Meiyazhagan OTT: రెండు రోజులు ముందుగానే ఓటీటీలోకి కార్తీ సూపర్ హిట్ సినిమా.. ఐదు భాషల్లో స్ట్రీమింగ్
22 October 2024, 19:22 IST
Share
- Meiyazhagan (Sathyam Sundaram) OTT Release Date: మేయళగన్ (తెలుగులో సత్యం సుందరం) సినిమా ఓటీటీ రిలీజ్ డేట్ మారింది. ముందు ప్రకటించిన తేదీ కంటే రెండు రోజులు ముందుగానే ఈ చిత్రం స్ట్రీమింగ్‍కు అడుగుపెట్టనుంది. స్ట్రీమింగ్ డేట్‍పై అధికారిక ప్రకటన వచ్చేసింది.
OTT Movie: రెండు రోజులు ముందుగానే ఓటీటీలోకి కార్తీ సూపర్ హిట్ సినిమా.. ఐదు భాషల్లో స్ట్రీమింగ్
తమిళ స్టార్ నటులు కార్తీ, అరవింద స్వామి ప్రధాన పాత్రలు పోషించిన మేయళగన్ చిత్రం ప్రశంసలు పొందడంతో పాటు కమర్షియల్‍గానూ సక్సెస్ అయింది. తెలుగులో ‘సత్యం సుందరం’ పేరుతో ఈ చిత్రం రిలీజైంది. తమిళంలో సెప్టెంబర్ 27న రిలీజైన ఈ చిత్రం.. తెలుగులో ఒకరోజు ఆలస్యంగా సెప్టెంబర్ 28న వచ్చింది. రెండు భాషల్లోనూ ఈ చిత్రం పాజిటివ్ టాక్ తెచ్చుకోవడంతో పాటు మంచి కలెక్షన్లను దక్కించుకుంది. ఈ సత్యం సుందరం చిత్రం నెలలోపే ఓటీటీలోకి అడుగుపెట్టనుంది.
స్ట్రీమింగ్ డేట్.. ఐదు భాషల్లో..
సత్యం సుందరం సినిమా అక్టోబర్ 25వ తేదీన నెట్‍ఫ్లిక్స్ ఓటీటీ ప్లాట్‍ఫామ్‍లో స్ట్రీమింగ్‍కు రానుంది. ఈ విషయాన్ని నెట్‍ఫ్లిక్స్ నేడు అధికారికంగా వెల్లడించింది. తమిళం, తెలుగుతో పాటు మలయాళం, కన్నడ, హిందీ భాషల్లో కూడా ఈ చిత్రం స్ట్రీమింగ్‍కు అడుగుపెట్టనుంది. ఐదు భాషల్లో స్ట్రీమ్ అవనుంది.
మేయళగన్ వచ్చేస్తున్నాడు.. అందరూ సిద్ధమేనా అంటూ సోషల్ మీడియాలో నెట్‍ఫ్లిక్స్ పోస్ట్ చేసింది. అక్టోబర్ 25న ఈ చిత్రం స్ట్రీమింగ్‍కు రానుందంటూ కార్తి, అరవింద స్వామి ఉన్న ఓ పోస్టర్ షేర్ చేసింది.
రెండు రోజులు ముందుగా..
సత్యం సుందరం చిత్రం అక్టోబర్ 27వ తేదీన స్ట్రీమింగ్‍కు వస్తుందని నెట్‍ఫ్లిక్స్ ముందుగా ప్రకటించింది. తన ప్లాట్‍ఫామ్‍లోనూ ఇదే డేట్‍ను లిస్ట్ చేసింది. అయితే, కొన్ని గంటల్లోనే తేదీని మార్చేసింది. రెండు రోజులు ముందుగా అక్టోబర్ 25వ తేదీన ఈ చిత్రాన్ని స్ట్రీమింగ్‍కు తీసుకురానున్నట్టు ప్రకటించింది.
ట్రిమ్ చేసిన వెర్షన్
రిలీజ్ తర్వాత కొన్ని రోజులకు సత్యం సుందరం సినిమా రన్‍టైమ్‍ను మూవీ టీమ్ తగ్గించింది. సాగదీతగా ఉందని టాక్ రావటంతో ఇలా చేసింది. 18 నిమిషాల నిడివిని తగ్గించేసింది. నెట్‍ఫ్లిక్స్ ఓటీటీలో కూడా ఈ మూవీ ట్రిమ్డ్ వెర్షనే స్ట్రీమింగ్‍కు రానుంది. 2 గంటల 38 నిమిషాల రన్‍టైమ్‍తో నెట్‍ఫ్లిక్స్ ఓటీటీలో ఈ మూవీ స్ట్రీమింగ్ అవనుంది.
సత్యం సుందరం చిత్రానికి ‘96’ మూవీ ఫేమ్ సి.ప్రేమ్ కుమార్ దర్శకత్వం వహించారు. మరోసారి ఫీల్ గుడ్ మూవీతో ప్రేక్షకులను మెప్పించారు. ఈ చిత్రానికి పాజిటివ్ రెస్పాన్స్ వచ్చింది. ఈ చిత్రంలో కార్తీ, అరవింద స్వామితో పాటు రాజ్‍కిరణ్, శ్రీదివ్య, దివ్యదర్శిని, స్వాతి కొండె, జయప్రకాశ్, శ్రీరంజనీ కీలకపాత్రలు పోషించారు.
కలెక్షన్లు ఇలా..
సత్యం సుందరం మూవీకి గోవింద్ వసంత సంగీతం అందించారు. 2డీ ఎంటర్టైన్మెంట్ పతాకంపై సూర్య, జ్యోతిక ఈ చిత్రాన్ని ప్రొడ్యూజ్ చేశారు. సుమారు రూ.35కోట్ల బడ్జెట్‍తో ఈ మూవీ రూపొందింది. దాదాపు రూ.60కోట్ల గ్రాస్ కలెక్షన్లను దక్కించుకుంది.
కాగా, నెట్‍ఫ్లిక్స్ ఓటీటీ ప్లాట్‍ఫామ్‍లో అక్టోబర్ 25వ తేదీనే ‘దో పత్తీ’ చిత్రం కూడా స్ట్రీమింగ్‍కు రానుంది. ఈ క్రైమ్ థ్రిల్లర్ చిత్రంలో కృతి సనన్, కాజోల్ ప్రధాన పాత్రలు పోషించారు. ఈ మూవీ థియేటర్లలో కాకుండా నేరుగా ఓటీటీలోకి వచ్చేస్తోంది. దో పత్తీ మూవీ హిందీ, తెలుగు, ఇంగ్లిష్‍లో అందుబాటులోకి రానుంది. ఈ చిత్రంలో కృతి డ్యుయల్ రోల్స్ చేశారు.