Surender Reddy Injured: డైరెక్టర్ సురేందర్ రెడ్డికి గాయం.. ఏమైందంటే?

Surender Reddy Injured: టాలీవుడ్ ప్రముఖ దర్శకుడు సురేందర్ రెడ్డి ప్రస్తుతం ఏజెంట్ చిత్రంతో బిజీగా ఉంటున్న సంగతి తెలిసిందే. అక్కినేని అఖిల్ హీరోగా నటిస్తున్న ఈ సినిమా షూటింగ్ శరవేగంగా జరుగుతోంది. తాజాగా దర్శకుడు సురేందర్ రెడ్డి ఈ సినిమా సెట్‌లో గాయపడ్డారు. ఈ మూవీ చిత్రీకరణ హైదరాబాద్‌లో జరుగుతోంది. ఇందులో భాగంగా సురేందర్ రెడ్డి కాలికి గాయమైంది. దీంతో ఆయనను వెంటనే ఆసుపత్రికి తరలించి చికిత్స అందించి.

ఏజెంట్ చిత్రీకరణ సమయంలో ఓ ఇనుప చువ్వ బలంగా సురేందర్ రెడ్డి కాలికి తగలడంతో ఆయనకు గాయమైనట్లు చిత్రవర్గాలు తెలిపాయి. వెంటనే ఆసుపత్రికి తరలించి చికిత్స అందించారు. కాలుకు కట్టుకట్టిన వైద్యులు కొంతకాలం విశ్రాంతి తీసుకోవాలని సూచించారు. అయితే ఏజెంట్ షూటింగ్‌ను వీలైనంత త్వరగా పూర్తి చేయాలనే దృఢ నిశ్చయంతో ఉన్న సురేందర్ రెడ్డి కాలికి కట్టుతోనే పనిచేస్తున్నారు. ప్రస్తుతం పోస్ట్ ప్రొడక్షన్స్‌కు సంబంధించిన పనులను పర్యవేక్షిస్తున్నారు.

ఈ సినిమా ఇప్పటికే ఆలస్యం కాగా.. వీలైనంత త్వరగా పూర్తి చేయాలని టీమ్ భావిస్తోంది. ఈ ఏడాది వేసవికి సినిమాను విడుదల చేయనున్నట్లు ఇప్పటికే ప్రకటించిన తరుణంలో చిత్రీకరణ పనులు వేగవంతం చేశారు. దాదాపు సినిమా షూటింగ్ పూర్తవడంతో పోస్ట్ ప్రొడక్షన్స్ పనులు చూస్తున్నారు.

ఏకే ఎంటర్‌టైన్మెంట్స్ పతాకంపై అనిల్ సుంకర ఈ సినిమాను నిర్మిస్తున్నారు. వక్కంతం వంశీ కథను అందిస్తున్నారు. సాక్షి వైద్య ఈ చిత్రంలో హీరోయిన్‌గా నటిస్తోంది. ధ్రువ సినిమాకు అదిరిపోయే మ్యూజిక్ ఇచ్చిన హిప్ హాప్ తమిళన్ ఈ చిత్రానికి సంగీతాన్ని సమకూరుస్తున్నారు. సైరా లాంటి హిస్టారికల్ హిట్ తర్వాత సురేందర్ రెడ్డి దర్శకత్వం వహిస్తున్న ఈ సినిమాపై అక్కినేని అభిమానులతో పాటు సాధారణ ప్రేక్షకులకు కూడా భారీగా అంచనాలు ఉన్నాయి. ఈ వేసవికి ప్రపంచ వ్యాప్తంగా ప్రేక్షకుల ముందుకు రానుందీ చిత్రం.