Bigg Boss 8 Telugu: హౌస్‍లో అడుగుపెట్టిన 8 మంది వైల్డ్ కార్డ్ కంటెస్టెంట్లు .. ఏ సీజన్ నుంచి ఎవరు? టాస్క్ గెలిచిన గంగవ్వ

బిగ్‍బాస్ తెలుగు 8వ సీజన్‍లో సీన్ పూర్తిగా మారిపోయింది. వైల్డ్ కార్డ్ ఎంట్రీల ద్వారా ఎనిమిది మంది కంటెస్టెంట్లు హౌస్‍లోకి అడుగుపెట్టారు. నేడు ఆదివారం (అక్టోబర్ 6) జరిగిన రీలోడ్ ఈవెంట్ ద్వారా వీరు హౌస్‍లోకి వచ్చేశారు. ఈ ఎనిమిది మంది బిగ్‍బాస్‍లో గత సీజన్లలో ఆడిన వారే కావడంతో మరింత ఆసక్తికరంగా ఉంది. నైనిక ఎలిమినేట్ కావటంతో హౌస్‍లో ఎనిమిది మంది మిగిలారు. ఇక, ఇప్పుడు మరో ఎనిమిది మంది హౌస్‍లో ఎంట్రీ ఇచ్చారు. వారిని హౌస్ట్ కింగ్ నాగార్జున పరిచయం చేశారు. వైల్డ్ కార్డ్ ద్వారా 8వ సీజన్‍లోకి వచ్చింది ఎవరో ఇక్కడ తెలుసుకోండి.

బిగ్‍బాస్ 8లో వైల్డ్ కార్డ్ కంటెస్టెంట్లు వీరే..

హరితేజ - సీజన్ 1

సినీ నటి హరితేజ బిగ్‍బాస్ మొదటి సీజన్‍లోనే అదరగొట్టారు. ఆ సీజన్‍లో సెకండ్ రన్నరప్‍గా మూడో ప్లేస్ దక్కించుకున్నారు. ఇప్పుడు వైల్డ్ కార్డ్ ద్వారా ఎనిమిదో సీజన్‍లో ఎంట్రీ ఇచ్చారు. ఈ సీజన్‍లో కత్తి, సుత్తి ఎవరు అని హోస్ట్ నాగార్జున అడిగారు. నబీల్ కత్తి అని, సుత్తులు చాలా మంది ఉన్నారని హరితేజ చెప్పారు. స్టేజ్‍పై తన కూతురిని చూసి ఎమోషనల్ అయ్యారు.

టేస్టీ తేజ - సీజన్ 7

బిగ్‍బాస్ తెలుగు 7వ సీజన్‍లో యూట్యూబర్ తేజ ఆడారు. తొమ్మిది వారాల్లో ఎలిమినేట్ అయ్యారు. ఇటీవల తేజ పాపులారిటీ మరింత పెరిగింది. ఈ 8వ సీజన్‍లో వెరైటీ ఏవీతో ఎంట్రీ ఇచ్చారు.

నయని పావని - సీజన్ 7

బిగ్‍బాస్ 7వ సీజన్‍లో వైల్డ్ కార్డ్ ద్వారానే సీరియల్ నటి నయని పావని అడుగుపెట్టారు. అయితే, వచ్చిన వారానికే ఎలిమినేట్ అయ్యారు. అయితే, ఆమెకు ఈ సీజన్ 8లో మళ్లీ వైల్డ్ కార్డ్ ద్వారానే ఛాన్స్ దక్కింది. నయని హౌస్‍లో అడుగుపెట్టారు.

మహబూబ్ - సీజన్ 4

పాపులర్ యూట్యూబర్ ‘దిల్‍సే’ మహబూబ్ బిగ్‍బాస్‍లోకి రీ ఎంట్రీ ఇచ్చేశారు. నాలుగో సీజన్‍లో తన ఆటతో మెప్పించారు మహబూబ్. 70వ రోజు ఎలిమినేట్ అయ్యారు. ఆ తర్వాత మంచి ఫేమ్ తెచ్చుకున్నారు. ఈ 8వ సీజన్‍కు మహబూబ్ వైల్డ్ కార్డ్ ఎంట్రీగా వచ్చారు.

