Tollywood Leaks: టాలీవుడ్లో మళ్లీ మొదలైన లీక్‌ల బెడద.. రోజుల వ్యవధిలోనే మూడు సినిమాల నుంచి లీక్‌లు!
Leaks in Tollywood: కన్నప్ప మూవీలో ప్రభాస్ లుక్ లీక్, పుష్ప -2 నుంచి శ్రీలీల, అల్లు అర్జున్ స్టిల్ లీక్, నాని సినిమా టైటిల్ లీక్.. ఇలా రోజుల వ్యవధిలోనే వరుస లీక్‌లతో కంగారుపడుతున్న టాలీవుడ్ ఇండస్ట్రీ
టాలీవుడ్లో మళ్లీ లీక్‌ల బెడద మొదలైంది. సినిమా సెట్స్ నుంచి కొన్ని స్టిల్స్ లీక్ అవుతుండగా.. టైటిల్స్, పోస్టర్స్ కూడా చిత్ర యూనిట్ అధికారికంగా ప్రకటించేలోపే సోషల్ మీడియాలోకి వచ్చేస్తున్నాయి. దాంతో దర్శకులు, హీరోలు, ప్రొడ్యూసర్లకి ఇది పెద్ద తలనొప్పిగా మారిపోయింది. వారం వ్యవధిలోనే భారీ బడ్జెట్ సినిమాలకి సంబంధించిన లీక్‌లు సోషల్ మీడియాలో రావడం అందర్నీ ఆశ్చర్యపరుస్తోంది.
పుష్ప-2 ఐటెం సాంగ్ స్టిల్
అల్లు అర్జున్, సుకుమార్ కాంబినేషన్‌లో వస్తున్న పుష్ప: ది రూల్‌ నుంచి ఒక స్టిల్ శనివారం విడుదలైంది. ఈ సినిమాలో స్టార్ హీరోయిన్ శ్రీలీల ఒక ఐటెం సాంగ్ చేస్తుండగా.. ఆ సాంగ్ షూటింగ్‌లో అల్లు అర్జున్, శ్రీలీల స్టెప్ ప్రాక్టీస్ చేస్తున్న స్టిల్ ఒకటికి బయటికి వచ్చింది.
వాస్తవానికి శ్రీలీల ఈ సినిమాలో స్పెషల్ సాంగ్ చేస్తుందని చిత్ర యూనిట్ చాలా వరకూ గోప్యంగా ఉంచే ప్రయత్నం చేసింది. అయితే.. ఆ సమాచారం కూడా ముందే లీక్ అవగా.. ఇప్పుడు స్టిల్ కూడా బయటికి వచ్చేసింది. డిసెంబరు 5న ప్రపంచ వ్యాప్తంగా పుష్ప-2 రిలీజ్ కానుంది.
కన్నప్ప‌లో ప్రభాస్ స్టిల్
మంచు విష్ణు హీరోగా భారీ బడ్జెట్‌తో తెరకెక్కుతున్న కన్నప్ప సినిమాలో ప్రభాస్ ఒక రోల్ చేశారు. ఈ సినిమా టీజర్ ఇప్పటికే విడుదల అవగా.. అందులో కేవలం ప్రభాస్ కళ్లని మాత్రమే చూపించిన కన్నప్ప టీమ్.. ప్రభాస్ లుక్‌ను గోప్యంగా ఉంచింది.
కానీ.. కన్నప్ప టీమ్ నుంచి ఎవరో ప్రభాస్ లుక్‌ను లీక్ చేసేశారు. దాంతో సీరియస్ అయిన మంచి విష్ణు.. ఆ లీక్ చేసిన వ్యక్తి గురించి సమాచారం అందిస్తే రూ.5 లక్షలు రివార్డ్ ఇస్తామని ప్రకటించారు. అంతేకాదు లీక్ చేసిన వ్యక్తిపై పోలీస్ కేసు కూడా పెట్టబోతున్నట్లు వెల్లడించారు.
నానీ మూవీ టైటిల్ రివీల్
శ్రీకాంత్ ఓదెల దర్శకత్వంలో నాని నటిస్తున్న సినిమాకి సంబంధించిన టైటిల్‌ను కూడా ఎవరో లీక్ చేశారు. వాస్తవానికి ‘ది ఫ్యారడైజ్’ అనే ఆ టైటిల్‌ను చాలా గ్రాండ్‌గా ప్లాన్ చేసి అధికారికంగా రిలీజ్ చేయాలని శ్రీకాంత్ ఓదెల ఆశించారు.
కానీ.. ఎవరో లీక్ లీక్ చేసేయడంతో శ్రీకాంత్ ఓదెల ఆగ్రహం వ్యక్తం చేశారు. నాని, శ్రీకాంత్ ఓదెల కాంబినేషన్‌లో వచ్చిన దసరా మూవీ బాక్సాఫీస్ వద్ద మంచి వసూళ్లని రాబట్టింది. దాంతో ది ఫ్యారడైజ్ మూవీపై కూడా భారీ అంచనాలు నెలకొనగా.. ఆరంభంలోనే టైటిల్ లీక్ అయిపోయింది.
అప్పట్లో పవన్, రవితేజకి లీక్‌ల బెడద
టైటిల్స్, స్టిల్స్ వరకూ ఒకవేళ లీక్ అయినా నష్టం తీవ్రత తక్కువే. కానీ.. ఈ పరిణామాలు ఇలానే కొనసాగితే అది సినిమాలపై తీవ్రమైన ప్రభావం చూపే ప్రమాదం ఉంటుంది. మరీ ముఖ్యంగా.. ప్రతి ఒక్కరికీ సోషల్ మీడియాలో అందుబాటులో ఉన్న ఈరోజుల్లో చిత్ర యూనిట్ మరింత జాగ్రత్తగా ఉండాలి. లేదంటే మూల్యం చెల్లించుకోక తప్పదు.
గతంలో పవన్ కళ్యాణ్ సినిమా ఒకటి ఇంటర్వెల్ వరకూ ఇంటర్నెట్‌లో ప్రత్యక్షమవగా.. రవితేజ సినిమాలో ఒక సీన్, డైలాగ్‌లు కూడా రిలీజ్‌కి ముందే బయటికి వచ్చాయి. కానీ.. ఆ తర్వాత ఈ లీక్‌ల బెడద తగ్గింది.
