Indians in Canada : కెనడాలో వెయిటర్​ జాబ్​ కోసం క్యూ కట్టిన వేలాది మంది భారతీయులు.. వీడియో వైరల్​!

ఇటీవలి కాలంలో విదేశాల్లో చదువు కోసం వెళుతున్న భారతీయుల సంఖ్య విపరీతంగా పెరుగుతోంది. అయితే చదువు తర్వాత సరైన ఉద్యోగ అవకాశాలు లేక చాలా మంది ఇబ్బందిపడుతున్నారు. ఈ నేపథ్యంలో కెనడాలో జరిగిన ఓ ఘటన ఇప్పుడు సోషల్​ మీడియాలో వైరల్​గా మారింది. ఓ రెస్టారెంట్​లో వెయిటర్​, సర్వీస్​ స్టాఫ్​ ఉద్యోగం కోసం వేలాది మంది విద్యార్థులు క్యూ కట్టారు. వీరిలో భారతీయులు కూడా ఉన్నారు. కెనడాలో చదువుకోవాలని లేదా పనిచేయాలని ఆలోచిస్తున్న వారిని ఇది భయాందోళనకు గురిచేస్తోంది!

ఇదీ జరిగింది..

కెనడా బ్రాంప్టన్​లోని తందూరీ ఫ్లేమ్​ రెస్టారెంట్​లో ఈ ఘటన జరిగింది. క్యూలో వేచి ఉన్న విద్యార్థుల్లో ఒకరైన అగమ్వీర్ సింగ్ తన నిరాశను వ్యక్తం చేశాడు. “నేను మధ్యాహ్నం 12 గంటలకు ఇక్కడకు వచ్చాను. లైన్ చాలా పెద్దగా ఉంది. అప్లికేషన్​ని ఇంటర్నెట్​లో పెట్టాము. ఇంటర్వ్యూ తీసుకుంటామని చెప్పారు. కానీ అలాంటిదేమీ జరగలేదు. ప్రజలు ఇప్పుడిప్పుడే ఇక్కడికి వస్తున్నారు. ఇక్కడ ఉద్యోగాలకు అవకాశం ఉందని నేను నమ్మడం లేదు. ఇది చాలా కష్టం,” అని అన్నాడు.

"ఇది చాలా తీవ్రమైన విషం; ప్రతి ఒక్కరూ ఉద్యోగం కోసం చూస్తున్నారు.  ఎవరికీ సరైన ఉద్యోగం లభించడం లేదు. నా స్నేహితుల్లో చాలా మందికి ప్రస్తుతం ఉద్యోగం లేదు. వారు 2-3 సంవత్సరాలుగా ఇక్కడే ఉంటున్నారు," అని క్యూలో నిలపడిన మరొక వ్యక్తి చెప్పుకొచ్చాడు. 

కెనడాకు వెళ్లిన తర్వాత ఉద్యోగ అవకాశాల కోసం అన్వేషిస్తున్న వారిలో చాలా మంది పరిస్థితి ఈ విధంగానే ఉంది.

సోషల్​ మీడియాలో వైరల్​గా మారిన దృశ్యాలను ఇక్కడ చూడండి..

హిందుస్థాన్​ టైమ్స్​ తెలుగు ఈ వీడియో ప్రామాణికత, తేదీ, సమయాన్ని స్వతంత్రంగా ధృవీకరించలేదు.

సోషల్ మీడియా రియాక్షన్

విద్యార్థులు ఎదుర్కొంటున్న కఠోర వాస్తవాన్ని ఎత్తిచూపుతూ @MeghUpdates అనే సోషల్​ మీడియా అకౌంట్​ ఈ వీడియోని ఎక్స్​లో షేర్ చేసింది. 'ఎన్నో కలలతో భారత్ నుంచి కెనడాకు బయలుదేరే విద్యార్థులు తీవ్రమైన ఆత్మపరిశీలన చేసుకోవాల్సిన అవసరం ఉంది,' అని క్యాప్షన్ ఉంది.

ఈ దృశ్యాలపై కామెంట్ల వర్షం కురుస్తోంది.

"కెనడాలో అని దొరుకుతాయని భావించేవారికి ఇది కఠినమైన రియాలిటీ చెక్," అని ఒకరు వ్యాఖ్యానించగా, "ఇంతటి విపత్కర పరిస్థితుల్లో ఇంత మంది విద్యార్థులను చూడటం బాధాకరం," అని మరొకరు అభిప్రాయపడ్డారు.

"భావితరం విద్యార్థులు తమ ఆప్షన్స్​ని పునఃపరిశీలించుకోవాల్సిన సమయం ఆసన్నమైంది. అటువంటి చర్య తీసుకునే ముందు ఒకటికి రెండుసార్లు ఆలోచించాలి," అని ఇంకొకరు కామెంట్​ చేశారు.

మరికొందరు సహానుభూతిని వ్యక్తం చేశారు. "చాలా మంది ఆశావహ వ్యక్తులు పని కోసం కష్టపడటం హృదయవిదారకంగా ఉంది," అని అంటున్నారు.

వాస్తవానికి కెనడా ఆస్ట్రేలియా, అమెరికా, యూకేతో పాటు ఇతర దేశాల్లో పరిస్థితులు ఇంచుమించు ఇదే విధంగా ఉన్నాయి. స్టూడెంట్​ వీసా సులభంగా దొరుకుతోంది, కానీ చదువు పూర్తి చేసిన తర్వాత ఉద్యోగం దొరకడం చాలా కష్టంగా మారింది. పార్ట్​-టైమ్​ ఉద్యోగాలు కూడా కష్టంగానే దొరుకుతున్నాయి.

మరి కెనడాకి సంబంధించిన తాజా వీడియోపై మీ ఒపీనియన్​ ఏంటి?