OTT Spy Thriller Web Series: ఫ్యామిలీ మ్యాన్‌కు దొరికిపోయిన హనీ బన్నీ.. ఫన్నీగా స్పై థ్రిల్లర్ వెబ్ సిరీస్ అనౌన్స్‌మెంట్

OTT Spy Thriller Web Series: అమెజాన్ ప్రైమ్ వీడియోలోకి మరో స్పై థ్రిల్లర్ వెబ్ సిరీస్ రాబోతోంది. ఈ సిరీస్ పేరు సిటడెల్ హనీ బన్నీ. సమంత, వరుణ్ ధావన్ కలిసి నటించిన ఈ సిరీస్ భారతీయ ప్రేక్షకుల్లో ఎంతో ఆసక్తి రేపుతోంది. సిటడెల్ స్పై యూనివర్స్ లో భాగంగా తెరకెక్కిన ఈ సిరీస్ వచ్చే నెలలో స్ట్రీమింగ్ కానుండగా.. ఇప్పుడు దీనికి ఫ్యామిలీమ్యాన్ ట్విస్ట్ ఇచ్చింది ప్రైమ్ వీడియో.

స్పై థ్రిల్లర్ వెబ్ సిరీస్ సిటడెల్

సిటడెల్ స్పై థ్రిల్లర్ వెబ్ సిరీస్ ప్రపంచవ్యాప్తంగా ఎన్నో దేశాల్లో పాపులర్ అవుతోంది. ఇప్పటికే ఇంగ్లిష్ వెర్షన్ లో ప్రియాంకా చోప్రా నటించిన సిరీస్ వచ్చింది. ఈ మధ్యే సిటడెల్ డయానా కూడా స్ట్రీమింగ్ కు వచ్చింది. ఇక నవంబర్ 7 నుంచి ఇదే సిటడెల్ హనీ బన్నీ పేరుతో ఇండియన్ వెర్షన్ వెబ్ సిరీస్ స్ట్రీమింగ్ కానుంది. ఈ సిరీస్ ట్రైలర్ అక్టోబర్ 15న ప్రేక్షకుల ముందుకు రానుంది.

అయితే ఈ ట్రైలర్ అనౌన్స్‌మెంట్ కు ఫ్యామిలీమ్యాన్ ట్విస్ట్ ఇస్తూ మనోజ్ బాజ్‌పేయీని ప్రైమ్ వీడియో రంగంలోకి దింపింది. శ్రీకాంత్ తివారీ అనే స్పై పాత్రలో ఈ ఫ్యామిలీమ్యాన్ వెబ్ సిరీస్ లో మనోజ్ జీవించిన విషయం తెలిసిందే. తాజాగా తన పార్ట్‌నర్ జేకే తల్పడే (షరీబ్ హష్మి)తో కలిసి ఈ హనీ బన్నీ కేసు సాల్వ్ చేయడానికి రంగంలోకి దిగాడు.

ఈ వీడియో మొదట్లోనే హనీ బన్నీకి చెందిన ఓ ఫైల్ తీసుకొని శ్రీకాంత్ వస్తాడు. అందులో సమంత, వరుణ్ ధావన్ ఫొటోలతోపాటు వాళ్ల వివరాలు ఉంటాయి. 1990ల నేపథ్యంలో సిటడెల్ హనీబన్నీ రూపొందిన నేపథ్యంలో ఓ పేజర్ కూడా ఇందులో చూడొచ్చు. తమ ముందు ఈ స్పైలు ఎంత? వాళ్లెప్పుడో అయిపోయారని ఈ ఇద్దరూ అనుకుంటారు. అయితే చివర్లో పేజర్లో హనీ బన్నీ వచ్చేశారు అనే మెసేజ్ తో కంగుతింటారు. చివరికి సిటడెల్ హనీ బన్నీ ట్రైలర్ అక్టోబర్ 15న రిలీజ్ కానుందని ప్రైమ్ వీడియో అనౌన్స్ చేసింది.

సిటడెల్ హనీబన్నీ సిరీస్ గురించి..

సిటడెల్ హనీబన్నీ స్పై థ్రిల్లర్ వెబ్ సిరీస్ లో సమంత, వరుణ్ ధావన్ స్పైలు నటిస్తున్నారు. ఈ సిరీస్ 1990ల నేపథ్యంలో తెరకెక్కింది. ఇంగ్లిష్ వెర్షన్ లో స్పైగా కనిపించిన ప్రియాంకా చోప్రా పాత్ర తల్లిదండ్రుల పాత్రల్లో సమంత, వరుణ్ నటించడం విశేషం. ప్రముఖ తెలుగు దర్శకులు రాజ్ అండ్ డీకే ఈ సిరీస్ ను డైరెక్ట్ చేశారు.

ఇప్పటికే వీళ్లు ఫ్యామిలీమ్యాన్, ఫర్జీలాంటి వెబ్ సిరీస్ లను ప్రైమ్ వీడియోకు వీళ్లు అందించారు. త్వరలో ఫ్యామిలీమ్యాన్ సీజన్ 3 కూడా రాబోతోంది. అంతకుముందు ఈ సిటడెల్ హనీబన్నీతో మరోసారి ప్రేక్షకులను మెస్మరైజ్ చేయడానికి రాజ్ అండ్ డీకే సిద్దమయ్యారు. ఈ స్పై థ్రిల్లర్ వెబ్ సిరీస్ నవంబర్ 7 నుంచి ప్రైమ్ వీడియోలో స్ట్రీమింగ్ కానుంది.