ఈ ఎలక్ట్రిక్ స్కూటర్‌కు అడ్డులేదు.. 2024లో నాలుగు లక్షల యూనిట్లకుపైగా అమ్మకాలు!

ఎలక్ట్రిక్ వాహనాలకు రోజురోజుకు డిమాండ్ పెరుగుతోంది. దీనికి వాటి అమ్మకాలే నిదర్శనం. ఈవీ టూ వీలర్స్‌ కూడా కస్టమర్లను ఆకర్శిస్తున్నాయి. ఎన్నడూ లేని విధంగా ఈవీ మార్కెట్ దూసుకెళ్తోంది. దేశంలో ఓలా ఎలక్ట్రిక్ ఆధిపత్యాన్ని కొనసాగిస్తోంది. టీవీఎస్ ఐక్యూబ్, బజాజ్ చేతక్ ఈవీ ఈ విభాగంలో బలమైన వృద్ధిని చూస్తున్నాయి. అయితే ఈ ఏడాది కూడా ఓలా ఈవీ సెగ్మెంట్‌లో నంబర్-1గా నిలిచింది. ఈ ఒక్క క్యాలెండర్ ఇయర్‌లో కంపెనీ రిటైల్ అమ్మకాల సంఖ్య 4 లక్షల యూనిట్లు దాటింది. దేశంలో ఈ అద్భుతమైన స్థానాన్ని సాధించిన తొలి ఈవీ కంపెనీగా నిలిచింది.

డిసెంబర్ 15, 2024 నాటికి తాజా డేటా ప్రకారం ఓలా మొత్తం 4,00,099 యూనిట్లను విక్రయించింది. సెప్టెంబర్ 9న ప్రపంచ ఈవీ దినోత్సవం సందర్భంగా కంపెనీ 3 లక్షల యూనిట్ల అమ్మకాల మైలురాయిని సాధించింది. జనవరి 1 నుంచి డిసెంబర్ 14, 2024 మధ్య కంపెనీ 4,00,099 యూనిట్ల అమ్మకాలతో ముందు ఉంది. ఈ ఏడాది అదనంగా 1,32,371 యూనిట్లను విక్రయించింది. ఓలా ఎలక్ట్రిక్ భారత ఈవీ మార్కెట్లోకి ప్రవేశించినప్పటి నుండి 775,000 యూనిట్లకు పైగా రిటైల్ అమ్మకాల మార్కును దాటింది.

డిసెంబర్ 2021లో అమ్మకాలను ప్రారంభించిన కంపెనీకి రిటైల్ అమ్మకాలు 2024 డిసెంబర్ మొదటి అర్ధభాగం నాటికి 777,118 యూనిట్లుగా ఉన్నాయి. డిసెంబర్ 2021 నుండి 2024 డిసెంబర్ మధ్య వరకు దేశంలో విక్రయించిన 2.62 మిలియన్ (2,627,889 యూనిట్లు) ఎలక్ట్రిక్ ద్విచక్ర వాహనాలలో ఓలా 30 శాతం మార్కెట్ వాటాను కలిగి ఉంది. డేటా ప్రకారం ఓలా తన అమ్మకాల మొదటి 12 నెలల్లో 2022లో 109,401 యూనిట్లను విక్రయించింది. ఇది ఏథర్ ఎనర్జీ అమ్మకాల కంటే 51,808 యూనిట్లు ఎక్కువ.

డిసెంబర్ 2021లో అమ్మకాలను ప్రారంభించిన ఓలా ఎలక్ట్రిక్, 2024 డిసెంబర్ మొదటి అర్ధభాగం వరకు 777,118 యూనిట్లను విక్రయించింది. ఇది భారతదేశంలో అతిపెద్ద అమ్మకాలు. 2023లో ఓలా 267,378 యూనిట్లను విక్రయించింది. ఇది సంవత్సరానికి 144 శాతం వృద్ధిని ఇచ్చింది. ఇది తన పోటీదారు టీవీఎస్ మోటార్ కంపెనీ కంటే 100,799 ఎక్కువ. ఈ ఏడాది జనవరి నుంచి డిసెంబర్ 14 వరకు 400,099 యూనిట్లను విక్రయించడంతో 2023 అమ్మకాలతో పోలిస్తే 50 శాతం వృద్ధిని నమోదు చేసింది.