రోహిణి - సీజన్ 3

బిగ్‍బాస్ మూడో సీజన్‍లో నటి రోహిణి మెప్పించారు. అప్పటితో పోలిస్తే ఇప్పుడు ఆమె పాపులారిటీ చాలా రెట్లు పెరిగింది. 8వ సీజన్‍లో వైల్డ్ కార్డ్ కంటెస్టెంట్‍గా ఆడుగుపెట్టిన రోహిణి ఎలా ఆడతారో అనే ఆసక్తి ఉంది.

గౌతమ్ కృష్ణ - సీజన్ 7

యంగ్ హీరో గౌతమ్ కృష్ణకు బిగ్‍బాస్ తెలుగు 7వ సీజన్‍లో అగ్రెషన్‍తో ఆకట్టుకున్నారు. హోరాహోరీగా ఆడారు. ఓసారి బయటికి వెళ్లి రీఎంట్రీ ఇచ్చారు. ఇప్పుడు.. బిగ్‍బాస్ తెలుగు 8వ సీజన్‍లో వైల్డ్ కార్డ్ ఎంట్రీగా హౌస్‍లోకి ఎంటర్ అయ్యారు గౌతమ్ కృష్ణ.

అవినాశ్ - సీజన్ 4

బజర్దస్త్ కామెడీ షోతో పాపులర్ అయిన కమెడియన్ అవినాశ్.. బిగ్‍బాస్ తెలుగు 4వ సీజన్‍లో ఎంటర్‌టైన్‍మెంట్ బాగానే పంచారు. ఇతర కంటెస్టెంట్లగు గట్టిపోటీ ఇచ్చారు. ఇప్పుడు 8వ సీజన్‍లో వైల్డ్ కార్డ్ ద్వారా హౌస్‍లో అడుగుపెట్టారు.

గంగవ్వ - సీజన్ 4

యూట్యూబ్ ఛానెల్ ‘మై విలేజ్ షో’తో పాపులర్ అయిన గంగవ్వ బిగ్‍బాస్ 4వ సీజన్‍లో ఆడారు. అయితే, ఆరోగ్య కారణాలతో మధ్యలోని నిష్క్రమించారు. అయితే, ఇప్పుడు మళ్లీ 8వ సీజన్‍లో ఆమె అడుగుపెట్టారు. దీంతో గంగవ్వ ఈసారి హౌస్‍లో ఎలా ఆడతారోననే ఆసక్తి ఉంది.

క్లాన్‍లు ఇలా..

బిగ్‍బాస్ 8వ సీజన్‍లో హౌస్‍లో ఇప్పటికే నిఖిల్, పృథ్విరాజ్, సీత, యష్మి, నబీల్ ఆఫ్రిది, విష్ణుప్రియ, మణికంఠ, ప్రేరణ ఉన్నారు. వీరి క్లాన్‍కు 'ఒరిజినల్ గ్యాంగ్‍స్టర్స్ (ఓజీ)' అని పేరు పెట్టుకున్నారు. ఇక వైల్డ్ కార్డ్ ఎంట్రీలుగా వచ్చిన ఈ ఎనిమిది మంది క్లాన్ పేరు ‘రాయల్’ అని ఫిక్స్ అయింది.

టాస్క్ గెలిచిన గంగవ్వ

ఓజీ, రాయల్ క్లాన్‍ల మధ్య పవర్స్ కోసం ఇప్పటికే నాలుగు ఛాలెంజ్‍లు జరిగాయి. ఇందులో మూడింట్లో వైల్డ్ కార్డ్ ‘రాయల్’ క్లాన్ విజయం సాధించింది. ఓజీ ఒకటి గెలిచింది. నాలుగో టాస్కులో గంగవ్వ, అవినాశ్ కలిసి ఆడారు. బాస్కెట్‍ బాల్‍ను తలసాయంతో ఇద్దరూ కలిసి తీసుకెళ్లి మరోవైపున ఉన్న బాక్స్‌లో వేయడమే ఈ గేమ్. ఓజీ క్లాన్ తరఫున సీత, విష్ణు ప్రియ గేమ్ ఆడగా.. రాయల్ క్లాన్ నుంచి గంగవ్వ, అవినాశ్ ఆడారు. ఎక్కువ బంతులను బాస్కెట్‍లో వేసిన గంగవ్వ, అవినాశ్ ఈ చాలెంజ్ గెలిచారు. హౌస్‍లో తన తొలి రోజే టాస్కులో చురుగ్గా పాల్గొని, గెలిచి గంగవ్వ వారెవా అనిపించారు.