KA OTT: మరికొన్ని గంటల్లోనే ఓటీటీలోకి కిరణ్ అబ్బవరం క మూవీ.. ఏ ప్లాట్‌ఫామ్‌లో స్ట్రీమింగ్‌కానుందంటే?

KA OTT Release Date: యంగ్ హీరో కిరణ్ అబ్బవరం నటించిన మిస్టరీ థ్రిల్లర్ మూవీ ‘క’ మరి కొన్ని గంటల్లోనే ఓటీటీలోకి రాబోతోంది. సుజీత్‌ - సందీప్‌ దర్శకత్వంలో తెరకెక్కిన ఈ సినిమా దీపావళి కానుకగా థియేటర్లలోకి వచ్చి పాజిటివ్ మౌత్ టాక్‌తో ఎవరూ ఊహించని విధంగా బాక్సాఫీస్ వద్ద వసూళ్లని రాబట్టింది. క సినిమాలో కిరణ్ అబ్బవరానికి జోడీగా నయన్‌ సారిక నటించగా.. తన్వీ రామ్‌, అచ్యుత్‌కుమార్‌, రెడిన్‌ కింగ్‌స్లే కీలక పాత్రలు పోషించారు. చింతా గోపాలకృష్ణ ఈ సినిమాని నిర్మించారు.

క కథ ఏంటంటే?

అనాథగా ఉన్న అభినయ వాసుదేవ (కిరణ్ అబ్బవరం) ఆశ్రమంలో ఇతరులకి వచ్చే ఉత్తరాలను దొంగతనంగా చదువుతుంటాడు. ఈ విషయం మాస్టర్‌కి తెలిసిపోవడంతో కొట్టాడని ఆశ్రమం నుంచి పారిపోతాడు. కానీ ఆ ఉత్తరాలు చదివే అలవాటు కారణంగా.. కృష్ణగిరిలో కాంట్రాక్ట్ పోస్ట్‌మెన్‌గా చేరి అందరికీ వచ్చే ఉత్తరాలను చదువుతుంటాడు. ఈ క్రమంలో పోస్ట్ మాస్టర్‌గా ఉన్న రంగారావు (అత్యుత్ కుమార్)‌తో సాన్నిహిత్యం పెరిగి అతని కూతురు సత్యభామ (నయన సారిక)తో ప్రేమలో పడతాడు.

ఉత్తరంలో క్లూ

కానీ.. కృష్ణగిరిలో ఒక సమస్య ఉంటుంది. ఈ ఊరిలో ఉండే అమ్మాయిలు ఒక్కొక్కరు కనిపించకుండా పోతుంటారు. అదే సమయంలో.. అభినయ వాసుదేవ‌కి ఆ మిస్సింగ్ మిస్టరీ గురించి ఒక ఉత్తరంలో చిన్న క్లూ దొరుకుతుంది. ఇక అక్కడి నుంచి వాసుదేవ్ ఆ సమస్యని ఎలా పరిష్కరిస్తాడు అనేది సినిమా. అమ్మాయిలు ఎలా కనిపించకుండా పోయారు? టీచర్ రాధ (తన్వి రామ్)ను ముసుగు వ్యక్తి ఎందుకు కిడ్నాప్ చేశాడు? అసలు అతను ఎవరు? ఊరి సమస్యని అభినయ వాసుదేవ ఎలా పరిష్కరించాడు..? తన ప్రేమని ఎలా దక్కించుకున్నాడు? అనేది కథ.

ఐఎండీబీలో క మూవీకి బెస్ట్ రేటింగ్

క సినిమా రూ.22 కోట్ల బడ్జెట్‌తో తెరకెక్కగా.. బాక్సాఫీస్ వద్ద రూ.40 కోట్ల వరకూ వసూళ్లని రాబట్టింది. క సినిమా విడుదలైన రోజే.. అమరన్, లక్కీ భాస్కర్ సినిమాలు కూడా రిలీజ్ అయ్యాయి. ఈ రెండింటికీ కూడా హిట్ టాక్ వచ్చినా.. పోటీపడి క సినిమా థియేటర్లలో నిలబడింది. కిరణ్ అబ్బవరం కెరీర్‌లోనే ఇప్పటి వరకు అత్యుత్తమ సినిమాగా క నిలిచింది. క సినిమాకి 10 పాయింట్లకిగానూ ఐఎండీబీలో 7.4 రేటింగ్ రావడం గమనార్హం.

క ఎక్కడ స్ట్రీమింగ్‌కానుందంటే?

క సినిమా ఓటీటీలోకి నవంబరు 28 (గురువారం) రాబోతోంది. ఈటీవీ విన్‌లో ఈ సినిమా స్ట్రీమింగ్‌కాబోతుండగా.. ఈ మేరకు ఇప్పటికే అధికారిక ప్రకటన కూడా వచ్చేసింది. మిస్టరీ థ్రిల్లర్ సినిమాలంటే చూసేవారు కాదు.. ఫ్యామిలీ ఆడియెన్స్ కూడా క సినిమా చూసి ఎంజాయ్ చేయవచ్చు.