RRR new record in Japan: జపాన్‌లో సరికొత్త రికార్డు సృష్టించిన ఆర్ఆర్ఆర్

RRR new record in Japan: ఆస్కార్స్ వైపు దూసుకెళ్తున్న ఆర్ఆర్ఆర్ మూవీ.. ఆ క్రమంలో రికార్డుల మీద రికార్డులు బ్రేక్ చేస్తూనే ఉంది. ఇండియాతోపాటు పశ్చిమ దేశాల్లో సత్తా చాటిని ఈ మూవీ తూర్పు దేశమైన జపాన్ లోనూ అదే హవా కొనసాగిస్తోంది. గతేడాది అక్టోబర్ లో రిలీజైన ట్రిపుల్ ఆర్ మూవీ.. మూడు నెలలకుపైగా ఆ దేశంలో విజయవంతంగా నడుస్తోంది.

అంతేకాదు కొన్ని దశాబ్దాలుగా రజనీకాంత్ మూవీ ముత్తు పేరిట ఉన్న అత్యధిక కలెక్షన్ల రికార్డును కూడా ఇప్పటికే బ్రేక్ చేసింది. తాజాగా జపాన్ లో ఈ మూవీ కలెక్షన్లు 80 కోట్ల యెన్ (జపాన్ కరెన్సీ)ల మార్క్ అందుకుంది. అంటే మన కరెన్సీలో సుమారు రూ.50 కోట్లు. ఆ దేశంలో ఈ ఘనత సాధించిన తొలి ఇండియన్ మూవీ ఆర్ఆర్ఆర్ కావడం విశేషం.

ఈ మధ్యే ఈ సినిమా వంద రోజులను కూడా పూర్తి చేసుకుంది. ఇప్పటికీ కలెక్షన్ల వర్షం కురిపిస్తుండంతో త్వరలోనే 100 కోట్ల యెన్‌ల మార్క్ అందుకుంటుందని ట్రేడ్ వర్గాలు అంచనా వేస్తున్నాయి. ఇక అంతర్జాతీయ స్థాయిలో ట్రిపుల్ ఆర్ మూవీకి అవార్డులు కూడా క్యూ కడుతున్న విషయం తెలిసిందే.

ఇప్పటికే ఈ సినిమా గోల్డెన్ గ్లోబ్స్, క్రిటిక్స్ ఛాయిస్ అవార్డులను గెలుచుకుంది. ఇప్పుడు ప్రతిష్టాత్మక ఆస్కార్స్ పైనా కన్నేసింది. ఈ మూవీ సాంగ్ నాటు నాటు బెస్ట్ ఒరిజినల్ సాంగ్ కేటగిరీలో అకాడెమీ అవార్డులకు నామినేట్ అయింది. ఈ పాటకు ఆస్కార్స్ వస్తుందో రాదో మార్చి 13న తేలనుంది.