Netflix Crime Thriller: నెట్‌ఫ్లిక్స్‌లో దూసుకెళ్తున్న క్రైమ్ థ్రిల్లర్ మూవీ.. అదిరిపోయే ట్విస్టులకు ఆడియెన్స్ ఫిదా

Netflix Crime Thriller: ప్రముఖ ఓటీటీ నెట్‌ఫ్లిక్స్ లో కొన్ని రోజులుగా ఓ క్రైమ్ థ్రిల్లర్ మూవీ సత్తా చాటుతోంది. తమిళ విలక్షణ నటుడు విజయ్ సేతుపతి నటించిన మహారాజా మూవీ టాప్ ట్రెండింగ్స్ లో తొలి స్థానంలో దూసుకెళ్తోంది. స్ట్రీమింగ్ మొదలైన మూడు రోజుల్లోనే టాప్ లోకి దూసుకొచ్చిన ఈ సినిమా.. ఇప్పటికే అదే స్థానంలోనే కొనసాగుతుండటం విశేషం.

టాప్‌లో మహారాజా

తమిళ నటుడు విజయ్ సేతుపతి 50వ సినిమాగా వచ్చిన మహారాజాకు థియేటర్లలోనూ ప్రేక్షకులు బ్రహ్మరథం పట్టారు. ఈ క్రైమ్ థ్రిల్లర్ మూవీని బాగా ఆదరించారు. తర్వాత జులై 12న ఈ సినిమా నెట్‌ఫ్లిక్స్ లోకి అడుగుపెట్టింది. మూడు రోజుల్లోనే టాప్ ట్రెండింగ్ మూవీస్ లో తొలి స్థానానికి దూసుకెళ్లింది. అప్పటి వరకూ మూడు వారాలుగా ఆ స్థానంలో ఉన్న హిందీ మూవీ మహారాజ్ ను వెనక్కి నెట్టింది.

జులై 15 నుంచి ఈ సినిమా టాప్ లోనే ఉంటూ వస్తోంది. రెండో వారంలోనూ మహారాజానే నెట్‌ఫ్లిక్స్ ఇండియాలో టాప్ ట్రెండింగ్ మూవీ కావడం విశేషం. ఈ సినిమాలోని ట్విస్టులు, విజయ్ సేతుపతి నటనకు ప్రేక్షకులు ఫిదా అవుతున్నారు. బాక్సాఫీస్ దగ్గర ప్రపంచవ్యాప్తంగా రూ.100 కోట్లకుపైగా గ్రాస్ వసూళ్లు సాధించిన ఈ సినిమాకు ఓటీటీలో అంతకు మించిన ఆదరణే లభిస్తోంది.

మహారాజా.. ట్విస్టులకు ఫిదా

మహారాజా మూవీ ఓ క్రైమ్ థ్రిల్లర్. ఈ సినిమాలో ఓ సాధారణ బార్బర్ గా నటించాడు విలక్షణ నటుడు విజయ్ సేతుపతి. తన ఇంట్లో ఓ దొంగతనం జరిగిందని, తమ జీవితాల్లో ఎంతో ముఖ్యమైన లక్ష్మిని ఎవరో ఎత్తుకెళ్లారని మహారాజా పోలీస్ స్టేషన్ లో ఫిర్యాదు చేస్తాడు. అసలు ఆ లక్ష్మి ఎవరు అన్నది ఓ ట్విస్ట్ కాగా.. దాని చుట్టూ తిరిగే కథ, అందులో భాగంగా వచ్చే ట్విస్టులకు మైండ్ బ్లాంక్ అవుతుంది.

ఓ క్రైమ్ థ్రిల్లర్ మూవీని ప్రేక్షకుల ఊహకు అందని ట్విస్టులతో తీస్తే ఎలా ఉంటుందో ఈ మహారాజా మూవీ నిరూపిస్తోంది. మొదటి సీన్ నుంచి క్లైమ్యాక్స్ వరకు ప్రతి సీన్లోనూ సినిమా ఎంతో ఉత్కంఠ రేపుతోంది. తెలిసిన స్టోరీయేగా అని అనుకునే ప్రతిసారీ ఓ ట్విస్ట్ ప్రేక్షకులను థ్రిల్ చేస్తుంది. ఇదే ఈ సినిమాకు అతిపెద్ద ప్లస్ పాయింట్ గా నిలుస్తోంది.

థియేటర్లలోనే కాదు ఓటీటీలోనూ మహారాజా మూవీ దూసుకెళ్లడానికి ప్రధాన కారణం ఈ సినిమాలోని ఊహించని ట్విస్టులే. మూవీలో విలన్ పాత్రలో బాలీవుడ్ దర్శకుడు అనురాగ్ కశ్యప్.. విజయ్ సేతుపతితో పోటీ పడి నటించాడు. ఈ ఇద్దరే సినిమాకు ప్రధాన బలం. ఓ చిన్న మిస్ అండర్‌స్టాండింగ్ ఈ ఇద్దరి జీవితాలను ఎలా పూర్తిగా మార్చేసిందన్నది మూవీలో చూడొచ్చు.

నెట్‌ఫ్లిక్స్ టాప్ ట్రెండింగ్ మూవీస్

నెట్‌ఫ్లిక్స్ టాప్ ట్రెండింగ్ సినిమాల్లో మహారాజా తొలి స్థానంలో కొనసాగుతుండగా.. రెండో స్థానంలో వైల్డ్ వైల్డ్ పంజాబ్, మూడో స్థానంలో శ్రీకాంత్, నాలుగో స్థానంలో ఆడుజీవితం హిందీ వెర్షన్, ఐదో స్థానంలో మహారాజ్, ఆరు, ఏడు స్థానాల్లో ఆడుజీవితం ఒరిజినల్ మలయాళం, తెలుగు వెర్షన్లు, 8వ స్థానంలో రాంపేజ్, 9వ స్థానంలో అన్‌చార్టెడ్, 10వ స్థానంలో ఆడుజీవితం తమిళ వెర్షన్లు ఉన్నాయి.