి సినిమా.. మరో భాషలో కూడా వచ్చేస్తోంది

Bhamakalapam 2: సీనియర్ నటి ప్రియమణి ప్రధాన పాత్ర పోషించిన కామెడీ హీస్ట్ థ్రిల్లర్ మూవీ ‘భామాకలాపం 2’ చిత్రం అంచనాలను నిలబెట్టుకుంది. నేరుగా ఓటీటీలోకి వచ్చిన ఈ చిత్రం భారీగా వ్యూస్ దక్కించుకుంటూ దూసుకెళుతోంది. 2022లో వచ్చిన భామాకలాపం మూవీకి మంచి ఆదరణ దక్కింది. దానికి సీక్వెల్‍గా ఇప్పుడు ఫిబ్రవరి 16న ఆహా ఓటీటీలోకి భామాకలాపం 2 చిత్రం వచ్చింది. మౌత్ టాక్ పాజిటివ్‍గా వస్తుండటంతో ఈ మూవీ దూసుకెళుతోంది.

భామాకలాపం 2 సినిమా సెంచరీ కొట్టిందంటూ ఆహా ఓటీటీ ప్లాట్‍ఫామ్ వెల్లడించింది. ఈ మూవీ 100 మిలియన్ స్ట్రీమింగ్ నిమిషాలను దాటేసిందని అధికారికంగా ప్రకటించింది. స్ట్రీమింగ్‍కు వచ్చిన వారంలోనే ఈ సెంచరీ మిలియన్ స్ట్రీమింగ్ మినిట్స్ మార్కును ఈ చిత్రం అధిగమించింది.

డేంజర్ హౌస్‍వైఫ్ అద్భుతమైన సెంచరీ చేసిందని ఆహా వెల్లడించింది. “బ్లాక్‍బాస్టర్ భామాకలాపం 2 సినిమా 100 మిలియన్‍లకు పైగా స్ట్రీమింగ్ నిమిషాలను దక్కించుకొని ఇంకా దూకుడుగా కొనసాగుతోంది” అని ఆహా ట్వీట్ చేసింది.

భామాకలాపం 2 చిత్రంలో అనుపమగా ప్రియమణి మరోసారి ఆకట్టుకున్నారు. ఆమె దగ్గర పని చేసే శిల్పగా శరణ్య ప్రదీప్ నటించారు. ఈ ఇద్దరి కాంబినేషన్లో వచ్చే సీన్లు, వారి యాక్టింగ్ ఈ చిత్రానికి హైలైట్లుగా నిలిచాయి. కోడి పుంజు ట్రోఫీ దోపిడీ చుట్టూ ఈ మూవీ సాగుతుంది. ఈ చిత్రానికి అభిమన్యు తాడిమేటి దర్శకత్వం వహించారు.

భామాకలాపం 2 చిత్రంలో ప్రియమణి, శరణ్య ప్రధాన పాత్రలు పోషించగా.. సీరత్ కపూర్, రఘు ముఖర్జీ, సుదీప్ వేద్, అనూజ్ గుర్వారా, చైతూ జొన్నలగడ్డ, రుద్ర ప్రతాప్ కీరోల్స్ చేశారు. ఈ మూవీకి ప్రశాంత్ ఆర్ విహారీ మ్యూజిక్ అందించారు.

భామాకలాపం 3 మూవీని కూడా తీసుకొస్తామని ఆహా ఇప్పటికే ప్రకటించింది. మంచి ఆదరణ లభిస్తుండటంతో భామాకలాపాన్ని ఫ్రాంచైజీలా కొనసాగించాలని భావిస్తోంది.

తమిళంలో కూడా..

భామాకలాపం 2 చిత్రం తెలుగులో సూపర్ ఆదరణ దక్కించుకోవడంతో తమిళంలోనూ అందుబాటులోకి తెస్తోంది ఆహా. ఫిబ్రవరి 23వ తేదీన ఆహా తమిళ్ ప్లాట్‍ఫామ్‍లో భామాకలాపం 2ను రిలీజ్ చేయనుంది. ఆ విషయాన్ని ఆహా అధికారికంగా ప్రకటించింది.

భామాకలాపం 2 కథ

అనుపమ (ప్రియమణి) కొత్త ఇంట్లోకి వెళ్లి యూట్యూబ్ ద్వారా వచ్చిన డబ్బుతో ఓ హోటల్ పెడతారు. శిల్ప (శరణ్య ప్రదీప్)ను హోటల్‍లో తనతో పని చేసేందుకు పిలుస్తారు. మరోవైపు వారు ఓ వంటల ప్రోగ్రామ్ కోసం సిద్ధమవుతుంటారు. అంతా సవ్యంగా సాగుతుందనుకున్న తరుణంలో అనుకోకుండా ఓ వ్యక్తిని పోలీసులకు పట్టిస్తారు అనుపమ. ఆ తర్వాత అనుపమ, శిల్పకు చిక్కులు ఎదురవుతాయి. వారి హోటల్‍లో ఓ శవం కనిపిస్తుంది. వంటల పోటీకి బహుమతిగా ఉండే కోడిపుంజు ట్రోఫీని దొంగతనం చేసి తనకు ఇవ్వాలని, లేకపోతే హత్య కేసులో ఇరికిస్తానని నార్కోటిక్స్ అధికారి ఒకరు అనుపమ, శిల్పను బెదిరిస్తారు. ఆ తర్వాత ఏం జరిగిందనేదే భామాకలాపం 2 మూవీలో ఉంది. డ్రగ్స్ మాఫియా, కోడి పుంజు ట్రోఫీ చుట్టూ ఈ చిత్రం సాగుతుంది. ప్రియమణి, శరణ్య పర్ఫార్మెన్స్ ప్రధానమైన హైలైట్‍గా నిలిచింది.