Zerodha fitness challenge : బరువు తగ్గితే.. రూ. 10లక్షలు- ఉద్యోగులకు సీఈఓ ఆఫర్​!

Zerodha fitness challenge : ఉద్యోగులకు సరికొత్త ఫిట్​నెస్​ ఛాలెంజ్​ని విసిరింది ఆన్​లైన్​ బ్రోకరేజ్​ సంస్థ జెరోధా. గత కొంతకాలంగా.. ఉద్యోగుల ఫిట్​నెస్​పై దృష్టిసారించిన ఆ సంస్థ.. ఛాలెంజ్​లో గెలిస్తే రూ. 10లక్షల రివార్డును కూడా ఇస్తామని ప్రకటించింది.

జెరోధా సీఈఓ నితిన్​ కామత్​ ప్రకారం.. ఈ ఫిట్​నెస్​ ఛాలెంజ్​లో పాల్గొనే ఉద్యోగులకు పలు రకాల ప్రోత్సాహకాలు లభిస్తాయి. ఒక లక్కీ పార్టిసిపెంట్​కు రూ. 10లక్షల నగదును రివార్డుగా ఇస్తారు.

జెరోధా ఫిట్​నెస్​ ఛాలెంజ్​లో భాగంగా.. రోజుకు కనీసం 350 క్యాలరీలను బర్న్​ చేయాలి.

"ఫిట్​నెస్​ ట్రాకర్లలో డెయిలీ యాక్టివిటీ గోల్స్​ సెట్​ చేసుకోవడం పూర్తిగా ఆప్షనల్​. 90శాతం రోజుల్లో పెట్టుకున్న గోల్స్​ని ఏడాది కాలంలో సాధిస్తే.. వారికి నెల జీతాన్ని బోనస్​గా ఇస్తాము. లక్కీ డ్రాలో ఎంపికైన వ్యక్తికి రూ. 10లక్షలు లభిస్తాయి," అని లింక్​డిన్​లో చెప్పారు నితన్​ కామత్​.

ఉద్యోగులు యాక్టివ్​గా, ఫిట్​గా ఉండేందుకు సంస్థ ప్రయత్నిస్తోందని నితిన్​ కామత్​ వెల్లడించారు. ఈ క్రమంలో ఓ హెల్త్​ యాప్​కు సంబంధించిన స్క్రీన్​ షాట్​ని కూడా షేర్​ చేశారు.

"కొవిడ్​ నేపథ్యంలో నేను బరువు పెరిగాను. నా యాక్టివిటీలను ట్రాక్​ చేయడం బాగా ఉపయోగపడుతోంది. డైట్​ పరంగానూ వినియోగిస్తున్నాను. 1000క్యాలరీలు బర్న్​ చేస్తున్నా. మీ యాక్టివిటీ ట్రాకర్​ని కూడా పంచుకోండి," అని రాసుకొచ్చారు జెరోధా సీఈఓ నితిన్​ కామత్​.

ఉద్యోగుల ఫిట్​నెస్​పై జెరోధా దృష్టిపెట్టడం ఇది కొత్తేమీ కాదు. ఈ ఏడాది ఏప్రిల్​లోనే ప్రోత్సాహకాల గురించి ప్రకటించింది. బీఎంఐ స్థాయి 25 కన్నా తక్కువ ఉన్న ఉద్యోగులకు.. నెల జీతంలో సగాన్ని బోనస్​గా ఇస్తామని ప్రకటించింది. గతేడాది కూడా ఇలాంటి ఛాలెంజ్​నే ప్రవేశపెట్టింది ఈ ఆన్​లైన్​ బ్రోకరేజ్​ సంస్థ.