India Canada issue : కెనడా 'మిషన్​' కోసం బిష్ణోయ్​ గ్యాంగ్​ని మోదీ ప్రభుత్వం వాడుకుందా?

భారత్​పై కెనడా తీవ్రస్థాయిలో ఆరోపణలు చేయడం, అందుకు బదులుగా మోదీ ప్రభుత్వం తమ దౌత్యవేత్తలను వెనక్కి పిలిపించడంతో ఇరు దేశాల మధ్య ఏడాదిగా కొనసాగుతున్న ఉద్రిక్తతలు మరింత పెరిగాయి! ఇక ఇప్పుడు కెనడా పోలీసులు భారత ప్రభుత్వంపై మరో సంచలన ఆరోపణలు చేశారు. తమ దేశంలోని ప్రో-ఖలిస్థానీ వాదులను టార్గెట్​ చేసేందుకు భారత ప్రభుత్వం క్రిమినల్స్​ సాయం తీసుకుంటోందని, మరీ ముఖ్యంగా లారెన్స్​ బిష్ణయ్​ గ్యాంగ్​తో పని చేయించుకుంటోందని రాయల్​ కెనడియన్​ మౌంటెడ్​ పోలీసులు సంచలన వ్యాఖ్యలు చేశారు.

ఖలిస్థానీ ఉగ్రవాది, కెనడా పౌరుడైన హర్దీప్​ నిజ్జర్​ హత్య వెనుక భారత్​ హస్తం ఉందని ఏడాది కాలంగా ఆ దేశ ప్రధాని జస్టిన్​ ట్రూడో ఆరోపిస్తూనే ఉన్న విషయం తెలిసిందే. దిల్లీ ఏజెంట్లు నిజ్జర్​ హత్యకు ప్లాన్​ చేసినట్టు కెనడా పోలీసులు తాజాగా మరోమారు పునరుద్ఘటించారు.

"కెనడాలోని దక్షిణాసియా సమాజాన్ని భారత ప్రభుత్వం టార్గెట్​ చేస్తోంది. మరీ ముఖ్యంగా ప్రో ఖలిస్థానీ వాదులను భయపెడుతోంది. దీని కోసం క్రిమినల్స్​ సాయం తీసుకుంటోందని మాకు అనిపిస్తోంది. ఈ క్రిమినల్​ గ్రూప్స్​లో ముఖ్యంగా బిష్ణోయ్​ గ్యాంగ్​ ఉందనిపిస్తోంది. ఈ గ్యాంగ్​తో భారత ప్రభుత్వ ఏజెంట్లు తమ పని చేయించుకుంటున్నారు," అని ఆర్​సీఎంపీ కమిషనర్​ మైక్​ దుహేమే అన్నారు.

భారత ఏజెంట్లు హత్య, దోపిడీ, బెదిరింపులకు పాల్పడుతున్నారా? అని అడగ్గా.. 'అవును' అని దుహేమే జవాబిచ్చారు. కెనడా పౌరుల సమాచారం తెలుసుకునేందుకు కొందరు భారత దౌత్యవేత్తలు,ఆర్గనైజ్​డ్​ క్రైమ్​ చేసే వారితో కలిసి పనిచేస్తున్నారని, ఆ తర్వాత దోపిడి- మర్డర్లు జరుగుతున్నాయని ఆయన అన్నారు.

ఆర్​సీఎంపీ అధికారులు సంచలన వ్యాఖ్యలు చేసిన కొన్ని గంటల వ్యవధిలో కెనడా ప్రధాని జస్టిన్​ ట్రూడో మీడియాతో మాట్లాడారు. భారత ప్రభుత్వంపై మరోమారు ఆరోపణల వర్షం కురిపించారు.

"కెనడాపై, కెనడా ప్రజలపై నేరాలకు పాల్పడే విధంగా ఏదైనా చేయొచ్చని భారత ప్రభుత్వం భావించి చాలా పెద్ద తప్పు చేసింది. దోపిడి అయినా, హత్య అయినా.. మేము దేన్నీ సహించబోము," అని ట్రూడో తేల్చిచెప్పారు.

నిజ్జర్​ హత్యలో తమ హస్తం లేదని భారత ప్రభుత్వం మొదటి నుంచి చెబుతూనే వస్తోంది. ఇదే విషయంపై కెనడా ప్రధాని జస్టిన్​ ట్రూడో ఆరోపణలు అనేకమార్లు ఖండించింది. నిత్యం ఆరోపణలు చేయడమ తప్ప, తాము ఎన్నిసార్లు ఆధారాలు చూపించిన అడిగినా, కెనడా ప్రభుత్వం వాటిని చూపించడం లేదని భారత్​ పేర్కొంది.

కెనడాలోని ఇండియన్​ హై కమిషనర్​తో పాటు ఐదుగురు దౌత్య సిబ్బంది దేశంలో అక్రమ కార్యకలాపాలకు పాల్పడుతున్నారన్న జస్టిన్​ ట్రూడో ఆరోపణలను భారత విదేశాంగశాఖ ఖండించింది.

ఈ ఆరుగురు దౌత్యవేత్తలు దర్యాప్తునకు సహకరించడం లేదన్న కారణంగా వీరిని కెనడా బహిష్కరించింది. బదులుగా భారత్​ కూడా దేశంలోని కెనడా దౌత్యవేత్తలను పంపించేసింది.

అయితే కెనడాలో 2025లో ఎన్నికలు జరగనున్నాయి. ఈ నేపథ్యంలో నిజ్జార్​ హత్య విషయాన్ని ప్రధాని జస్టిన్​ ట్రూడో రాజకీయాల కోసం వాడుకుంటున్నారని ఆరోపణలు ఉన్నాయి. అందుకు తగ్గట్టుగానే, ఇటీవలే జరిగిన సర్వేలో ట్రూడోకి ప్రజల్లో మద్దతు పెరుగుతోందని స్పష్టమైంది.