Karthi on Devara: నా బ్రదర్ ఎన్టీఆర్ సినిమా పెద్ద హిట్ కొట్టాలి: సత్యం సుందరం ఈవెంట్‍లో తమిళ స్టార్ హీరో కార్తి

తమిళ స్టార్లు కార్తి, అరవింద స్వామి ప్రధాన పాత్రలు పోషించిన ఎమోషనల్ డ్రామా మూవీ సత్యం సుందరం సెప్టెంబర్ 28న థియేటర్లలో రిలీజ్ కానుంది. ఈ మూవీ తెలుగు వెర్షన్ కోసం ప్రీ-రిలీజ్ నేడు (సెప్టెంబర్ 23) హైదరాబాద్‍లో జరిగింది. ఈ ఈవెంట్‍లో కార్తి మాట్లాడారు. 

సెప్టెంబర్ 27వ తేదీన తన బ్రదర్ ఎన్టీఆర్ సినిమా దేవర రానుందని, ఆ చిత్రం పెద్ద హిట్ కొట్టాలని తాను ఆశిస్తున్నానని కార్తి అన్నారు. దేవరతో పోలిస్తే తమ సత్యం సుందరం చిన్నదేనని, కానీ చాలా మనసు పెట్టి చేశామమని, అందరికీ నచ్చుతుందని అన్నారు.

“27న నా బ్రదర్ సినిమా రాబోతోంది. తారక్‍కు, ఆయన అభిమానులకు విష్ చేస్తున్నా. పెద్ద హిట్ కొట్టాలి. ఆరేళ్ల తర్వాత సోలో సినిమా రాబోతోందంటే ఎంత అంచనాలు ఉంటాయో నాకు తెలుసు” అని కార్తి అన్నారు. 

దేవర చిత్రం యుద్ధం లాంటి పెద్ద మూవీ అని కార్తి చెప్పారు. “అది (దేవర) వార్‌ఫేర్ లాంటి పెద్ద సినిమా. మనదేమో (సత్యం సుందరం) సిరిమల్లె చెట్టులాగా చిన్న సినిమా అని చెప్పవచ్చు. కానీ చాలా మనసుతో ఈ మూవీ చేశాం. 28వ తేదీ ఈ సినిమా కూడా చూస్తారని నమ్ముతున్నా. మీకు నచ్చుతుంది” అని కార్తి చెప్పారు.  

సత్యం సుందరం మూవీకి ప్రేమ్ కుమార్ దర్శకత్వం వహించారు. కార్తి, అరవింద స్వామి.. బావబామ్మరుదులుగా నటించారు. ఈ మూవీ ట్రైలర్ సరదాగా ఎమోషనల్‍గా హృదయాలను హత్తుకునేలా ఉంది. సెప్టెంబర్ 28న తమిళంతో పాటు తెలుగులోనూ ఈ మూవీ రిలీజ్ అవుతోంది.