Most Popular Stars: మోస్ట్ పాపులర్ ఇండియన్ స్టార్స్-2024 జాబితాలో తెలుగు హీరోకి ఛాన్స్.. టాప్-10లో ఏడుగురు హీరోయిన్స్

ఈ ఏడాది ఇండియన్ మోస్ట్ పాపులర్ స్టార్స్ జాబితాలో టాలీవుడ్ హీరో‌కి ఛాన్స్ దక్కింది. ఐఎండీబీ నిర్వహించే ఈ సర్వేలో గత కొన్నేళ్లుగా బాలీవుడ్ నటులు ఆధిపత్యం చెలాయిస్తూ వచ్చారు. టాప్-10లోనూ షారూక్ ఖాన్, సల్మాన్ ఖాన్, దీపికా పదుకొణె, రణబీర్ కపూర్ తదితరులు కనిపించేవారు. కానీ.. ఈసారి సౌత్ నుంచి కూడా కొంత మంది స్టార్స్‌కి ఈ టాప్-10 జాబితాలో చోటు దక్కింది.

ఐఎండీబీ ర్యాంకింగ్స్

ఐఎండీబీ ఈ ర్యాంకింగ్ జాబితాను తాజాగా విడుదల చేసింది. ప్రపంచ వ్యాప్తంగా 250 మిలియన్లకు పైగా సినిమా ప్రేక్షకుల అభిప్రాయాలను, ఇంటర్నెట్‌లో యాక్టర్స్ గురించి నెటిజన్లు శోధించిన తీరుని పరిగణలోకి తీసుకుని ఐఎండీబీ ఈ ర్యాంకింగ్స్‌ను ప్రకటించింది. ఈ జాబితాలో యానిమల్ సినిమాతో నేషనల్ క్రష్‌గా మారిపోయిన తృప్తి దిమ్రి టాప్‌లో నిలవగా.. టాప్-10లో సమంత, శోభిత ధూళిపాళ్ల, ప్రభాస్ తదితరులు నిలిచారు.

మోస్ట్ పాపులర్ ఇండియన్ స్టార్స్ -2024లో టాప్-10లో నిలిచిన యాక్టర్స్

• 1. తృప్తి దిమ్రి
• 2. దీపికా పదుకొణె
• 3. ఇషాన్ ఖత్తర్
• 4. షారూక్ ఖాన్
• 5. శోభిత ధూళిపాళ్ల
• 6. శార్వరి
• 7. ఐశ్వర్యరాయ్ బచ్చన్
• 8. సమంత
• 9. అలియా భట్
• 10. ప్రభాస్

తృప్తి దిమ్రి.. కాలా, బుల్ బుల్, యానిమల్, లైలా మజ్ను, భూల్ భులైయా 3 వంటి చిత్రాల్లో నటించి యూత్‌లో మంచి క్రేజ్ సంపాదించుకుంది. 29 ఏళ్ల ఇషాన్ ఖట్టర్ బియాండ్ ది క్లౌడ్స్ (2017), ఎ సూటబుల్ బాయ్ (2020) చిత్రాల్లో నటించి.. అంతర్జాతీయ సిరీస్ ది పర్ఫెక్ట్ కపుల్‌లో నికోల్ కిడ్మన్ సరసన నటించడం ద్వారా ప్రపంచవ్యాప్తంగా ఫేమస్ అయ్యారు.

పఠాన్, జవాన్, డంకీ సినిమాల తర్వాత గత ఏడాది టాప్‌లో నిలిచిన షారుఖ్ ఖాన్ .. ఈ ఏడాది నాలుగో స్థానానికి పడిపోయారు. ఇక శోభిత ధూళిపాళ్ల మంకీ మ్యాన్ చిత్రంతో హాలీవుడ్‌లో అరంగేట్రం చేసి లవ్- సితారలో ఇటీవల నటించారు. నాగచైతన్యతో నిశ్చితార్థం, వివాహంతో ఆమె పాపులారిటీ మరింత పెరిగింది. సమంత ఇటీవల ‘సిటాడెల్: హనీ బన్నీ’ వెబ్ సిరీస్‌లో నటించి తన పాపులారిటీని పెంచుకుంది. అలానే నాగచైతన్య పెళ్లి టాపిక్ వచ్చిన ప్రతిసారి సమంత అప్‌డేట్స్ కోసం నెటిజన్లు తెగ వెతికారు. ప్రభాస్ కల్కి 2898 AD సినిమాతో దేశవ్యాప్తంగా తన పాపులారిటీని మరింత పెంచుకున్నారు.