Saripodhaa Sanivaaram BGM: సోషల్ మీడియాను షేక్ చేస్తున్న బీజీఎం.. పవన్, ప్రభాస్, ఎన్టీఆర్ వీడియోలతో ఫ్యాన్స్ హంగామా

నేచురల్ స్టార్ నాని హీరోగా నటిస్తున్న సరిపోదా శనివారం చిత్రం నుంచి నేడు (జూలై 20) ఓ గ్లింప్స్ వచ్చింది. ఈ సినిమాలో కీలక పాత్ర పోషించిన ఎస్‍జే సూర్య పుట్టిన రోజు సందర్భంగా ఈ వీడియోను మూవీ టీమ్ రిలీజ్ చేసింది. నాట్ ఏ టీజర్ అంటూ గ్లింప్స్ తీసుకొచ్చింది. ఈ యాక్షన్ థ్రిల్లర్ చిత్రానికి వివేక్ ఆత్రేయ దర్శకత్వం వహిస్తున్నారు. నాని - ఆత్రేయ కాంబోలో ఇది రెండో మూవీగా ఉంది. నేడు వచ్చిన సరిపోదా శనివారం మూవీ నుంచి వచ్చిన గ్లింప్స్‌లో బ్యాక్‍గ్రౌండ్ మ్యూజిక్ (బీజీఎం) ప్రేక్షకులను మెప్పిస్తోంది.

అదిరిపోయిన బీజీఎం

సరిపోదా శనివారం చిత్రానికి మ్యూజిక్ డైరెక్టర్ జేక్స్ బెజోయ్ సంగీతం అందిస్తున్నారు. ఈ గ్లింప్స్ వీడియోలో ఆయన ఇచ్చిన బీజీఎం అదిరిపోయింది. ‘పెళపెళమను శబ్దమే.. అదిరెను ఆకాశమే’ అంటూ వచ్చిన బీజీఎం చాలా పవర్‌ఫుల్‍గా ఉంది. ఆ లిరిక్స్‌కు తోడు బీజీఎం కూడా వారెవా అనేలా ఉంది. ఈ బీజీఎం అప్పుడే పాపులర్ అయిపోయింది.

ఇతర హీరోల వీడియోలకు..

సరిపోదా శనివారం గ్లింప్స్‌లోని ఈ బీజీఎం సోషల్ మీడియాను షేక్ చేస్తోంది. మ్యూజిక్ డైరెక్టర్ జేక్స్ బెజోయ్‍పై చాలా మంది నెటిజన్లు ప్రశంసలు కురిపిస్తున్నారు. బీజీఎం అద్భుతంగా ఉందంటూ పొగుడుతున్నారు. భీమ్లానాయక్ చిత్రంలో పవర్ స్టార్ పవన్ కల్యాణ్ నడుస్తున్న వీడియోకు సరిపోదా శనివారం బీజీఎంను కొందరు యాడ్ చేశారు. ఆ వీడియోను ఈ పవర్ ఫుల్ మ్యూజిక్ బాగా సూటైంది. ఇది సోషల్ మీడియాలో విపరీతంగా వైరల్ అవుతోంది. డీవీవీ ఎంటర్‌టైన్‍మెంట్స్ కూడా ఎక్స్ (ట్విట్టర్)లో ఈ వీడియోను షేర్ చేసింది.

జూనియర్ ఎన్టీఆర్, ప్రభాస్, అల్లు అర్జున్ సహా మరికొందరు హీరోల పవర్ ఫుల్ సీన్లకు ఈ సరిపోదా శనివారం గ్లింప్స్ బీజీఎంను పెట్టి సోషల్ మీడియాలో పోస్టులు చేస్తున్నారు కొందరు ఫ్యాన్స్. ఇంటెన్స్‌ మ్యూజిక్, పవర్‌ఫుల్ లిరిక్స్ ఉన్న ఈ బీజీఎం తెగ వైరల్ అవుతోంది. సరిపోదా శనివారం చిత్రానికి ఈ గ్లింప్స్‌తో మరింత బజ్ వచ్చేసింది.

సరిపోదా శనివారం సినిమాలో జనాలను హింసించే పోలీస్ అధికారిగా ఎస్‍జే సూర్య నటిస్తున్నారు. నాని, హీరోయిన్ ప్రియాంక మోహన్ అతడిని ఎదుర్కొంటారనేలా గ్లింప్స్‌లో ఉంది. ఎస్‍జే సూర్యను నరకాసురుడు.. నాని, ప్రియాంకను కృష్ణుడు, సత్యభామ అంటూ ఈ గ్లింప్స్ వాయిస్ ఓవర్ సాగింది. చివర్లో రక్తపు మరకలతో నాని అలా కూర్చొని ఉండగా.. పవర్‌ఫుల్ బీజీఎం వస్తుంది. మొత్తంగా ఈ మూవీపై అంచనాలు మరింత పెరిగిపోయాయి. శనివారమే మాత్రమే హీరో కోపం చూపించే విభిన్నమైన కాన్సెప్ట్‌తో ఈ చిత్రం వస్తోంది.

సరిపోదా శనివారం సినిమా ఆగస్టు 29వ తేదీన థియేటర్లలో రిలీజ్ కానుంది. డీవీవీ ఎంటర్‌టైన్‍మెంట్ పతాకంపై ఈ చిత్రాన్ని డీవీవీ దానయ్య, కల్యాణ్ దాసరి నిర్మిస్తున్నారు. తెలుగుతో పాటు హిందీ, తమిళం, మలయాళం, కన్నడలో ఈ మూవీ రిలీజ్ కానుంది. ‘అంటే సుందరానికి’ తర్వాత నాని - డైరెక్టర్ వివేక్ ఆత్రేయ కాంబో రిపీట్ అవుతుండటంతో సరిపోదా శనివారంపై మరింత ఆసక్తి ఉంది.