most watched show on OTT: ఓటీటీలో ఈ ఏడాది ఎక్కువ మంది చూసిన వెబ్ సిరీస్, సినిమా ఇవే
10 August 2023, 14:14 IST
Share
most watched show on OTT: ఓటీటీలో ఈ ఏడాది ఎక్కువ మంది చూసిన వెబ్ సిరీస్, సినిమా రెండూ ఒకే బాలీవుడ్ హీరోకి చెందినవి కావడం విశేషం. దీనిపై తాజాగా ఆ హీరో స్పందించాడు
ఫర్జీ సిరీస్‌లో షాహిద్ కపూర్
most watched show on OTT: ఓటీటీల్లో 2023లో ఎక్కువ మంది చూసిన వెబ్ సిరీస్, సినిమా ఏవో తెలుసా? నిజానికి ఈ రెండూ ఒకే బాలీవుడ్ హీరోకి చెందినవి. ఆ హీరో పేరు షాహిద్ కపూర్. అతడు బాలీవుడ్ లోకి వచ్చి రెండు దశాబ్దాలకుపైనే అయింది. కానీ అక్కడ రాని గుర్తింపు ఓటీటీల్లో నటించిన తర్వాత వచ్చింది. బాలీవుడ్ కు కాస్త బ్రేక్ ఇచ్చి డిజిటల్ ప్లాట్‌ఫామ్ వైపు చూసిన షాహిద్.. సక్సెస్ అందుకున్నాడు.
షాహిద్ కపూర్ నటించిన ఫర్జీ వెబ్ సిరీస్, బ్లడీ డాడీ మూవీ ఈ ఏడాది ఓటీటీల్లో ఎక్కువ మంది చూసిన సిరీస్, సినిమా కావడం విశేషం. ఆర్మాక్స్ రిపోర్ట్ ఈ విషయాన్ని వెల్లడించింది. అమెజాన్ ప్రైమ్ వీడియోలో ఉన్న ఫర్జీ వెబ్ సిరీస్ కు మంచి రెస్పాన్స్ వచ్చింది. తొలి రోజే పాజిటివ్ రివ్యూలు రావడంతో ఈ సిరీస్ ను ఎగబడి చూశారు.
ఆ తర్వాత జియో సినిమాలో వచ్చిన బ్లడీ డాడీ మూవీ కూడా సక్సెస్ అందుకుంది. నిజానికి ఈ సినిమాకు అంత మంచి రివ్యూలు రాకపోయినా.. అభిమానులకు మాత్రం బాగానే నచ్చింది. ఓటీటీల్లో తన షోలు దుమ్ము రేపుతుండటంపై షాహిద్ స్పందించాడు. పెద్ద స్టార్ అయినంత మాత్రాన మనం ఏం చేసినా ప్రేక్షకులు చూస్తారని అనుకోవడం సరికాదని అతడు అన్నాడు.
"ప్రేక్షకుల గౌరవం పొందడానికే నేనెప్పుడూ ప్రయత్నించాను. ఓ నటుడు, దర్శకుడు, క్రీడాకారుడు అయినా సరే అభిమానుల గౌరవం పొందినప్పుడే కెరీర్లో ముందడుగు వేస్తారని నేను నమ్ముతాను. స్టార్ అయినంత మాత్రాన ప్రేక్షకులు ఇష్టపడతారని అనుకోవడం కరెక్ట్ కాదు. ప్రేక్షకులు చాలా పరిణతి సాధించారు. వాళ్లకు ఏది ఇష్టమన్నదానిపై స్పష్టత ఉంది. ఓటీటీలో ప్రేక్షకులు నన్ను ఎలా చూస్తారో తెలుసుకోవాలని నాకు అనిపించింది" అని షాహిద్ చెప్పాడు.
ప్రతి ఒక్కరి కెరీర్లో ఒడిదుడుకులు ఉంటాయని, అయితే సినిమాల్లో సుదీర్ఘ కెరీర్ కావాలనుకుంటే ఒకటీ, రెండేళ్లు ఎదురు దెబ్బలు తిన్నా ఏమీ కాదని షాహిద్ అభిప్రాయపడ్డాడు. పెద్ద పెద్ద స్టార్లకు కూడా ఒక్కోసారి ఏం చేసినా వర్కౌట్ కాదని, మంచి పేరు సంపాదించడం ముఖ్యమని అన్నాడు.
వివాహ్, జబ్ వీ మెట్ లాంటి మూవీలతో స్టార్ డమ్ సంపాదించిన షాహిద్ కపూర్.. మధ్యలో కొన్నేళ్ల పాటు వరుస వైఫల్యాలతో సతమతమయ్యాడు. గత రెండేళ్లుగా మళ్లీ అతని కెరీర్ గాడిలో పడింది. ఫర్జీ వెబ్ సిరీస్, బ్లడీ డాడీ సినిమా షాహిద్ ఇమేజ్ ను పెంచాయి. ఇప్పుడతడు కృతి సనన్ తో కలిసి ఓ సినిమాలో నటిస్తున్నాడు. ఈ సినిమాకు ఇంకా టైటిల్ పెట్టలేదు.