Thank You OTT Release Date: అప్పుడే ఓటీటీలోకి వచ్చేస్తున్న నాగచైతన్య థాంక్యూ.. ఎందులోనో తెలుసా?

ఎన్నో ఆశలు, అంచనాల మధ్య నాగచైతన్య థాంక్యూ మూవీ రిలీజైన విషయం తెలుసు కదా. మనంలాంటి హిట్‌ ఇచ్చిన విక్రమ్‌ కే కుమార్‌ డైరెక్షన్‌లో వస్తున్న మూవీ కావడంతో చైతూ ఫ్యాన్స్‌ ఈ మూవీ కోసం ఆతృతగా ఎదురు చూశారు. కానీ సినిమాకు నెగటివ్‌ రివ్యూలు రావడంతో బాక్సాఫీస్‌ దగ్గర బోల్తా కొట్టింది. డిజాస్టర్లలో ఒకటిగా మిగిలిపోయింది.

దీంతో ఈ థాంక్యూ ఊహించిన దాని కంటే చాలా ముందుగానే ఓటీటీలోకి వచ్చేస్తుంది. ఈ నెల 11న (గురువారం) అమెజాన్‌ ప్రైమ్‌ వీడియోలోకి ఈ సినిమా రానుంది. అంటే థియేటర్లలో రిలీజైన మూడు వారాల్లోపే ఓటీటీలోకి రానుండటం విశేషం. ప్రైమ్‌ వీడియోనే ఈ విషయాన్ని మంగళవారం ట్విటర్‌ ద్వారా వెల్లడించింది. ప్రత్యేకమైన స్టోరీలైన్‌తో మిమ్మల్ని సంతోషాల సముద్రంలో ముంచెత్తడానికి వాళ్లు వచ్చేస్తున్నారు అంటూ ఈ సినిమా డిజిటల్‌ ప్రీమియర్‌ను ప్రైమ్‌ వీడియో అనౌన్స్‌ చేసింది.

నిజానికి ఈ నెల 11నే నాగ చైతన్య ముఖ్యమైన పాత్రలో నటించిన లాల్‌ సింగ్ చడ్డా ప్రపంచవ్యాప్తంగా రిలీజ్‌ కానున్న విషయం తెలిసిందే. అయితే డిజాస్టర్‌గా మిగిలిపోయినా ఈ థాంక్యూ మాత్రం తనకు ప్రత్యేకమైనదని నాగచైతన్య అన్నాడు. తన మనసుకు చాలా దగ్గరైన సినిమా అని అతడు చెప్పాడు. జీవితంలో మనం ఎదగడానికి సాయపడిన వాళ్లను గుర్తుంచుకొని, వాళ్లకు కృతజ్ఞత చూపాల్సిన అవసరాన్ని ఈ సినిమా చూపించింది.

బాలీవుడ్‌ మిస్టర్‌ పర్ఫెక్షనిస్ట్‌ ఆమిర్‌ ఖాన్‌ నటించిన లాల్‌ సింగ్‌ చడ్డాలో చైతూ ఓ ముఖ్యమైన పాత్రలో కనిపించనున్నాడు. ఇది బాలీవుడ్‌లో చైతూకి తొలి మూవీ. దీంతోపాటు దూత అనే హారర్‌ వెబ్‌ సిరీస్‌తో అటు ఓటీటీలోకీ నాగచైతన్య ఎంట్రీ ఇస్తున్నాడు. మరోవైపు రష్మికా మందన్నాతో కలిసి మరో సినిమా కూడా చేయబోతున్నట్లు ఈ మధ్యే వార్తలు వచ్చిన విషయం తెలిసిందే.