Trailer Record: వెరైటీ రికార్డ్ సృష్టించిన మల్టీస్టారర్ మూవీ ట్రైలర్.. రామాయణం రిఫరెన్స్‌లు, యాక్షన్‍తో ఆసక్తికరంగా..

బాలీవుడ్‍లో మోస్ట్ అవైటెడ్ చిత్రాల్లో ‘సింగం అగైన్’ ముందు వరుసలో ఉంది. బాలీవుడ్ స్టార్లు అజయ్ దేవ్‍గణ్, రణ్‍వీర్ సింగ్, అక్షయ్ కుమార్, కరీనా కపూర్, దీపికా పదుకొణ్, టైగర్ ష్రాఫ్‍, అర్జున్ కపూర్‌లతో భారీ మల్టీస్టారర్ మూవీగా ఈ చిత్రం రూపొందింది. పాపులర్ కాప్ ఫ్రాంచైజీ ‘సింగం’లో మూడో చిత్రంగా ఈ మూవీ వస్తోంది. సింగం అగైన్ చిత్రానికి రోహిత్ శెట్టి దర్శకత్వం వహించారు. ఈ సినిమా ట్రైలర్ నేడు (అక్టోబర్ 7) వచ్చేసింది.

రికార్డ్ ఇదే

సాధారణంగా సినిమా ట్రైలర్లు 2 నుంచి 3 నిమిషాలు ఉంటాయి. కొన్ని చిత్రాలకు 3 నిమిషాల మార్క్ కూడా దాటుతుంది. అయితే, ఈ విషయంలో సింగం అగైన్ లిమిట్ పెంచేసింది. ఈ మూవీ ట్రైలర్ ఏకంగా 4 నిమిషాల 58 సెకన్లుగా ఉంది. హిందీలో అత్యంత ఎక్కువ నిడివితో వచ్చిన ట్రైలర్‌గా సింగం అగైన్ రికార్డు సృష్టించింది. హిందీలో లాంగెస్ట్ ట్రైలర్‌గా నిలిచింది.

రామాయణం రిఫరెన్స్‌లు

రామ్‍లీలా నాటకాన్ని అన్వి (కరీనా కపూర్) ప్రదర్శించటంతో సింగం అగైన్ ట్రైలర్ షురూ అయింది. సీత కోసం రాముడు 3వేల కిలోమీటర్లు వెళ్లాడా అని అన్వి, సింగం (అజయ్ దేవ్‍గణ్‍)ను ఈ మూవీలో వారి కొడుకు పాత్ర పోషించిన పిల్లాడు ప్రశ్నిస్తాడు. అది నిజం అంటూ అన్వి చెబుతారు. ఆ తర్వాత తన జీవితం రామాయణాన్ని పోలి ఉంటుందంటూ సింగం కొన్ని విషయాలు చెబుతారు. అందుకు సంధించిన విజువల్స్ ఉన్నాయి. శక్తి శెట్టి అనే లేడీ పోలీస్‍గా దీపికా పదుకొణ్ కూడా లేడీ సింగం అంటూ అదరగొట్టారు.

టైగార్ ష్రాఫ్ కూడా యాక్షన్ సీక్వెన్సుల్లో కనిపించారు. పోలీసులుగా ఉన్న అజయ్, ష్రాఫ్‍ పాత్రలను రామలక్ష్మణులుగా చూపిస్తూ విజువల్ ఉంది. గద పట్టుకొని హనుంతుడి విగ్రహం ముందు సింబా (రణ్‍వీర్ సింగ్) ఎంట్రీ ఉంది. సింగంకు సింబా కాళ్లకు నమస్కరించే షాట్‍లోని రామాయణానికి సంబంధించిన విజువల్ కనిపిస్తుంది. ఇలా సింగం అగైన్ ట్రైలర్‌లో రామాయణం రిఫరెన్స్‌లు ఎక్కువగానే ఉన్నాయి. యుద్ధ విమానంలో అక్షయ్ కుమార్ ఎంట్రీ సూపర్‌గా ఉంది. మధ్యలో కరీనా ఉండగా.. అజయ్, రణ్‍వీర్, అక్షయ్, దీపికా, టైగర్ గన్‍లతో విలన్లపై ఫైర్ చేసే సీన్ ఆకట్టుకుంది. అన్వి కిడ్నాప్ అయితే.. ఆమెను సింగంతో కలిపేందుకు అందరూ పోరాడతారనే స్టోరీతో ఈ మూవీ రూపొందినట్టు అర్థమవుతోంది.

సింగం అగైన్ ట్రైలర్‌లో యాక్షన్ అదిరిపోయింది. మొత్తంగా పక్కా మాస్ మసాలా పోలీస్ యాక్షన్ మూవీగానే ఈ చిత్రం ఉంటుందని అర్థమవుతోంది. సింగం మార్క్ స్పష్టంగా కనిపిస్తోంది. అయితే, ఇతిహాసం రామాయణాన్ని రిఫరెన్స్‌గా తీసుకోవడం ఆసక్తికరంగా కనిపిస్తోంది.

సింగం అగైన్ సినిమా నవంబర్ 1వ తేదీన థియేటర్లలో రిలీజ్ కానుంది. దీపావళి పండుగకు ప్రేక్షకుల ముందుకు వస్తోంది. ఈ చిత్రంపై అంచనాలు భారీగా ఉన్నాయి. ముందుగా ఆగస్టు అని మేకర్స్ ప్లాన్ చేసుకోగా.. నవంబర్‌కు వాయిదా పడింది. ఈ మూవీని డైరెక్టర్ రోహిత్ శెట్టి తెరకెక్కించారు.

సింగం అగైన్ చిత్రానికి థమన్, రవి బస్రూర్ సంగీతం అందించారు. ట్రైలర్లో బ్యాక్‍గ్రౌండ్ మ్యూజిక్ ఆకట్టుకుంది. ఈ మూవీని రిలయన్స్ ఎంటర్‌టైన్‍మెంట్స్, జియో స్టూడియోస్, రోహిత్ శెట్టి పిక్చర్స్, దేవ్‍గన్ ఫిల్మ్స్, సినెర్జీ బ్యానర్లు కలిసి నిర్మించాయి.