Srinidhi Shetty: అఫీషియల్.. హిట్ 3లో చేరిన కేజీఎఫ్ బ్యూటీ.. వెల్‌కమ్ చెప్పిన నాని

Srinidhi Shetty: టాలీవుడ్ లో వచ్చిన సూపర్ హిట్ ఫ్రాంఛైజీల్లో ఒకటి హిట్. ఇప్పటికే దీని నుంచి రెండు సినిమాలు వచ్చాయి. హిట్, హిట్ 2 మూవీస్ మంచి హిట్ సాధించాయి. ఇక ఇప్పుడు హిట్ 3 రాబోతుండగా.. ఇందులో ఫిమేల్ లీడ్ గా కేజీఎఫ్ బ్యూటీ శ్రీనిధి శెట్టి నటించనుంది. ఈ విషయాన్ని మూవీ ప్రొడ్యూసర్, హీరో నాని అధికారికంగా వెల్లడించాడు.

హిట్ 3లో శ్రీనిధి

కన్నడ ఇండస్ట్రీ నుంచి వచ్చిన కేజీఎఫ్ మూవీతో పాన్ ఇండియా స్థాయిలో పాపులర్ అయిపోయింది శ్రీనిధి శెట్టి. తన అందంతో ఆమె మెస్మరైజ్ చేసింది. ఇప్పుడామె తెలుగులో మంచి ఆఫర్ కొట్టేసింది. నాని నిర్మిస్తున్న హిట్ 3 మూవీలో ఫిమేల్ లీడ్ గా నటిస్తోంది. ఇందులో ఆమె నటిస్తున్నట్లు గతంలో పుకార్లు రాగా.. ఇప్పుడా వార్తను నాని కన్ఫమ్ చేశాడు.

శైలేష్ కొలను డైరెక్ట్ చేస్తున్న యాక్షన్ థ్రిల్లర్ హిట్ 3లో శ్రీనిధి శెట్టి నటిస్తున్న విషయాన్ని తన ఎక్స్ అకౌంట్ ద్వారా నాని చెప్పాడు. "మ్యాడ్‌నెస్ కు మరోవైపు.. వెల్‌కమ్ ఆన్ బోర్డ్ శ్రీనిధి శెట్టి" అనే క్యాప్షన్ తో ఆమెతో తాను కలిసి ఉన్న ఓ ఫొటోను నాని షేర్ చేశాడు. హిట్ 3 హ్యాష్‌ట్యాగ్ తో ఆ మూవీలో ఆమె ఫిమేల్ లీడ్ అని తేల్చేశాడు. హిట్ 3 మూవీలో ఆమెకు సంబంధించిన ఫస్ట్ లుక్ పోస్టర్ అది.

తెలుసు కదా అంటూ గతంలో వచ్చిన ఓ తెలుగు మూవీలో శ్రీనిధి శెట్టి నటించింది. ఇది ఆమెకు రెండో తెలుగు మూవీ కానుంది. హిట్ ఫ్రాంఛైజీకి నాని ప్రొడ్యూసర్ గా ఉన్నాడు. గతంలో హిట్, హిట్ 2 పేరుతో వచ్చిన రెండు సినిమాలూ హిట్ అయ్యాయి. ఇప్పుడీ హిట్ 3 మూవీ వచ్చే ఏడాది మే 1వ తేదీన రిలీజ్ కానుంది. మిక్కీ జే మేయర్ మ్యూజిక్ అందిస్తున్నాడు.

హిట్ 3 గురించి..

హిట్ 3 మూవీని నిర్మించడమే కాదు.. తానే లీడ్ రోల్లో నటిస్తున్నాడు నాని. హిట్ 3లో అతడు అర్జున్ సర్కార్ అనే ఓ పవర్ ఫుల్ ఐపీఎస్ ఆఫీసర్ పాత్ర పోషిస్తున్నాడు. గతంలో హిట్ లో విశ్వక్సేన్, హిట్ 2లో అడివి శేష్ లాంటి వాళ్లు నటించగా.. మూడో సినిమాలో నానిలాంటి స్టార్ హీరోని తీసుకోవడం విశేషం.

శైలేష్ కొలను డైరెక్షన్ కి నాని నేచురల్ యాక్షన్ తో హిట్ 3 ఈ ఫ్రాంఛైజీని మరో లెవల్ కు తీసుకెళ్తుందని భావిస్తున్నారు. 2022లో చివరిగా హిట్ 2 మూవీ రాగా.. వచ్చే ఏడాది ఈ హిట్ 3 రాబోతోంది.

ప్రస్తుతం నాని సరిపోదా శనివారం మూవీ సక్సెస్ ఎంజాయ్ చేస్తున్నాడు. నాని కెరీర్లో మూడో రూ.100 కోట్ల సినిమాగా ఇది నిలిచిన విషయం తెలిసిందే. నానితోపాటు ఎస్‌జే సూర్య నటించిన సరిపోదా శనివారం మూవీ ప్రస్తుతం నెట్‌ఫ్లిక్స్ ఓటీటీలో స్ట్రీమింగ్ అవుతోంది.