Bigg Boss 7 Telugu : తేజకు జైలు శిక్ష.. గౌతమ్‍కు నాగ్ క్లాస్.. సంచాలక్‍గా సందీప్ అట్టర్ ఫ్లాప్

బిగ్ బాస్ 7 తెలుగులో తాజా వీకెండ్ ఎపిసోడ్ కాస్త ఆసక్తిగా సాగింది. నాగర్జున ఫస్ట్ టైమ్ ఎపిసోడ్ అంతా గరం గరంగా ఉన్నారు. రావడమే ఏ బెల్టు పట్టుకుని వచ్చారు. దీనికి కారణం టేస్టీ తేజ ప్రవర్తన. స్మైలీ ఫేస్ టాస్క్ లో గౌతమ్ పట్ల అతడు చేసిన పనికి నాగర్జున చాలా కోపంగా ఉన్నారు. రాగానే ఇదే విషయంపై మాట్లాడారు. మెుదట సంచాలకులు అయిన సందీప్, శివాజీకి క్లాస్ పీకారు.

సందీప్ సంచాలక్‍గా విఫలమయ్యాడని చెప్పాడు నాగర్జున. శివాజీ న్యాయం వైపు నిలుచుంటావని అనుకున్నానని కానీ ఆ నమ్మకం లేదని అన్నారు. టాస్క్ జరుగుతుండగా గౌతమ్ గొంతుకు తేజ బెల్ట్ వేసి ఆపడంపై మండిపడ్డారు. అలాంటి ప్రమాదకరంగా బిహేవ్ చేయెుద్దని చెప్పారు. అంత జరుగుతుంటే.. చూస్తూ ఊరుకోవడం ఏంటని సందీప్‍ను ప్రశ్నించాడు. నువ్ గుడ్డివాడివా అని అడిగారు. సందీప్ చేసింది చాలా పెద్ద తప్పు అని సీరియస్ అయ్యారు. సంచాలక్‍గా సైలెంట్‍గా ఉండటం కరెక్ట్ కాదని తెలిపారు నాగర్జున. సందీప్ ఏదో చెప్పే ప్రయత్నం చేశాడు కానీ నాగర్జున వినిపించుకోలేదు.

ఇక శివాజీని కూడా ఇదే విషయంపై క్లాస్ పీకారు నాగ్. నువ్ న్యాయం వైపు నిలబడతావనే నమ్మకం ఉండేదని, కానీ అలా చేయడం లేదు అని అడిగారు. టేస్టీ తేజను గౌతమ్ ఆపుతుంటే.. కెమెరాకు అడ్డురావొద్దని చెప్పావ్ అని, కానీ తేజ అలా గౌతమ్ గొంతుకు బెల్ట్ వేస్తుంటే.. పట్టించుకోలేదు ఎందుకు అని ప్రశ్నించారు. అమ్మాయిలు ఆ విషయం గురించి గట్టిగా అరిచారని తెలిపారు. అయినా వినిపించుకోలేదని తేజను లేపి అడిగారు.

అది ఎంకరేజ్మెంట్ అని అనుకున్నానని తేజ చెప్పాడు. నువ్ కావాలనే చేసినట్టుగా ఉందని నాగ్ చెప్పారు. ఈ విషయంపై ఓటింగ్ నిర్వహించగా.. ఎక్కువ మంది తేజకు వ్యతిరేకంగా ఓటు వేశారు. ఏం చేద్దామని అందరిని అడిగారు నాగ్. జైలు శిక్ష, ఇంట్లో పని అని అందరూ చెప్పారు. ఒక్క సందీప్ మాత్రం.. ఇంటికి పంపించేద్దామని చెప్పగా.. ఆ విషయం ఆడియన్స్ చూసుకుంటారని, చూస్తూ ఉన్న నిన్ను కూడా పంపించేయాలని కదా అని షాక్ ఇచ్చారు నాగర్జున.

నామినేషన్స్ సమయంలో గౌతమ్ ను నామినేట్ చేస్తూ.. ప్రశాంత్ చెప్పిన కారణాన్ని ప్రస్తావించారు నాగ్. శోభా శెట్టిని అలా చూపించడం కరెక్ట్ కాదు కదా అన్నారు. అసలు నువ్ అలానే షేపులు అంటూ సంజ్ఞ చేశావా అని అడిగారు. లేదు అని మరోసారి చెప్పాడు గౌతమ్. వీడియో చూపించగా అందులో సంజ్ఞ చేసినట్టుగానే ఉంది. ఇదే విషయంపై గౌతమ్ చేసిన పని కరెక్టేనా అని రతికను అడగ్గా.. కరెక్టే అని ఆమె చెప్పింది. శుభ శ్రీ విషయంపై శివాజీ చేసినది తప్పు అనిపించిందని, కానీ ఇప్పుడు గౌతమ్ చేసింది కరెక్ట్ అని ఎలా అంటావని ప్రశ్నించాడు నాగర్జున. రతిక ఏదో చెప్పే ప్రయత్నం చెప్పింది కానీ వినిపించుకోలేదు.

శోభా శెట్టిని ఈ విషయంలో హర్ట్ అయ్యావా అని ప్రశ్నించారు. అలా సంజ్ఞ చేస్తే ఎవరైనా బాధపడుతారని చెప్పింది శోభా. శుభ శ్రీ కూడా అలా చేయడం కరెక్ట్ కాదని చెప్పింది. దీంతో మళ్లీ శోభకు సారీ చెప్పాడు గౌతమ్. తాను వేరే ఉద్దేశంతో షేపులు అంటూ సంజ్ఞ చేయలేదని చెప్పుకొచ్చాడు.