Eden Gardens Test: మూడో రోజే మా బ్యాగులు సర్దుకున్నాం కానీ.. చారిత్రక ఈడెన్ గార్డెన్స్ టెస్టుపై బదానీ

Eden Gardens Test: ఈడెన్ గార్డెన్స్ టెస్ట్ అనగానే అందరికీ ముందు లక్ష్మణ్, ద్రవిడే గుర్తుకు వస్తారు. 2001లో ఆస్ట్రేలియాపై ఈ ఇద్దరూ టెస్ట్ క్రికెట్ చరిత్రలో చిరకాలం నిలిచిపోయే ఇన్నింగ్స్ ఆడారు. అప్పటికే తొలి టెస్టు ఓడిపోయి.. రెండో టెస్టులో ఫాలో ఆన్ ఆడుతున్న దుస్థితిలో ఈ ఇద్దరూ ఐదో వికెట్ కు ఏకంగా 376 పరుగుల భాగస్వామ్యంతో ఇండియాకు చారిత్రక విజయం సాధించి పెట్టారు.

టెస్టు క్రికెట్ లో ఫాలో ఆన్ ఆడుతూ గెలిచిన ఐదు సందర్భాల్లో అదీ ఒకటి. ఆ చారిత్రక టెస్టును గుర్తు చేసుకుంటూ అప్పటి టీమిండియా సభ్యుడు హేమంగ్ బదానీ ఓ ఇంట్రెస్టింగ్ ట్వీట్ చేశాడు. ఇక తమ పని అయిపోయినట్లు భావించి మూడో రోజే బ్యాగులు సర్దుకొని ఎయిర్ పోర్టుకు పంపించినట్లు అతడు చెప్పాడు.

"మూడో రోజు ముగిసే సమయానికే మేము బ్యాగులు సర్దుకున్న విషయం చాలా మందికి తెలియదు. ఆ బ్యాగులను ఎయిర్ పోర్టుకు పంపించి.. మేము గ్రౌండ్ నుంచి నేరుగా ఎయిర్ పోర్టుకు వెళ్లాలన్నది ప్లాన్. కానీ ఈ ఇద్దరూ మాంత్రికుల్లాగా బ్యాటింగ్ చేసి ఆ రోజంతా వికెట్ పడకుండా ఆడారు" అని బదానీ గుర్తు చేసుకున్నాడు.

మరో ట్వీట్ లో గ్రౌండ్ నుంచి హోటల్ కు వెళ్లిన తర్వాత తాము పడిన ఇబ్బందులను చెప్పాడు. "మేము హోటల్ కు వెళ్లిన తర్వాత మా బ్యాగులు లేవు. రాత్రి 9 గంటల వరకూ మేము మా మ్యాచ్ డ్రెస్సులలోనే ఉన్నాం. రాత్రి డిన్నర్ కూడా వాటిపైనే చేశాం" అని బదానీ వెల్లడించాడు.

ఆ చారిత్రక మ్యాచ్ లో ఆస్ట్రేలియా మొదట బ్యాటింగ్ చేసి 445 రన్స్ చేసింది. ఆ తర్వాత ఇండియా కేవలం 171 పరుగులకే ఆలౌటైంది. లక్ష్మణ్ 59 రన్స్ చేశాడు. ఫాలో ఆన్ ఆడాల్సి రావడంతో ఈ మ్యాచ్ కూడా ఓడినట్లే అని అందరూ అనుకున్నారు. కానీ రెండో ఇన్నింగ్స్ లో లక్ష్మణ్ (281), ద్రవిడ్ (180) ఎవరూ ఊహించని అద్భుతమే చేశారు.

ఈ ఇద్దరూ ఐదో వికెట్ కు 376 రన్స్ చేయడంతో రెండో ఇన్నింగ్స్ ను ఇండియా 7 వికెట్లకు 657 పరుగుల దగ్గర డిక్లేర్ చేసింది. నాలుగో రోజంతా వీళ్లు వికెట్ పడకుండా ఆడటం విశేషం. తర్వాత 384 రన్స్ టార్గెట్ తో బరిలోకి దిగిన ఆస్ట్రేలియా.. 171 పరుగుల తేడాతో ఓడిపోయింది. హర్భజన్ సింగ్ ఆరు వికెట్లు తీసుకున్నాడు.