OTT Highest Paid Actress: ఓటీటీల్లో అత్యధిక రెమ్యునరేషన్ అందుకునే నటి ఈమెనే.. రెండేళ్లుగా ఒక్క హిట్టూ లేకపోయినా..

OTT Highest Paid Actress: ఓటీటీ ప్లాట్‌ఫామ్స్ వచ్చిన తర్వాత సినిమాల కంటే నాణ్యమైన, ఉత్తమమైన కంటెంట్ వాటి ద్వారా ప్రేక్షకులకు వస్తోంది. సిల్వర్ స్క్రీన్ పై కనిపించే స్టార్ల స్థాయిలో ఇప్పుడు ఓటీటీ నటీనటులు కూడా రెమ్యునరేషన్లు అందుకుంటున్నారు. టాలీవుడ్, బాలీవుడ్ స్టార్లు కూడా ఈ ఓటీటీ మూవీస్, వెబ్ సిరీస్ లలో నటించడానికి ఎగబడుతున్నారు. మరి వీళ్లలో అత్యధిక రెమ్యునరేషన్ అందుకునే నటి ఎవరో తెలుసా?

ఓటీటీ స్టార్ సమంత

ఓటీటీ ఒరిజినల్స్ లో నటించినందుకు అత్యధిక రెమ్యునరేషన్ అందుకున్న ఆ నటి పేరు సమంత రుత్ ప్రభు. కోలీవుడ్, టాలీవుడ్ లలో ఎన్నో హిట్ సినిమాల్లో నటించిన ఆమె కొన్నాళ్లుగా డల్లయిపోయింది. రెండేళ్లుగా ఒక్క హిట్ మూవీ కూడా ఆమె ఖాతాలో లేదు. అయినా ఓటీటీ స్పేస్ లో మాత్రం సమంతకు డిమాండ్ తగ్గలేదు. తాజాగా ఆమె నటించిన సిటడెల్ హనీ బన్నీ వెబ్ సిరీస్ కోసం సమంత ఏకంగా రూ.10 కోట్ల రెమ్యునరేషన్ తీసుకున్నట్లు వార్తలు వస్తున్నాయి.

బాలీవుడ్ స్టార్లకు కూడా సాధ్యం కాని ఘనత ఇది. ఆ మధ్య పుష్ప మూవీలో ఊ అంటావా ఐటెమ్ సాంగ్ కోసమే రూ.5 కోట్లు వసూలు చేసి ఆశ్చర్యపరిచిన సామ్.. ఇప్పుడీ వెబ్ సిరీస్ కోసం ఏకంగా రూ.10 కోట్లు తీసుకుందంటే నమ్మశక్యం కాదు. ఇది ఇండియాలో అత్యధిక మొత్తం అందుకున్న నటిగా ఆమెను నిలబెట్టింది.

ఆ స్టార్లందనీ వెనక్కి నెట్టి..

టాలీవుడ్, బాలీవుడ్ స్థాయిలో కొందరు నటీనటులు ఓటీటీ స్పేస్ ను ఏలుతున్నారు. అలా బాలీవుడ్ నుంచి ఎంతో మంది టాప్ నటీనటులు ఓటీటీ ఒరిజినల్ మూవీస్, వెబ్ సిరీస్ లలో నటిస్తున్నారు. కానీ సమంత మాత్రం వాళ్లందరినీ వెనక్కి నెట్టి అత్యధిక మొత్తం అందుకునే ఓటీటీ స్టార్ గా మారిపోవడం నిజంగా విశేషమే.

రెండేళ్ల పాటు మయోసైటిస్ అనే వ్యాధితో బాధపడి సినిమాలకు దూరంగా ఉన్న సామ్.. తర్వాత ఈ సిటడెల్ హనీ బన్నీ వెబ్ సిరీస్ చేసింది. పూర్తి యాక్షన్ సీక్వెన్స్ తో నిండిపోయిన ఈ సిరీస్ తాను చేయలేనని మొదట అనుకున్నా.. తర్వాత ఆ పాత్రను ఆమె పోషించిన తీరు ప్రేక్షకులను బాగా ఆకట్టుకుంది. తన యాక్షన్ తో ఆమె కట్టి పడేసింది. ఈ వెబ్ సిరీస్ లో సమంతతోపాటు వరుణ్ ధావన్ కూడా నటించాడు. తెలుగు దర్శకులు రాజ్ అండ్ డీకే డైరెక్ట్ చేశారు.

తెలుగులో హ్యాట్రిక్ ఫ్లాప్స్ అయినా..

తెలుగులో రెండేళ్ల వ్యవధిలో సమంతకు హ్యాట్రిక్ ఫ్లాప్స్ ఎదురయ్యాయి. వరుసగా ఆమె నటించిన యశోద, శాకుంతలం, ఖుషీ మూవీస్ బాక్సాఫీస్ దగ్గర బోల్తా పడ్డాయి. ఇలాంటి పరిస్థితుల్లో సినిమాల నుంచి బ్రేక్ తీసుకున్న ఆమె.. సిటడెల్ హనీ బన్నీ వెబ్ సిరీస్ ద్వారా మరోసారి ఘనంగా ఎంట్రీ ఇచ్చింది.

అంతేకాదు తన రెమ్యునరేషన్ ను కూడా భారీగా పెంచేసింది. గతంలో ఒక్కో సినిమాకు ఆమె రూ.2 కోట్ల వరకూ తీసుకునేది. ఆ తర్వాత మెల్లగా దానిని రూ.5 కోట్లకు పెంచేసింది. ఇప్పుడు వెబ్ సిరీస్ కోసం ఏకంగా రూ.10 కోట్లు వసూలు చేయడం విశేషం.