TS TET Syllabus 2024 : తెలంగాణ 'టెట్'కు ప్రిపేర్ అవుతున్నారా..? తాజా 'సిలబస్' ఇదే

TS TET Syllabus 2024 Updates: తెలంగాణ టెట్ నోటిఫికేషన్(TS TET 2024) వచ్చేసిన సంగతి తెలిసిందే. మార్చి 27వ తేదీ నుంచి దరఖాస్తుల ప్రక్రియ షురూ కానుంది. తాజాగా షెడ్యూల్ ను కూడా ప్రకటించింది విద్యాశాఖ. ఏప్రిల్ 10వ తేదీ వరకు దరఖాస్తులను స్వీకరించనున్నారు. మే 20 నుంచి పరీక్షలు ప్రారంభం కానున్నాయి. జూన్ 3వ తేదీతో ఎగ్జామ్స్ ముగియనున్నాయి. https://schooledu.telangana.gov.in వెబ్ సైట్ లోకి వెళ్లి దరఖాస్తుల ప్రక్రియను పూర్తి చేయవచ్చని విద్యాశాఖ సూచించింది.

టెట్ పరీక్షలో అర్హత సాధిస్తేనే డీఎస్సీ (TS DSC) రాసేందుకు వీలు ఉంటుంది. అంతేకాదు ప్రైవేటు పాఠశాలల్లోనూ బోధించాలంటే టెట్ అర్హత తప్పనిసరి. ఈ నేపథ్యంలో టెట్ 2024 పరీక్ష విధానమేంటి..? సిలబస్ లో ఎలాంటి అంశాలు ఉంటాయి...? అర్హత మార్కుల కటాఫ్ వివరాలు చూస్తే ఈ కింది విధంగా ఉన్నాయి….

TS TET Exam Pattern 2024: పరీక్షా విధానం

‘టెట్( TS TET News 2024) పరీక్షలో భాగంగా రెండు పేపర్లు ఉంటాయి. అందులో పేపర్‌-1 సెకండరీ గ్రేడ్‌ టీచర్లుగా నియామకానికి, పేపర్‌-2 స్కూల్‌ అసిస్టెంట్‌ పోస్టుల కోసం అర్హత సాధించేందుకు నిర్వహిస్తారు. ఒక్కో పేపర్‌ 150 మార్కులకు ఉంటుంది. పేపర్‌-1కు 1-8 తరగతులు, పేపర్‌-2కు 6-10 తరగతుల ప్రామాణికంగా ప్రశ్నలు ఉంటాయి. అన్ని పేపర్లు ఆబ్జెక్టివ్‌ విధానంలో ఉంటాయి. ప్రతి పేపర్‌కు 2:30 గంటల సమయం అందుబాటులో ఉంటుంది. ఒక్కసారి అర్హత సాధిస్తే జీవిత కాలంపాటు సంబంధిత సర్టిఫికెట్ తో డీఎస్సీ రాయవచ్చు. ఇక టెట్ లో మంచి స్కోర్ సాధిస్తే.. డీఎస్సీలో(Telangana DSC ) మార్కులు యాడ్ అవుతాయి. రెండింట్లో వచ్చిన మార్కుల ఆధారంగా తుది జాబితాను రూపొందించి ఫలితాలను విడుదల చేస్తారు.

TS TET Syllabus 2024: సిలబస్ వివరాలు….

• శిశు అభివృద్ధి, బోధన శాస్త్రం (30 మార్కులు): శిశు అభివృద్ధి నమూనాలు, నేర్చుకునే సామర్థ్యం, బోధన శాస్త్ర అవగాహన
• తెలుగు (30 మార్కులు) : పఠనావగాహన, తెలంగాణ సాహిత్యం, సంస్కృతి, పదజాలం, భాషాంశాలు, బోధన పద్ధతులు
• ఇంగ్లీష్ (30 మార్కులు) : ఆంగ్లభాష విషయాలు, వ్యాకరణం (24 మార్కులు), ఆంగ్ల బోధన శాస్త్రం (6 మార్కులు)
• గణిత శాస్త్రం (30 మార్కులు) : సంఖ్యామానం, భిన్నాలు, అంకగణితం, రేఖాగణితం, కొలతలు, డేటా అప్లికేషన్స్‌, ఆల్‌జీబ్రా (24 మార్కులు), గణిత బోధన పద్ధతులు (6 మార్కులు)
• పర్యావరణ అధ్యయనం (30 మార్కులు) : నా కుటుంబం, పని, ఆటలు, మొక్కలు, జంతువులు, మన ఆహారం, వసతి, గాలి, ఇంధనం, నీరు, ఆరోగ్యం, పరిశుభ్రత, భౌగోళిక మ్యాపులు, భారత దేశ చరిత్ర- సంస్కృతి, భారతదేశం- తెలంగాణ సంస్కృతి, పట్టణాలు, జీవన విధానం, సహజవనరులు, నదులు, నాగరికత, భారత రాజ్యాంగం, భద్రత (భూకంపాలు, వరదలు, ఆగ్నిమాపక, ప్రాథమిక చికిత్స, 108, 104 వాహనాలు) (24 మార్కులు), పర్యావరణ బోధన శాస్త్రం (6మార్కులు)

