Bigg Boss 8 Telugu Promo: రోహిణికి గంగవ్వ పంచ్.. అంట్లు తోమిన అవినాష్.. కడుపుబ్బా నవ్విస్తున్న వైల్డ్ కార్డ్ ఎంట్రీస్

Bigg Boss 8 Telugu Promo: బిగ్ బాస్ 8 తెలుగులోకి వైల్డ్ కార్డ్ ఎంట్రీస్ ఓ కొత్త ఎనర్జీని తీసుకొచ్చినట్లు కనిపిస్తోంది. ఆదివారం ఎపిసోడ్ లో ఏకంగా గత సీజన్లలో పార్టిసిపేట్ చేసిన 8 మంది.. వైల్డ్ కార్డు ఎంట్రీలుగా హౌజ్ లోకి అడుగుపెట్టిన సంగతి తెలుసు కదా. వీళ్లు వచ్చీ రాగానే సందడి మొదలుపెట్టారు. వాళ్లతో కలిసిపోయిన ఈ సీజన్ కంటెస్టెంట్లు.. నవ్వులు పూయిస్తున్నట్లుగా తాజా ప్రోమో చూస్తే తెలుస్తోంది.

బిగ్ బాస్ 8 తెలుగు లేటెస్ట్ ప్రోమో

బిగ్ బాస్ 8 తెలుగు సోమవారం (అక్టోబర్ 7) ఎపిసోడ్ కు సంబంధించి ప్రోమో రిలీజ్ చేశారు. ఇది మొత్తం ఎంతో ఫన్నీగా సాగిపోయింది. ఇంట్లో పాలు కూడా లేవంటూ హౌజ్ మేట్స్ కూర్చొని మాట్లాడుకుంటూ ఉండగా.. గంగవ్వ వేసిన పంచ్ తో అందరూ గట్టిగా నవ్వేశారు. మేమున్నప్పుడు మస్తు పాలు ఉంటుండె.. ఇప్పుడెందుకు లేవంటూ గంగవ్వ అడుగుతుంది.

పెద్ద మనిషి పాణం.. బరబర అంటది అని గంగవ్వ అంటుంది. అప్పుడే ఆమె ముందే కూర్చున్న రోహిణి.. నేను కూడా పెద్ద మనిషినే అంటుంది. దానికి గంగవ్వ రియాక్ట్ అవుతూ.. ఎంతమందిని కన్నవ్ అని అడగడంతో అక్కడున్న వాళ్లంతా గట్టిగా నవ్వేస్తారు.

అంట్లు తోమిన అవినాష్

ఇక వైల్డ్ కార్డ్ ఎంట్రీస్ ఒకడైన కమెడియన్ అవినాష్ కూడా వచ్చీ రాగానే నవ్వించడం మొదలుపెట్టాడు. అంట్లు తోమడానికి తనకు కొత్త పార్ట్‌నర్ దొరకడంతో ఇద్దరం షేర్ చేసుకొని కడిగేద్దాం అంటూ నాగ మణికంఠ అతనికి చెబుతాడు. మరి మీరు ఎక్కువ వంట చేసుకొని.. ఎక్కువ గిన్నెలేస్తే ఎలా అని అవినాష్ అడుగుతాడు.

హౌజ్ లోకి రాగానే గిన్నెల కడిగిపిస్తున్నరు.. ఏదో యుద్ధానికి పోతున్నట్లు చప్పట్లు కొట్టి ఎంకరేజ్ చేస్తున్నరు అంటూ కెమెరా ముందుకు వచ్చి అతడు కంప్లైంట్ చేస్తాడు. తర్వాత తోమ్.. తోమ్.. తోమ్.. అంటూ అందరూ కలిసి గిన్నెలు కడుగుతూ ఉంటారు. ఇలా ఈరోజు ఎపిసోడ్ అంతా చాలా సరదాగా సాగిపోనున్నట్లు ప్రోమో చూస్తే స్పష్టమవుతోంది.

వైల్డ్ కార్డ్ ఎంట్రీస్ వీళ్లే..

బిగ్ బాస్ 8 తెలుగులో ఏకంగా 8 మంది మాజీ కంటెస్టెంట్లను వైల్డ్ కార్డు ఎంట్రీస్ గా హౌజ్ లోకి తీసుకొచ్చి ఇప్పటి కంటెస్టెంట్లకు షాకిచ్చిన విషయం తెలిసిందే. ఇప్పటికే హౌజ్ లో 8 మంది ఉండటంతో ఇప్పుడు మొత్తం 16 మందితో మళ్లీ సందడిగా మారింది.

వైల్డ్ కార్డు ఎంట్రీస్ లో వచ్చిన వాళ్లలో.. తొలి సీజన్ లో పాల్గొన్న హరితేజ, ఏడో సీజన్ లో పాల్గొన్న టేస్టీ తేజ, నయని పావని, గౌతమ్ కృష్ణ.. నాలుగో సీజన్ లో కనిపించిన గంగవ్వ, అవినాష్, మహబూబ్, మూడో సీజన్ లో వచ్చిన రోహిణి ఉన్నారు. గంగవ్వ, అవినాష్, రోహిణిలాంటి వాళ్ల ఎంట్రీతో హౌజ్ లో ఫైట్స్ తోపాటు కామెడీ కూడా పండనుంది.

బిగ్‍బాస్ 8వ సీజన్‍లో హౌస్‍లో ఇప్పటికే నిఖిల్, పృథ్విరాజ్, సీత, యష్మి, నబీల్ ఆఫ్రిది, విష్ణుప్రియ, మణికంఠ, ప్రేరణ ఉన్నారు. వీరి క్లాన్‍కు 'ఒరిజినల్ గ్యాంగ్‍స్టర్స్ (ఓజీ)' అని పేరు పెట్టుకున్నారు. ఇక వైల్డ్ కార్డ్ ఎంట్రీలుగా వచ్చిన ఈ ఎనిమిది మంది క్లాన్ పేరు ‘రాయల్’ అని ఫిక్స్ అయింది.