Bleeding eye virus : ఈ వైరస్​ సోకితే కళ్ల నుంచి రక్తం వచ్చి చనిపోతారు! ప్రపంచవ్యాప్తంగా అలర్ట్​..

ప్రపంచ దేశాల్లో కొత్త వైరస్​ కలకలం సృష్టిస్తోంది! ఈ మార్​బర్గ్ వైరస్​పై పదిహేడు దేశాల్లో ప్రయాణికులకు హెచ్చరికలు జారీ అయ్యాయి. కంటి నుంచి రక్తస్రావం అవ్వడం ఈ వైరస్​ లక్షణాల్లో ఒకటి కావడంతో దీనికి “బ్లీడింగ్​ ఐ” వైరస్ అన్న పేరు కూడా వచ్చింది.ఈ మార్​బర్గ్ వైరస్ ఇప్పటికే రువాండాలో 15 మందిని బలితీసుకుంది. కనీసం మరో వంద మంది ఈ వైరస్ బారిన పడినట్టు తెలుస్తోంది.

మార్​బర్గ్​ వైరస్ అంటే ఏమిటి?

మార్​బర్గ్ లేదా బ్లీడింగ్​ ఐ వైరస్ ఎబోలా ఫ్యామిలీకి చెందినది. ఇది వైరల్ హెమరేజిక్ జ్వరానికి దారితీస్తుంది. రక్త నాళాల నష్టం, రక్తస్రావానికి దారితీస్తుంది. మార్​బర్గ్ వైరస్ జూనోటిక్ స్వభావం కలిగి ఉంటుంది. ఇది గబ్బిలాల నుంచి పుట్టుకొస్తుంది. రక్తం, మూత్రం లేదా లాలాజలం వంటి శారీరక ద్రవాలతో ప్రత్యక్ష సంబంధం ద్వారా మానవులకు వ్యాపిస్తుంది.

మార్​బర్గ్ వైరస్ లక్షణాలు..

బ్లీడింగ్​ ఐ వైరస్ లక్షణాలు ఎబోలాతో దాదాపు సమానంగా ఉంటాయి. వైరస్ సోకిన వారిలో విపరీతమైన జ్వరం, తీవ్రమైన తలనొప్పి, కండరాల నొప్పి, వాంతులు, గొంతునొప్పి, దద్దుర్లు, విరోచనాలు ఉంటాయి. తీవ్రమైన సందర్భాల్లో బ్లీడింగ్​ ఐ వైరస్ అంతర్గత రక్తస్రావం, అవయవ వైఫల్యం, షాక్​కి దారితీస్తుంది. ఇది మరణానికి దారితీస్తుంది. అనుకోకుండా బరువు తగ్గడం, ముక్కు, కళ్లు, నోరు లేదా యోని నుంచి రక్తస్రావం ఈ ప్రాణాంతక వైరస్ తొలిదశలోని లక్షణాలు.

కళ్లు లోపలికి పోవడం, ముఖంలో ఎక్స్​ప్రెషన్స్​ లేకపోవడం, విపరీతమైన బద్ధకం వంటి లక్షణాలు ఈ మార్​బర్గ్​ సోకిన రోగుల్లో కనిపిస్తుందని ప్రపంచ ఆరోగ్య సంస్థ వెల్లడించింది.

మార్​బర్గ్​ వైరస్ చికిత్స..

రోగి పరిస్థితి, వైద్య సంరక్షణ బట్టి ఈ మార్​బర్గ్​ వైరస్​ మరణాల రేటు 24శాతం నుంచి 88శాతం మధ్యలో ఉంటుంది. అయినప్పటికీ, మార్​బర్గ్​ వైరస్​కి నిర్దిష్ట యాంటీవైరల్ చికిత్స అందుబాటులో లేదు! రీహైడ్రేషన్, వంటి కొన్ని విషయాలు సహాయపడుతుంది. ప్రయోగాత్మక వ్యాక్సిన్లు అధ్యయనాల ప్రారంభ దశలో ఉన్నాయి. రక్త ఉత్పత్తులు, రోగనిరోధక చికిత్సలు, ఔషధ చికిత్సలు వంటి సంభావ్య చికిత్సపై ప్రస్తుతం పరిశోధనలు జరుగుతున్నాయి.

(గమనిక: ఈ వ్యాసం సమాచార ప్రయోజనాల కోసం మాత్రమే. వృత్తిపరమైన వైద్య సలహాకు ప్రత్యామ్నాయం కాదు. వైద్య పరిస్థితి గురించి ఏవైనా ప్రశ్నలు ఉంటే ఎల్లప్పుడూ మీ వైద్యుడి సలహా తీసుకోండి.)