పేపర్‌-2 సిలబస్‌( సైన్స్‌, సోషల్‌)

• శిశు అభివృద్ధి, బోధన శాస్త్రం(30 మార్కులు): శిశు వికాసం, వ్యక్తిత్వ వికాసం, ప్రవర్తనా సమస్యలు, నేర్చుకునే సామర్థ్యం, మానసిక ఆరోగ్యం బోధన శాస్త్ర అవగాహన తదితర అంశాలు ఉంటాయి.
• తెలుగు భాష( 30 మార్కులు): పఠనావగాహన(పద్యం, గద్యం), 2015లో రూపొందించిన పాఠ్య పుస్తకాల ఆధారంగా తెలంగాణ సాహిత్యం, సంస్కృతి(ప్రాచీనం, ఆధునికం), పదజాలం, భాషాంశాలు, బోధన పద్ధతులు
• ఇంగ్లీష్ సబ్జెక్ట్ (30 మార్కులు) : ఆంగ్లంలోని పార్ట్స్‌ ఆఫ్‌ స్వీచ్‌, టెన్సెస్‌, యాక్టివ్‌ వాయిస్‌, పాసివ్‌ వాయిస్‌, డిగ్రీస్‌ ఆఫ్‌ కంపారిజన్‌, వెర్బ్‌లు తదితర మొత్తం 20 రకాల వ్యాకరణాంశాలు. వాటికి 24 మార్కులు. మరో 6 మార్కులు ఆంగ్ల బోధనా పద్ధతులకు ఉంటాయి.
• గణితం, సైన్స్‌( 60 మార్కులు): గణితానికి 30, సైన్స్‌కు 30 మార్కులుంటాయి. గణితంలో సంఖ్యామానం, అంకగణితం, సెట్స్‌, అల్‌జీబ్రా, రేఖాగణితం(జామెట్రీ), మెన్సురేషన్‌, డేటా హ్యాండ్లింగ్‌, త్రికోణమితి, గణిత బోధన పద్ధతులు.
• సైన్స్‌లో: ప్రకృతి వనరులు, మన విశ్వం, మెకానిక్స్‌, మేగ్నటిజం అండ్‌ ఎలక్ట్రిసిటీ, మూలకాల వర్గీకరణ, రసాయన బంధం, పదార్థం, అణు నిర్మాణం, జీవశాస్త్రం తదితర అంశాలు.
• పేపర్‌-2లో సోషల్‌ స్టడీస్‌(60 మార్కులు): భూ వైవిధ్యం, ఉత్పత్తి- వలసలు, జీవనోపాధి, రాజకీయ వ్యవస్థలు, సామాజిక అసమానతలు, మతం- సమాజం, సంస్కృతి-కమ్యూనికేషన్‌ తదితర అంశాలకు 48 మార్కులు ఉంటాయి. మరో 12 మార్కులు బోధన పద్ధతులకు ఉంటాయి.

TS TET Syllabus Download: మీ సబ్జెక్ట్ సిలబస్ ఇలా డౌన్లోడ్ చేసుకోండి….

• టెట్ కు ప్రిపేర్ అయ్యే అభ్యర్థులు ఏ సబ్జెక్టుకు ప్రిపేర్ అవుతున్నారో సదరు అభ్యర్థులు…. https://schooledu.telangana.gov.in వెబ్ సైట్ లోకి వెళ్లాలి.
• హోంపేజీలో Syllabus అనే ఆప్షన్ పై క్లిక్ చేయాలి.
• ఇక్కడ మీ సబ్జెక్ట్ పేర్లు కనిపిస్తాయి. ఆ పక్కనే డౌన్లోడ్ అనే ఆప్షన్ కనిపిస్తోంది. ఈ ఆప్షన్ పై క్లిక్ చేస్తే మీరు రాసే సబ్జెక్ట్ సిలబస్ కాపీని డౌన్లోడ్ అవుతుంది.
• డౌన్లోడ్ చేసుకున్న కాపీని ప్రింట్ తీసుకోవచ్చు.

TS TET Key Dates : టీఎస్ టెట్ ముఖ్య తేదీలు:

• తెలంగాణ టెట్ నోటిఫికేషన్ - 04, మార్చి, 2024.
• దరఖాస్తులు ప్రారంభం -మార్చి 27, 2024.
• దరఖాస్తులకు చివరి తేదీ - ఏప్రిల్ 10, 2024.
• హాల్ టికెట్లు - మే 15, 2024.
• పరీక్షలు ప్రారంభం - మే 20, 2024.
• పరీక్షల ముగింపు - జూన్ 06,2024.
• టెట్ ఫలితాలు - జూన్ 12, 2024.
• అధికారిక వెబ్ సైట్ - https://schooledu.telangana.gov.in/ISMS /